ނަފުރަތުގެ ބިލު މަޖިލީހުގެ ތަޅުމަށް ބަލައިގަންނަން ވޯޓު ދިނީ ކޮމިތީ މަރުހަލާގައި އެ ބިލުގައި ހުރި ކަންބޮޑުވާ ކަންކަން އިސްލާހުކުރުމުގެ ނިޔަތުގައި ކަމަށް ރައްޔިތުންގެ މަޖިލީހުގައި ރ. ވާދޫ ތަމްސީލްކުރައްވާ މެމްބަރު މުހައްމަދު ރަޝީދު ހުސައިން (ބިގޭ) ވިދާޅުވެއްްޖެއެވެ.
ރ. ވާދޫ ލައިވް އަށް ދިން ހާއްސަ ބަސްދީގަތުމެއްގައި ބިގޭ ވިދާޅުވީ، ބިލު ބަލައިގަންނަން ވޯޓު ދިނީ އެއްވެސް ހާލެއްގައި ބިލަށް ތާޢީދުކުރާތީ ނޫން ކަމަށެވެ. ނަމަވެސް، ބިލު މަޖުލީހުގެ ކޮމިޓީއަށް ފޮނުވައި ދިރާސާކުރުމަށް ފަހު އިސްލާހުކުރަންޖެހޭ ކަންކަން ހުރި ނަމަ އިސްލާހުކުރެވޭނީ އެ މަގުން ކަމަށް ވާތީ ކަމަށް ބިގޭ ވިދާޅުވިއެވެ.
ބިގޭ ވިދާޅުވީ، ވޯޓު ދެއްވީ އެމްޑީޕީން ނެރުނު ވިޕް ލައިނާ އެއް ގޮތަށް ކަމަށެވެ. އަދި މި ބިލުގައި އާންމުންގެ އިތުރުން އިލްމުވެރިން ކަންބޮޑުވާ ކަންކަން އެބަހުރި ކަމަށާއި، އެ ކަންކަން އިސްލާހުނުކޮށް އެ ބިލު ފާސްކުރަން ވޯޓު ނުދެއްވާނެ ކަމުގެ ޔަގީންކަން ބިގޭ ވަނީ ދާއިރާގެ ރައްޔިތުންނަށް ދެއްވާފައެވެ.
މި ބިލު މީގެ 6 ދުވަސް ކުރިން ވަނީ، މަޖިލީހުގެ ތަޅުމަށް ބަލައިގަނެ ދިރާސާ ކުރަން މަޖިލީހުގެ ޖުޑިޝަރީ ކޮމިޓީއަށް ފޮނުވަން ފާސްކޮށްފައެވެ.
ސަރުކާރުގެ ފަރާތުން ޖުޑިޝަލް ސާވިސް ކޮމިޝަންގެ ރައީސް އަދި ތުޅާދޫ ދާއިރާގެ މެންބަރު ހިސާން ހުސައިން ހުށަހެޅުއްވި ބިލު ބަލައިގަންނަން ފާސްކުރީ ބިގޭ ހިމެނޭ ގޮތަށް 38 މެންބަރުންގެ ވޯޓުންނެވެ. މި ބިލު ބަލައިގަންނަން ނުފެންނަ ކަމަށް 17 މެންބަރަކު ވޯޓު ދެއްވިއެވެ.
