ޓެކްނޮލޮޖީގެ ސަބަބުން ރ. އަތޮޅު ކުދިންގެ އުޅުމަށްކުރާ އަސަރާ ގުޅޭ ދިރާސާ ކަރުދާހެއް ހުށަހަޅައިފިއެވެ.
މިދިރާސާ ކަރުދާސް ހުށަހަޅާފައިވަނީ މޯލްޑިވްސް އިސްލާމިކް ޔުނިވާސިޓީ (އައިޔޫއެމް) އިން ބާއްވާ އިންޓަނޭޝަނަލް ކޮންފަރެންސް އޮން އިންޓަލެކްޗުއަލް އެޑްވާންސްމަންޓް (އައިސީއައިއޭ) ގެ ނުވަވަނަ އެޑިޝަންގެ ފުރަތަމަ ދުވަހު، ރ. ހުޅުދުއްފާރު ސްކޫލްގެ ޕްރިންސިޕަލް މުޙައްމަދު ފަޔާޟްއެވެ.
ރާއްޖެ އާއި ރާއްޖޭން ބޭރުގެ 204 ބައިވެރިންނާ އެކު ދެ ދުވަހުގެ މުއްދަތަކަށް، އައިޔޫއެމްގައި ކުރިއަށް ގެންދާ މި ކޮންފަރެންސް މިއަދު ހެނދުނު ފަށްޓަވައިދެއްވީ އެޑިއުކޭޝަން މިނިސްޓަރު ޑރ. އިސްމާއީލް ޝަފީއުއެވެ.

މި ކޮންފެރެންސްގައި، ކީނޯޓް ސްޕީކާސްގެ ގޮތުގައި ބައިވެރިވުމަށް ހަމަޖެހިފައިވަނީ މަހިޑޯލް ޔުނިވާސިޓީގެ ޕްރޮފެސަރު ޕިލިޕް ހެލިންގާ، ކެންވަސް ޑޮޓްގެ ފައުންޑަރު އެންޑް ޕްރިންސިޕަލް ކޮންސަލްޓަންޓް، ޓިޗައޯނާ މެރެވާގެ އިތުރުން އަންކުކް ޔުނިވާސިޓީގެ ޑރ. މަސްޒްލީ މާލިކްއެވެ.

މި ކޮންފެރެންސްގައި، ޕްރޮފެސަރު ފިލިޕް ހަލިންގާގެ ފަރާތުން، މަތީ ތަޢުލީމުގެ ދާއިރާގައި ދެމެހެއްޓެނިވި ތަރައްޤީ ހޯދުމަށް ކުރަންޖެހޭ މަސައްކަތްތަކާ ގުޅޭ ވާހަކަދައްކަވާނެއެވެ. އަދި މި މަސައްކަތްތަކުގެ ތެރޭގައި ދިމާވާ ގޮންޖެހުންތަކުގެ އިތުރުން އެ ގޮންޖެހުންތަކުން އަރައިގަތުމަށް އެޅެން ހުރި ފިޔަވަޅުތަކާއި ގުޅޭގޮތުން މަޢުލުމާތު ޙިއްސާކުރައްވާނެއެވެ.

ޓިޗައޯނާ މެރެވާގެ ފަރާތުން މަތީ ތަޢުލީމުގައި އޭއައި ބޭނުންކުރެވިދާނެ ގޮތްތަކާއި އޭއައިގެ ވަސީލަތްތަކާއި މުޤައްރަރުގައި މިފަދަ މާއްދާތަށް ހިމަނާއިރު، ސަމާލުކަން ދޭންޖެހޭކަންތައްތަކާ ގުޅޭގޮތުން މަޢުލުމާތު ހިއްސާކުރައްވާނެއެވެ.

އަދި ޑރ. މަސްޒްލީ މާލިކްގެ ފަރާތުން، އިސްލާމީ ނަޒަރަކުން ދެމެހެއްޓެނިވި ތަރައްޤީ ހޯދުމާއި، އާންމުކޮށް ދިމާވާ ގޮންޖެހުންތަކުން އަރައިގަތުމަށް އިސްލާމީ ނަޒަރަކުން ކުރެވިދާނެ ކަންތައްތަކުގެ މައްޗަށް އަލިއަޅުވާލައްވާނެއެވެ.

އައިޔޫއެމްއިން 2016ވަނަ އަހަރުން ފެށިގެން ކޮންމެ އަހަރަކު ވެސް ބާއްވަމުން އަންނަ އައިސީއައިއޭއަކީ ރާއްޖޭގައި ބާއްވާ އެންމެ ބޮޑު އިލްމީ އެއް ކޮންފަރެންސެވެ.

މިއަދު ފެށި ކޮންފަރެންސަށް 113 ދިރާސީ ކަރުދާސް ހުށަހަޅާފައި ވެއެވެ. އޭގެ ތެރޭގައި ހިމެނެނީ އިނގިރޭސި ބަހުން ހުށަހަޅާފައިވާ 83 ކަރުދާހާއި ދިވެހި ބަހުން ހުށަހަޅާފައިވާ 12 ކަރުދާހެއްގެ އިތުރުން އަރަބި ބަހުން ހުށައަޅާފައިވާ 18 ކަރުދާހެކެވެ.