ރ އަތޮޅުގެ އެންމެ ފޯރިގަދަ މުބާރާތް، އަރުތަ ފުޓްސަލްގެ 2025 ވަނަ އަހަރުގެ މުބާރާތުގައި ބައިވެރިވުމަށް ރ. ވާދޫގެ ޓީމް ”ވާދޫ އެފްސީ“ ރެޖިސްޓަރކޮށްފިއެވެ.
ބައިވެރިވުމަށް ފުރުސަތު ހުޅުވާލި ވަގުތު ހަމަވި އިރު ރަޖިސްޓްރީކޮށްފައިވަނީ ޖުމުލަ 12 ރަށެއް ތަމްސީލްކުރާ ޓީމުތަކެވެ. އެ 12 ރަށަކީ:
- ދުވާފަރު
- މީދޫ
- އިނގުރައިދޫ
- އަލިފުށި
- ކިނޮޅަސް
- އުނގޫފާރު
- އިންނަމާދޫ
- ހުޅުދުއްފާރު
- މަޑުއްވަރީ
- ވާދޫ
- މާކުރަތު
- ރަސްމާދޫއެވެ.
1 އޯގަސްޓް 2025ގައި ރަސްމާދޫގައި ފެށުމަށްހަމަޖެހިފައިވާ މި މުބާރާތަށް ތައްޔާރުވުމަށް ވާދޫ އެފްސީން ވަނީ ފަރިތަކުރުންތައް ވެސް ފަށާފައެވެ. މި ފަރިތަކުރުންތައް ކުރިއަށް ގެންދަނީ ވާދޫ ސްޕޯޓްސް އެރީނާގެ ފުޓްސަލް ދަނޑުގައެވެ.
ވާދޫ އެފްސީން ވަނީ މިމުބާރާތުގައި 2022 ވަނަ އަހަރުވެސް ވާދަކޮށްފައެވެ. ދެ އަހަރަށް ފަހު މުބާރާތަށް އެނބުރި އަންނަ ޓީމުގައި ވާދޫއަށް ނިސްބަތްވާ ހުނަރުވެރި ޒުވާން ކުޅުންތެރިން ފެނިގެންދާނެއެވެ.
ރ އަތޮޅު ކައުންސިލްގެ 4 ވަަނަ ދައުރުގައި ކުޅިވަރުގެ ދާއިރާއިން އަތޮޅުގައި ހުނަރުވެރިން އުފެއްދުމުގެ މަޤްސަދުގައި ބާއްވަންފެށި މުބާރާތުގެ 4 ވަނަ މުބާރާތެވެ.
މި މުބާރާތް ޖެހިޖެހިގެން 3 ފަހަރު ދުވާފަރުން ކާމިޔާބުކޮށްފައިވާ އިރު 3 އަހަރުވެސް ފައިނަލްގައި އިނގުރައިދޫ ކުޅެފައިވެއެވެ. މި އަހަރުގެ މުބާރާތަކީ މިހާތަނަށް އެންމެ ގިނަ އަދަދަކަށް ޓީމްތައް ބައިވެރިވާނެ ފަހަރުކަމުގައި ގަބޫލްކުރެވެއެވެ.
ރ. އަތޮޅު ކައުންސިލުން، މި އަތޮޅުގެ ރަށްތަކަށް ހުޅުވާލައިގެން ބާއްވާ ރ. އަތޮޅު ފުޓްސަލް މުބާރާތުގެ މައިގަނޑު މަޤުސަދަކީ އަތޮޅުގެ ރަށްރަށުގެ މެދުގައި އެކުވެރިކަން ބަދަހިކޮށް، ކުޅިވަރުގެ ރޫޙު ދިރުވާ އާލާކުރުމާއި، އަތޮޅުގައި ފުޓްސަލް މި ކުޅިވަރު ކުރިއަރުވަން އެހީތެރިވުމެވެ. ހަމައެހެންމެ، އަތޮޅުގައި ހުނަރުވެރި ފުޓްސަލް ކުޅުންތެރިން އުފެއްދުމާއި، ފުޓްސަލްގެ ހުނަރު އިތުރުކުރުމަކީ މުބާރާތް ބޭއްވުމުގެ މަޤުސަދެކެވެ.
