ކުރިއަށް އޮތް ރިޔާސީ އިންތިޚާބުގެ ދެވަނަ ބުރުގައި ކާމިޔާބު ލިބިވަޑައިގެން ރައީސުލްޖުމްހޫރިއްޔާގެ މަގާމަށް އިންތިޚާބުވެވަޑައިގެންފިނަމަ ރ. ވާދުއަށް ކޮށްދެއްވާނެ ކަންކަން ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ރިޔާސީ ކެންޑިޑޭޓް އަދި މާލޭ ސިޓީގެ މޭޔަރު ޑރ. މުޙައްމަދު މުއިއްޒު ވިދާޅުވެއްޖެއެވެ.

ރިޔާސީ އިންތިޚާބު 2023ގެ ފުރަތަމަ ބުރުގައި ލައްކައަކަށްވުރެ ގިނަ ވޯޓު ކާމިޔާބު ކުރެއްވުމަށްފަހު، ދެވަނަ ބުރަށް ކުރައްވާ ކެމްޕެއިންގައި ޑރ މުއިއްޒު ވަނީ މިއަދު 9 ރަށަށް ވަޑައިގެންފައެވެ. ނ އަތޮޅުގެ ހަތް ރަށަކަށް އަދި ރ އަތޮޅުގެ ދެ ރަށަކަށް އެމަނިކުފާނު ވަޑައިގެންނެވިއެވެ.

މިިގޮތުން ވާދުއަށް ވަޑައިގެން ބޭއްވި ޖަގަހަ ޖަލްސާގައި އެމަނިކުފާނުވަނީ ކުރިއަށް އޮތް ފަސް އަހަރު މިރަށަށް ކޮށްދެއްވާނެ ކަންކަމުގެ ވައުދުނާމާ ވިދާޅުވެދެއްވާފައެވެ.

ފާހަގަކޮށްލަންޖެހޭ ގޮތުގައި، ޑރ މުއިއްޒުގެ ވައުދު ލިސްޓުގައި ވާދޫއަށް ކޮށްދެއްވާނެ ކަމަށް ވިދާޅުވި ކަންކަމަކީ މީގެ ކުރިން ”އުފާވެރި އަމާންރާއްޖެ“ ކެމްޕޭނަށް ވާދޫއަށް ވަޑައިގެން ބޭއްވެވި ބަނދަރު ބައްލުވުމުގައި ވާހަކަފުޅުދައްކަވަމުން ރައީސް ޞާލިޙް ވައުދުވެވަޑައިގެންފައިވާ ކަންކަމެވެ. ޑރ. މުއިއްޒުގެ ވައުދުނާމާގައި އެއްވެސް އައު ކަމެއް ހިމަނުއްވާފައި ނުވާތީ ވާދޫގެ ގިނަ ރައްޔިތުންވެސް އަންނަނީ އެކަން ފާހަގަކުރަމުންނެވެ.

ޑރ. މުއިއްޒު ވިދާޅުވި އެއް ކަމަކީ ވާދޫގައި ބަނދަރު މަޝްރޫއެއް ހިންގުމެވެ. މިއީ މިހާރު މިހިނގާ ސަަރުކާރުގައި ޕްލޭންކޮށްފައިވާ ކަމެކެވެ. ރ.ވާދޫ ބަނދަރު އަޕްގްރޭޑްކުރުމަށް މިއަހަރުގެ ބަޖެޓްގައި 3,697,911.00 ރުފިޔާ އަދި އަންނަ އަހަރުގެ ބަޖެޓްގައި 4,160,150.00 ރުފިޔާ ހިމަނަން ސަރުކާރުންވަނީ ނިންމާފައެވެ.

ޑރ. މުއިއްޒު ދެން ވައުދުވެވަޑައިގަތީ ބިން ހިއްކައި ވާދޫގެ މަގުތައް ޒަމާނީ ފެންވަރަށް ތަރައްޤީކޮށްދިނުމަށެވެ. މިދެކަމަކީވެސް ރައީސް ޞާލިޙްގެ ރިޔާސީ ވައުދުފުޅެކެވެ.

ރައީސް ޞާލިޙް ވިދާޅުވެފައިވަނީ އަންނަ ދައުރުގައި ވާދޫއަށް ކޮށްދެއްވާނެ ކަންތައްތަކުގެ ތެރޭގައި ވާދޫގެ ބިން ހިއްކުމާއި، މަގުތަކުގައި ތާރުއަޅައި ޒަމާނީ ފެންވަރަށް ތަރައްގީކުރުމާއި، އަދި ސްކޫލަށް ބޭނުންވެފައިވާ ކޮމްޕިއުޓަރ ލެބާއި މަލްޓިޕަރޕަސް ހޯލު އިމާރާތްކުރުމާއި ސްކޫލަށް ބޭނުންވާ ވަސީލަތްތައް ގާއިމްކުރުން ހިމެނޭކަމަށެވެ. ރައީސް ޞާލިޙް ވިދާޅުވީ ވާދޫ ބިން ހިއްކިގެންދާއިރު ޕިކްނިކް އައިލެންޑެއް ތަރައްގީ ކޮށްދެއްވާނެ ކަމަށެވެ.

މިއިންތިޚާބުގެ ކެމްޕެއިންގައި ޑރ. މުއިއްޒު ވިދާޅުވެފައިވަނީ، ކުދި އާބާދީތަކަށްވުރެ ބޮޑެތި އާބާދީތަކަށް އިސްކަންދެއްވާނެ ކަމަށެވެ.