ލޯކަލް ކައުންސިލްތަކުގެ ފަފޯމަންސް އިންޑެކްސް 2023ގައި މާޅޮސްމަޑުލު އުތުރުބުރިން އެއް ވަނަ ކައުންސިލަކަށް ރ. ކިނޮޅަހު ކައުންސިލް ހޮވިއްޖެއެވެ.

މުޅި ރާއްޖޭން ބަލާ ނަމަ ކިނޮޅަސް ކައުންސިލް އޮތީ މި އިންޑެކްސްގެ 13 ވަނައިގައެވެ. މުޅި ރާއްޖޭން 49 ވަނަ ލިބުނު ރ. ފައިނު ކައުންސިލް ވަނީ އަތޮޅުގެ ދެވަނަ ކައުންސިލްގެ ލަގަބު ހޯދާފައެވެ.

ލޯކަލް ކައުންސިލްތަކުގެ ފަފޯމަންސް އިންޑެކްސް 2023އަށް ބަލާއިރު ރ. އަތޮޅުން ތިން ވަނަ ލިބުނީ މުޅި ރާއްޖޭން 55 ވަނައިގައި އޮތް ރ. އިނގުރައިދޫ ކައުންސިލަށެވެ.

ގަދަ ފަހަކަށް ބަލާ ނަމަ، ރ. އަތޮޅުގެ ހަތަރު ވަނަ ރ. ހުޅުދުއްފާރު ކައުންސިލަށް ލިބުނުއިރު، ފަސް ވަނަ ލިބުނީ ރ. ރަސްމާދޫ ކައުންސިލަށެވެ.

އެކަށީގެންވާ ވަރަށް މަޢުލޫމާތާއި ކިތާބީހެކި ހުށަހަޅާފައި ނުވާތީ، ލޯކަލް ކައުންސިލްތަކުގެ ފަފޯމަންސް އިންޑެކްސް 2023ގައި މާޅޮސްމަޑުލު އުތުރުބުރީ ވާދޫ ކައުންސިލްއަށް އެއްވެސް ދަރަޖައެއް ނުލިބުނެވެ.

ލޯކަލް ކައުންސިލްތަކުގެ ފަފޯމަންސް އިންޑެކްސް 2023ގައި 0.0000 މާކްސް ލިބުނު ކައުންސިލްތަކުގެ ތެރޭގައި ރ. ވާދޫ ކައުންސިލް ހިމެނުނު މިއީ ފުރަތަމަ ފަހަރެވެ.

ފާއިތުވި އަހަރުތަކަށް ބަލާއިރު ކައުންސިލްތައް މިންކުރުމުގެ ގޮތުން އެލްޖީއޭއިން އެކުލަވާލާފައިވާ ކައުންސިލްތަކުގެ ޕާފޯމަންސް އިންޑެކްސްގައި އެ ކައުންސިލް އައީ އަހަރަކަށްވުރެ އަހަރެއް ފަހަތަށް ސޮއްސާލަމުންނެވެ.

2021ވަނަ އަހަރަށްވުރެ 2022 ވަނަ އަހަރު ރ. ވާދޫ ކައުންސިލްގެ ޕާފޯމަންސް ދަށްކަން އެ އަހަރުތަކުގެ އިންޑެކްސްއިން ހާމަވެއެވެ.

ކައުންސިލްތަކުގެ ޕާފޯމަންސް އިންޑެކްސް 2022 ދައްކާ ގޮތުން، ވާދޫ ނިސްބަތްވާ ރ. އަތޮޅުން ރ. ވާދޫ ކައުންސިލަަށް ލިބިފައިވަނީ އަށް ވަނައެވެ. މިއީ 2021 ތިން ދަރަޖައިގެ ކުރިއެރުމެއް ހޯދައި އަތޮޅުގެ ފަސް ވަނައިގައި އޮވެ، ތިން ދަރަޖަ ފަހަތަށް ސޮއްސާލުމެވެ. 2020 ވަނަ އަހަރު އެ ކައުންސިލް އޮތީ އަށް ވަނައިގައެވެ.

ކައުންސިލްތަކުގެ ޕާފޯމަންސް އިންޑެކްސް 2022 ދައްކާ ގޮތުން، ރ. ވާދޫ ކައުންސިލް އޮތީ މުޅި ރާއްޖޭގެ 96 ވަނައިގައެވެ.

ކައުންސިލްތަކުގެ ޕާފޯމަންސް އިންޑެކްސް 2021 ގައި ރ. ވާދޫ ކައުންސިލް އޮތީ މުޅި ރާއްޖޭގެ 92 ވަނައިގައެވެ.

އެހެންކަމުން، 2022 ވަނަ އަހަރު މިއީ ހަތަރު ދަރަޖައިގެ ވެއްޓުމެކެވެ.

އެނގުން މުހިއްމު: އެލްޖީއޭން އާންމު ކޮށްފައިވާ ކައުންސިލްތަކުގެ ޕާފޯމަންސް ރިޕޯޓް 2019-2020 ގައި ވާ ގޮތުން، ރ. އަތޮޅުގެ ރޭންކިންގައި 2019 ވަނަ އަހަރު ރ. ވާދޫ ކައުންސިލް އޮތީ ތިން ވަނައިގައެވެ. ނަމަވެސް 2020ވަނަ އަހަރު އެ ކައުންސިލް ވަނީ އަށް ވަނައަށް ވެއްޓިފައެވެ. އަދި 2021ވަނަ އަހަރު ކުރި އެރުން ހޯދައި އަތޮޅުގެ ފަސް ވަނަ ހޯދާފައިވެއެވެ. 2022 ވަނަ އަހަރު ވަނީ އަށް ވަނައަށް ސޮއްސާލާފައެވެ.

2016 އަދި 2017ވަނަ އަހަރު ވާދޫ ކައުންސިލަށް ރ. އަތޮޅުގެ އެއް ވަނަ ލިބިފައިވެއެވެ.