ރ. އަތޮޅުގައި ކޯވިޑް-19 ފެތުރޭތީ ސަމާލުވުމަށް މާޅޮސްމަޑުލު އުތުރުބުރީ ވާދޫ ކައުންސިލުން އިލްތިމާސްކޮށްފި އެވެ.
ވާދޫ ކައުންސިލުން މި ފަދައިން އިލްތިމާސްކުރީ އަޑު ގަދަކުރާ އިން މިއަދު ވާދޫ ރައްޔިތުންނަށް އިއްވި އިލްތިމާސް ދެންނެވުމެއްގައެވެ.
ކައުންސިލުން ވަނީ މާސްކު އެޅުމަށާއި އިޖުތިމާޢީ ގައިދުރުކަން ބެހެއްޓުމަށް ރަައްޔިތުންގެ ކިބައިން އެދިފައެވެ.
ރ. އަތޮޅުގައި އަނެއްކާ ވެސް ކޯވިޑް-19 ފެތުރޭތީ، 3 ރަށަކަށް އަރައިފޭބުން މަނާކޮށް މޮނިޓަރިންގެ ހާލަތަށް ވެސް ވަނީ ގެނެސްފައެވެ.
ހެލްތް ޕްރޮޓެކްޝަން އޭޖެންސީން (އެޗްޕީއޭ) އިން މޮނީޓަރިންއަށް ލާފައިވަނީ ރ. އިންނަމާދޫ، ރ. މީދޫ އަދި ރ. މަޑުއްވަރީ އެވެ.
މި ރަށްތަކުގެ އިތުރުން ރ. އަލިފުށި، ރ. އުނގޫފާރު، ރ. ދުވާފަރު، ރ. ރަސްމާދޫން ވެސް ވަނީ ކޯވިޑް-19 އަަށް ބަޔަކު ފައްސިވެފައެވެ.
އެހެން ނަމަވެސް އެރަށްތައް އަދި މޮނިޓަރިންއަށް ލާފައެއް ނުވެއެވެ.
ރ އަތޮޅުން އަރައިފޭބުން މަނާކުރި 3 ރަަށަށް ބަލާއިރު، މަޑުއްވަރިން ރޯގާގެ އަލާމާތް ފެނިގެން މިދިޔަ ހޮނިހިރު ދުވަހު ނެގި ސުންކެއް ވަނީ ކޯވިޑް-19 އަށް ފައްސިވެފައެވެ. މިއާއެކު މިހާރު އެރަށުގައި ބަލި ޖެހިފައި 7 މީހަކު އެބަ ތިއްބެވެ.
މީދޫ ހެލްތް ސެންޓަރުން އާއްމު ކުރި މައުލޫމާތުން އެނގޭ ގޮތުގައި އެރަށުން ޖުމްލަ ނެގި 74 ސުންކެއްގެ ތެރެއިން 15 ސުންކެއް ވަަނީ ކޮވިޑަށް ފައްސިވެފައެވެ. ފައްސިވި މީހުންގެ ތެރޭގައި ހިމެނެނީ ބަލީގެ އަލާމާތްތައް ފެނިގެން ނެގި 4 ސުންކަކާއި، ވަކި ތަރުތީބެއް ނެތި ނެގި 5 ސުންކަކަކާއި، ފައްސިވި މީހުންނާއި ގާތުން އެއްތާވި މީހުންގެ މެދުގައި ނެގި ސުންކުތަކުގެ ތެެރެއިން ފައްސިވި 6 މީހެކެވެ.
