ރ. ވާދޫގައި ފަތުރުވެރިކަން ތަރައްގީކުރުމަށް 3 ހެކްޓަރުގެ ބިމެއް ކައުންސިލަށް ދޫކޮށްފައި ވީ ނަމަވެސް ކޮންސެޕްޓްގެ މަސައްކަތް ފިޔަވައި އެހެން އެއްވެސް ކަމެއް ކުރެވިފައި ނުވާ ކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙް ވިދާޅުވެއްޖެއެވެ.
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ން ކުރިޔަށް ގެންދާ ސިލްސިލާ ކެމްޕެއިން ހަރަކާތް ”ރަށްވެހި ފަތިސް“ގައި ވާހަކަދައްކަވަމުން ރައީސް ޞާލިޙް ވަނީ ސަރުކާރުން ރ ވާދޫގައި ތަރައްގީގެ ގިނަ މަޝްރޫއުތަކެއް ކުރިޔަށް ގެންދިޔުމަށް ނިންމަވާފައިވާކަން ފާހަގަ ކުރައްވާފައެވެ.
ރައީސް ވިދާޅުވީ މިއަހަރުގެ މެއި މަހުގެ ތެރޭގައި ވާދޫ ސޯލާރ ޕްރޮޖެކްޓް ގެ މަސައްކަތް ފެށިގެންދާނެ ކަމަށާއި، ވާދޫގައި ފަތުރުވެރިކަން ފުޅާ ކުރުމަށް އަންނަ އަހަރުގެ ތެރޭގައި ބޮޑެތި މަޝްރޫއުތަކެއް ފެށިގެންދާނެ ކަމަށެވެ.
ރައީސް ވިދާޅުވީ ފާއިތުވި 4 އަހަރު ތެރޭގައި ވާދޫ ޓުއަރިޒަމް ޒޯންގެ ކޮންސެޕްޓް ފައިނަލް ކުރުން ފިޔަވައި އިތުރު ކަމެއް ކުރެވިފައި ނުވާ ކަމަށެވެ.
ރ. ވާދޫ އުތުރުކޮޅު ތުނޑީ ސަރަހައްދުގައި ތަރައްގީކުރާ ޓުއަރިޒަމް ޒޯންގެ މަސައްކަތް ނުފެށި އޮތީ ކޯވިޑް-19 ރޯގާގެ ސަބަބުން ކަމަށް ވާދޫ ކައުންސިލްގެ ރައީސް ހުސައިން ޢަލީ ވިދާޅުވެ އެވެ.
ހުސައިން ވިދާޅުވީ، އެ މަސައްކަތް ނުފެށި ލަސްވަނީ ކޯވިޑް-19 އާ ގުޅިގެން އެ މަސައްކަތް ހަވާލުކުރި ފާލަން ހޯލްޑިންގގެ ޓީމަށް ވާދުއަށް ނުދެވިގެން ކަމަށެވެ. ހުސައިން މިހެން ވިދާޅުވީ އެ ކުންފުންޏާ ހަވާލާދެއްވަމުންނެވެ.
ވާދޫ ކައުންސިލުން މިހެން ވިދާޅުވިއިރު، މި މަސައްކަތަކީ 2016 ވަނަ އަހަރު ރައީސް އަބްދުﷲ ޔާމިންގެ ވެރިކަމުގައި ހަވާލުކުރި މަސައްކަތެކެވެ. ނަމަވެސް، ރައީސް ޔާމިންގެ ވެރިކަން ނިމުމަކަށް އައިއިރު ވެސް މަސައްކަތް އޮތީ ނުފެށިފައެވެ. އޭރު މަސައްކަތް ނުފެށި އޮތީ ޓުއަރިޒަމް މިނިސްޓްރީން ލިބެންޖެހޭ ބައެއް ހުއްދަތައް ނުލިބިގެން ކަމަށް އެނގިފައި ވެއެވެ.
އެކަމަކު، ސަރުކާރު ބަދަލުވެ، ރައީސް އިބްރާހިމް މުހައްމަދު ޞާލިހްގެ ވެރިކަމުގެ ކުރީކޮޅުގައި މިކަމުގައި ހުރި މައްސަލަތައް ހައްލުކޮށް 2019 ވަނަ އަހަރުގެ ކުރީކޮޅު މަސައްކަތް ފެށުމަށް ވަނީ ހުއްދަ ދީފައެވެ.
އަލިފުށި ދާއިރާގެ މެމްބަރު މުޙައްމަދު ރަޟީދު ހުސައިން ވެސް ވަނީ މި މަސައްކަތް ހުއްޓިފައި އޮތުމުގައި މި ސަރުކާރުގެ އެއްވެސް ދައުރެއް ނެތްކަން ޔަގީންކޮށްދެއްވާފައެވެ.
މަސައްކަތް ހުއްޓިފައި އޮންނަތާ ދެ އަހަރު ފަހުން މަސައްކަތް ފެށުމަށް ހުއްދަދީ އެކަން ސަރުކާރުން އިޢުލާންކުރި ނަމަވެސް، 2021 ވަނަ އަހަރުގެ މިހާތަނަށް އައިއިރު ވެސް މި މަސައްކަތް ފެށޭ ގޮތް ވަނީ ނުވެފައެވެ.
ހިތްގައިމު އަތިރިމައްޗަކާއި ގުދުރަތީ އެތައް ރީތިކަމެއް ލިބިފައިވާ ވާދޫ އަކީ ލޯކަލް ޓޫރިޒަމްގެ މުސްތަޤުބަލް އޮތް ރަށެކެވެ. ވާދޫގެ މޫދުގައި އެކި ދުވަސް ވަރު ރެދަންލާ މަންޒަރަކީ ބައިނަލް އަޤުވާމީ ސަމާލުކަން ލިބިފައިވާ ހިތްގައިމު މަންޒަރެކެވެ.
އެމްޑީޕީގެ ފަރާތުން ވާދޫ ކައުންސިލަށް މި ފަހަރު ވާދަކުރައްވަނީ، ޢަލީ ނަސީމް (ނޫވިލާ/ ރ. ވާދޫ)، ޢަލީ ރިޔާޟް (ފޭރުމާގެ/ ރ. ވާދޫ)، މުހައްމަދު ސާމިހު (ލެގޫނާ/ ރ. ވާދޫ) އަދި މަރްޔަމް ޢަލީ (އެއްގަމުގެ/ ރ. ވާދޫ)ގެ އިތުރުން ޒަހީނާ އިބްރާހިމް (މާޒިން/ ރ. ވާދޫ) އެވެ.
