ރ. ވާދުގައި ލޯކަލް ޓުއަރިޒަމް ޒޯނެއް ތަރައްގީކުރަން ފާލަން ހޯލްޑިންގ ޕވޓ. ލޓޑ އާއި ރ. ވާދޫ ކައުންސިލާ ދެމެދުގައި އެއްބަސްވުމެއްގައި ސޮއި ކުރެވުނީ 2016 ވަނަ އަހަރުގެ ނޮވެމްބަރު މަހުއެވެ.

މި މަސައްކަތަކީ 2016 ވަނަ އަހަރު ރައީސް އަބްދުﷲ ޔާމިންގެ ވެރިކަމުގައި ހަވާލުކުރި މަސައްކަތެކެވެ. ނަމަވެސް، ރައީސް ޔާމިންގެ ވެރިކަން ނިމުމަކަށް އައިއިރު ވެސް ޢަމަލީ މަސައްކަތް އޮތީ ނުފެށިފައެވެ. އޭރު މަސައްކަތް ނުފެށި އޮތީ ޓުއަރިޒަމް މިނިސްޓްރީން ލިބެންޖެހޭ ބައެއް ހުއްދަތައް ނުލިބިގެން ކަމަށް އެނގިފައި ވެއެވެ.

މަސައްކަތް ހުއްޓިފައި އޮންނަތާ ދެ އަހަރު ފަހުން މަސައްކަތް ފެށުމަށް ހުއްދަދީ އެކަން ސަރުކާރުން އިޢުލާންކުރި ނަމަވެސް، 2021 ވަނަ އަހަރުގެ މިހާތަނަށް އައިއިރު ވެސް މި މަސައްކަތް އަމަލީ ގޮތުން ފެށޭ ގޮތް ވަނީ ނުވެފައެވެ. ބަހަނާއަކަށް ވީ ކޯވިޑް-19ގެ ސަބަބުން ދަތުރުފަތުރު ކުރުމަށް ހުރި ދަތިތަކެވެ. ވާދުއަށް އައުމަށް އެ ކުންފުނީގެ މުވައްޒަފުންނަށް ދަތިތަކެއް ހުރީއެވެ.

ޓުއަރިޒަމް ޒޯންގެ މަސައްކަތް ނުފެށި އޮތީ ކޯވިޑް-19 ރޯގާގެ ސަބަބުން ކަމަށް ވާދޫ ކައުންސިލްގެ ރައީސް ހުސައިން ޢަލީ ވެސް މިދިޔަ އަހަރުގެ ޑިސެމްބަރު މަހުގެ ތެރޭގައި ރ. ވާދޫ ލައިވް އަށް ކަށަވަރުކޮށްދިނެއެވެ.

ހުސައިން ވިދާޅުވީ، އެ މަސައްކަތް ނުފެށި ލަސްވަނީ ކޯވިޑް-19 އާ ގުޅިގެން އެ މަސައްކަތް ހަވާލުކުރި ފާލަން ހޯލްޑިންގގެ ޓީމަށް ވާދުއަށް ނުދެވިގެން ކަމަށެވެ. ހުސައިން މިހެން ވިދާޅުވީ އެ ކުންފުންޏާ ހަވާލާދެއްވަމުންނެވެ.

މި ޚަބަރު މީޑިއާގައި ތިލަވުމާއެކު ޕްރެޝަރ ބޮޑުވެ، މި އަހަރުގެ ޖެނުއަރީ މަހު އެ ކުންފުނީގެ ބަޔަކު ވަނީ ވާދު އަށް އައިސްފައެވެ.

އީއައޭގެ މަސައްކަތް ފެށުމަށް ކަމަށް ބުނެ ޖެނުއަރީ މަހު އެ ކުންފުނިން ވާދޫގައި ހަރަކާތްތެރިވިއެވެ. އެހެން ނަމަވެސް އޭގެ ފަހުން 5 މަހަށް ވުރެ ގިނަ ދުވަސް ފާއިތުވި އިރު ވެސް މި މަޝްރޫޢުގެ އިތުރު މަސައްކަތެއް ކުރެވިފައެއް ނުވެއެވެ.

ރ. ވާދޫ އުތުރުކޮޅު ތުނޑީ ސަރަހައްދުން 3 ހެކްޓަރުގެ ބިމުގައި ތަރައްޤީކުރާ މިޒޯންގައި 25 ބީޗް ވިލާ އަދި 25ގާޑަން ވިލާއާއި އެކު ޑައިވް ސެންޓަރަކާއި ވޯޓަރ ސްޕޯޓްސް ސެންޓަރެއްވެސް ތަރައްގީކުރަން އޮތީ ނިންމާފައެވެ.