މިކައުންސިލްގެ ފަރާތުން “ވިލެޖް ވީވަރ” ދޫނި ވާނީ ރަށުތެރެއަށް ދޫކޮށްފައެވެ. މި ދޫންޏަކީ ރަށުގެ ވެށީގެ ރައްކާތެރިކަމަށްޓަކައި ދޫކޮށްފައި ހުރުން މުހިންމު ދޫންޏަކަށް ވާތީ އެއްވެސް ފަރާތަކުން މިދޫނިތައް ނުހިފުމަށް ދަންނަވަމެވެ.
މާޅޮސްމަޑުލު އުތުރުބުރީ އަލިފުށީ ކައުންސިލް
މި ބާވަތުގެ ދޫނިތަކުގެ ސަބަބުން ގަސްގަހުގައި އަޅާ، ގަހަށް ގެއްލުންދޭފަދަ ފަނިފަކްސާތައް ކޮންޓްރޯލްވެ އޭގެ ފައިދާ ވެއްޓަށް ލިބިގެންދެއެވެ. އަދި މި ދޫންޏަކީ ސައިޒުގެ ގޮތުން ކުޑަ ދޫންޏެކެވެ. މިދޫނީގެ ބާރު ދުވެއްޔާއި ހުށިޔާރުކަމުން އާންމުކޮށް ރަށްރަށުގައި އުޅޭ ކާޅު ފަދަ ދޫނިސޫފިސޫފާގެ ޝިކާރައަކަށްވުމުގެ ފުރުސަތު ކުޑައެވެ.
މިދޫނި އާލާކުރުމަށް ރަށުތެރެއަށް ދޫކޮށްލުމަށް ފަހު އެސޮރުމެން ފެންނަ ހިސާބަށް ފުރަތަމަ ދުވަސްކޮޅުގައި ކޮންމެވެސް ވަރަކަށް ކާން އަޅަން ޖެހެއެވެ. ނަމަވެސް ވަކި ތަނެއް ނުވަތަ ވަކި ސަރަހައްދެއްގައި ދޫނިތައް ހަމަޖެހުމުން ކާން ދޭން ނުޖެހޭނެެއެވެ.
މިދޫނީގެ ހާއްސަ ކަމަކީ، އަމިއްލައަށް ވިޔެގެން، ބެދިފައި ހުންނަ ގޮއްޓެއް ގޮތަށް ހަދާ ހާލިތަކެވެ. އޭގެ މާހައުލުގައި އުޅޭއިރު، އެ ފަދަ ގިނަ ހާލިތަކެއް ހަދަ އެވެ. ގަހުގެ ގޮފިގަނޑުގައި، ތިރިއަށް އެލިފައި ހުންނަ އެ ހާލިތަކަށް ދޫނިތައް ވަދެ ނުކުމެ އުޅޭއިރު ވެސް އެއީ ބަލާލަން ހިތްގައިމު މަންޒަރެކެވެ.
