ރ. ވާދޫ ސްކޫލްގައި މާދަރީބަހުގެ ދުވަސް ފާހަގަކުރުމުގެ ގޮތުން ހާއްސަ ހަރަކާތެއް ކުރިއަށް ގެންގޮސްފިއެވެ.
ކޮންމެ އަހަރެއްގެ ވެސް ފެބުރުވަރީ މަހުގެ 21ވަނަ ދުވަހަކީ ބައިނަލްއަޤުވާމީ މާދަރީބަހުގެ ދުވަހެވެ. އެކަމަކު ވާދޫ ސްކޫލުން މި ދުވަސް ފާހަގަކުރުމަށް ހަރަކާތެއް ކުރިއަށް ގެންދިޔައީ މިއަދު ހެނދުނުއެވެ.
މިއަދު އެ ސްކޫލް ހޯލުގައި ކުރިއަށް ދިޔަ މި ހާއްސަ ހަރަކާތުގައި ސްކޫލްގެ ފައުންޑޭޝަން ސްޓްޭޖުން ފެށިގެން ގްރޭޑް 10ގެ ދަރިވަރުން ބައިވެރިވިއެވެ.
މިއަދު ކުރިއަށް ދިޔަ ހާއްސަ ހަރަކާތުގެ ތެރެއިން ދަރިވަރުން ވަނީ ދުނިޔޭގައި އެކި ހިސާބުތަކުގައި މީހުން ވާހަކަދައްކާ ބަސްބަހުން އެ ކުދިންގެ ޝުއޫރުފާޅުކޮށްފައެވެ. ދަރިވަރުން ވަނީ އަދަބީ ބަހާ ގުޅޭ ހާދިސާއެއް ވެސް ތަމްސީލުކޮށްދީފައެވެ. މީގެ އިތުރުން، މިއަދު ފައުންޑޭޝަން ސްޓޭޖްގެ ދަރިވަރުން ވަނީ ބަސްބާޒީ ވެސް ކުޅެފައެވެ.
މިއަދުގެ ހަރަކާތުގައި ދުވަހާ ގުޅޭ ގޮތުން، ސްކޫލުގެ ޕްރިންސިޕަލް ނަސީމް ވަނީ ވާހަކަފުޅުދައްކަވާފައެވެ.
