ރ. އަތޮޅު ފުޓްސަލް ޗެލެންޖު 2023 ގެ ޗެމްޕިއަންކަން ދުވާފަރު ސްޕޯޓްސް ކްލަބްއިން ހޯދައިފިއެވެ.
ރ. އަތޮޅު ފުޓްސަލް ޗެލެންޖު 2023 ގެ ފޯރިގަދަ ފައިނަލްގައި ވާދަކުރިީ ރ. އަތޮޅު ފުޓްސަލް ޗެލެންޖު 2022 ގެ ރަނަރ-އަޕް ރ. އިނގުރައިދޫ އާއި ޗެމްޕިއަން ރ. ދުވާފަރެވެ.
ގިނަ އަދަދެއްގެ ސަޕޯޓަރުންގެ ކުރިމަތީގައި ރ. އިންނަމާދޫ ފުޓްސަލް ދަނޑުގައި ކުޅުނު ރ. އަތޮޅު ފުޓްސަލް ޗެލެންޖުގެ ފައިނަލް މެޗު ނިމުނީ 6-0 ގެ ނަތީޖާއަކުންނެވެ.
…
2022 ވަނަ އަހަރުގެ ރ. އަތޮޅު ފުޓްސަލް މުބާރާތުގެ ތަށި ދުވާފަރުން ނަގާފައިވަނީ އުނގޫފާރުގައި ހަމަ އިނގުރައިދޫއާ ދެކޮޅަށް ކުޅެ އެ ޓީމު ބަލިކޮށްގެނެވެ.
ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެންބަރު މުޙައްމަދު ނަޝީދު އަބްދު ﷲ ޝަރަފުވެރިކޮށްދެއްވި، މި މުބާރާތުގެ ފައިނަލް މެޗުން މޮޅުވި ދުވާފަރަށް 30،000 ރުފިޔާގެ ފައިސާގެ އިނާމާއި ރަނަރ-އަޕް އިނގުރައިދޫއަށް 20،000 ރުފިޔާގެ ފައިސާގެ އިނާމު ދީފައިވެއެވެ.
ފައިނަލް މެޗުގެ މޭން އޮފް ދަ މެޗަކަށް ހޮވުނީ ދުވާފަރު ޓީމުގެ އަހުމަދު އީސާއެވެ.
މުބާރާތުގެ އެންމެ މޮޅު ފަސް ކުޅުންތެރިންނަކީ އަހުމަދު އައިހަމް (އިނގުރައިދޫ), މުހައްމަދު މަމްދޫހް (އިނގުރައިދޫ), މުހައްމަދު އިސާމް (ދުވާފަރު), މުސްލިމް މުހައްމަދު (ދުވާފަރު) އަދި އަބްދުއް ސަދާދު އާދަމް (އަލިފުށި)އެވެ.
މުބާރާތުގެ އެންމެ ގިނަ ލަނޑުޖެހި ކުޅުންތެރިއަކަށް ހޮވުނީ އިނގުރައިދޫ ޓީމުގެ ކެޕްޓަން އަހުމަދު އައިހަމްއެވެ. އޭނާއަކީ ކިންގ އޮފް ދަ ޓޯނަމެންޓްއެވެ.
މިމުބާރާތުގެ ފެއާޕްލޭ ކުޅުންތެރިއަކަށް ހޮވިފައި ވަނީ އިނގުރައިދޫ ޓީމުގެ އަލީ ޝާފިޢުއެވެ. އެންމެ އުންމީދީ އެއްކުޅުންތެރިއަކީ އަލިފުށީ ރެކްރިއޭޝަން ކުލަބުގެ އަހުމަދު ޒަލަފްއެވެ.
މުބާރާތުގެ ފެއާޕްލޭ ޓީމަކަށް ހޮވުނީ އަލިފުށީ ރެކްރިއޭޝަން ކުލަބެވެ.
މުބާރާތުގެ އެންމެ މޮޅު ކޯޗުގެ މަގާމު ލިބުނީ ދުވާފަރު ޓީމުގެ ކޯޗު ޔާނިއު އަލީއަށެވެ.
ފުރިހަމަ އިންތިޒާމުތަކާއެކު މި މުބާރާތް ކުރިއަށް ގެންދިއުމުގައި އިންނަމާދޫ ކައުންސިލާއި މުއައްސަސާތަކާއި ރަށުގެ ރައްޔިތުން ކޮށްދެއްވި ބުރަ މަސައްކަތްތަކަށް ރ. އަތޮޅު ކައުންސިލުން ވަނީ ޝުކުރު އަދާކޮށްފައެވެ.
