ރ އަތޮޅު ކައުންސިލްގެ ރައީސް ހުސައިން ނާސިފްގެ ބައްޕާފުޅު އަދި ރ އަތޮޅުގެ އަތޮޅުވެރިކަން ކުރެއްވި، އަތޮޅަށް އަގުހުރި ގިނަ ހިދުމަތްތަކެއް ކޮށްދެއްވި ސައުދު އިބްރާހީމް (ސައުދުބެ) ނިޔާވެއްޖެއެވެ.

އަލްމަރްހޫމް އަލް އުސްތާޛް ސަޢުދު އިބްރާހިމް ސަރުކާރުގެ އެންމެ މަތީ ލެވެލްގައި ދަޢުލަތަށް (40) ސާޅީހަށްވުރެ ގިނަ އަހަރު އިހްލާސްތެރިކަމާއެކު ޚިދުމަތްކޮށްދެއްވިއެވެ.

އޭނާ ވަނީ އެސިސްޓެންޓް އެޓާނީ ޖެނެރަލް ކަމާއި ރައްޔިތުންގެ މަޖިލީހުގައި 15 އަހަރު ރ. އަތޮޅުގެ މެމްބަރުކަމާއި ޕޮލިސް އިންޓަރ ގްރިޓީގެ މެމްބަރުކަމާއި 11 އަހަރު ރ. އަތޮޅުގެ އަތޮޅުވެރިކަމާއި އިތުރު 3 އަތޮޅެއްގެ އަތޮޅުވެރިކަމާއި އެޓޯލްސް އެޑްމިނިސްޓްރޭޝަންގެ ޑިރެކްޓަރ ކަމާއި ޑިރެކްޓަރ ޖެނެރަލް ކަމާއި ކޯޓް ނަމްބަރު 1،2،3،4،5،6،8 އަދި އިތުރު އެހެން ކޯޓްތަކުގެ އިސް ގާޒީ ކަމާއި ވަކީލު ކަމުގެ އިތުރުންވެސް ސަރުކާރުގެ އިސްމަގާމްތަކެއް ފުރުއްވާ ދަޢުލަތަށް ގިނަ ޚިދުމަތްތަކެއް ކޮށްދެއްވާފައެވެ.