ތޫފާން ދިތުވާ ދަތުރުކުރަމުންދަނީ ރާއްޖެއާއި ދުރަށްކަމަށާއި އެތޫފާނުގެ ސަބަބުން ރާއްޖެއަށް މާބޮޑު އަސަރެއް ނުކުރާނެކަމަށް މޫސުމާ ބެހޭ ޤައުމީ އިދާރާއިން  ބުނެފިއެވެ.

މޫސުމާ ބެހޭ ޤައުމީ އިދާރާއިން ބުނީ، ސްރީލަންކާ ސަރަޙައްދުގައި އުފެދުނު ތޫފާން ދިތުވާ މިހާރު ހުރީ ހއ.ތުރާކުނުގެ އިރުއުތުރުން ގާތްގަނޑަކަށް 876 ކޮލޯމީޓަރު ދުރުން ސްރީލަންކާގެ އުތުރު އައްސޭރިފަށުގައިކަމަށެވެ. މިތޫފާން ދަތުރުކުރަމުންދަނީ ހުޅަނގު އުތުރުން އިންޑިއާގެ އުތުރު ޓަމިލްނާޑޫ، ޕޫޑޫޗެރީ އަދި އަންދްރަ ޕްރަދޭޝްގެ ދެކުނު އައްސޭރިއަށްކަމަށް މެޓުން ބުނެއެވެ.

މިތޫފާން މިހާރު ދަތުރުކުރަމުންދަނީ ރާއްޖެއާއި ދުރަށްކަމުން ތޫފާންގެ މާބޮޑު އަސަރެއް ރާއްޖެއަށް ނުކުރާނެކަމަށް މެޓު އޮފީހުން ބުނެއެވެ. އެހެންނަމަވެސް ތޫފާނުގެ އައުޓަރ ރެއިން ބޭންޑްގެ އަސަރު ނުވަތަ އެއާއެކު އުފެދޭ ވިއްސާރަ ވިލާތަކުގެ ސަބަބުން ކުރިއަށް އޮތް 24 ގަޑިއިރު ދެކުނާއި މެދުރާއްޖެތެރޭގެ އެކި ހިސާބަށް ގުގުރުމާއެކު ވިއްސާރަކުރާނެކަމަށް މެޓު އޮފީހުން ބުނެއެވެ.

މެޓު އޮފީހުން ބުނީ މިކަމާއި ގުޅިގެން ރާއްޖެއަށް ހުދު ސަމާލު ނެރެފައިވާކަމަށާއި، ސަމާލު ނެރެފައިވަނީ މެޓު އޮފީހުގެ އެލަރޓް ދަރަޖަކުރެވިފައިވާ ސަރަޙައްދަށް ތޫފާން ވަނުމުންކަމަށެވެ. މެޓު އޮފީހުން ބުނީ އަންނަ ހަފްތާގެ އަންގާރައިން ފެށިގެން ރާއްޖޭގެ މޫސުން ރަނގަޅުވާން ފަށާނެކަމަށް ލަފާކުރެވޭނެކަމަށެވެ.

މިމަހުގެ މެދުތެރޭގައި ރާއްޖެ ސަރަޙައްދުގައި ބާރުގަދަވަމުންދިޔަ 2 ތޫފާނެއްގެ ސަބަބުން ރާއްޖެއަށް މޫސުން ގޯސްވެ ގުގުރުމާއެކު އެކި ހިސާބުތަކަށްވަނީ ބޯކޮށްވާރޭވެހިފައެވެ. އެހެންނަމަވެސް މީގެތެރެއިން މެލޭޝިއާ ސަރަޙައްދުގައި އުފެދުނު ތޫފާނުގެ ބާރު މިހާރު ދަށްވެފައިވާއިރު ސްރީލަންކާ ސަރަޙައްދުގައި އުފެދުނު ތޫފާން މިހާރުވަނީ ރާއްޖެއާއި ދުރަށް ދަތުރުކުރަން ފަށާފައެވެ.