އޯލެވެލް އިމްތިހާނުން ރަނގަޅު ނަތީޖާއެއް ހޯދައި، ރ. ވާދޫ ސްކޫލުން ގައުމީ ގަދަ 10އެއްގެ ތިންވަނައަށް އެރި ފުރަތަމަ ދަރިވަރުގެ ޝަރަފު މަރިޔަމް މައިސާ ހޯދައިފިއެވެ.
މައިސާއަކީ ވާދޫ ސްކޫލުން ގައުމީ ގަދަ 10 ގެ ޖާގަ ހޯދި ތިންވަނަ ދަރިވަރެވެ. މީގެ ކުރިން، ގައުމީ ގަދަ ދިހައެއްގެ 8 ވަނަ އީނާސް މުޙައްމަދު އަދި 4 ވަނަ އަމިނަތު ރަފާ ރަޢޫފުވަނީ ހޯދާފައެވެ.
މިފަހުން އައިސް ކޮންމެ އަހަރަކުވެސް ވާދޫ ސްކޫލުން އޯލެވެލްގެ ނަތީޖާ ރަނގަޅުވަމުން އަންނަކަން ފާހަގަކުރެވެއެވެ.
މިދިޔަ މެއި/ޖޫން މަހު ބޭއްވި އޯލެވެލް އިމްތިހާންގެ ނަތީޖާ ޑިޕާޓްމަންޓް އޮފް ޕަބްލިކް އެގްޒަމިނޭޝަން (ޑީޕީއީ) އިން ދޫކުރަން ފަށާފައިވަނީ މިއަދުއެވެ.
އައިޖީސީއެސްއީ އަދި އެސްއެސްސީ އިމްތިހާނު ހިމެނޭ ގޮތަށް 7،501 ކުދިން މި ފަހަރުގެ އޯލެވެލް އިމްތިހާނުގައި ބައިވެރިވި އެވެ. އެއީ އައިޖީސީއެސްއީ ހަދާ 7،155 ކުދިންނާއި އެސްއެސްސީގެ 346 ކުދިންނެވެ.

ޑީޕީއީ އިން ބުނީ ރާއްޖޭގެ 257 ސެންޓަރުގައި ހެދި އެސްއެސްސީ އިމްތިހާނާއި އައިޖީސީއެސްއީ އިމްތިހާނުގެ ނަތީޖާ މިއަދު މެންދުރު 12:00 އިން ފެށިގެން ދޫކުރާނެ ކަމަށެވެ.

އިމްތިހާނުގެ ނަތީޖާ ރީޗެކް ކުރަން ބޭނުންވާ ދަރިވަރުންނަށް މާދަމާއިން ފެށިގެން މި މަހުގެ ނިޔަލަށް، އެ އިމްތިހާނު ހެދި ސެންޓަރަށް ހުށަހަޅައިގެން އެކަން ހަމަޖައްސަން ޑީޕީއީއިން ވަނީ އިލްތިމާސްކޮށްފައެވެ.