ވާދޫ ޞިއްޙީ މަރުކަޒުގެ މިހާރުގެ ވެރިޔާ މުޙައްމަދު ޟަފީގު (މޯސޭ) މަގާމާ ހަވާލުވުމަށް ފަހު އެންމެ ފުރަތަމަ ކުރި ކަންތައްތަކުގެ ތެރޭގައި 24 ގަޑިއިރު މެދު ނުކެނޑި ޚިދުމަތް ލިބޭ ހޮޓްލައިން އެއް ގާއިމުކުރުން ހިމެނެއެވެ.
ވާދޫ ކައުންސިލްގެ ނައިބު ރައީސްކަން ވެސް މީގެ ކުރިން ކުރައްވާފައިވާ މޯސޭ ވިދާޅުވި ގޮތުގައި، ވާދޫ ޞިއްޙީ މަރުކަޒުގެ ހޮޓްލައިން 9490399 އަކީ މެދު ނުކެނޑި ކޮންމެ ދުވަހެއްގެ ކޮންމެ ވަގުތެއްގައި ވެސް ޖަވާބު ދޭނެ ހޮޓްލައިނެކެވެ.
މި ނަމްބަރަށް ގުޅުމުން ބޭނުންވާ ގަޑިއެއްގައި މަރުކަޒު ހުޅުވައިދިނުމުގެ އިތުރުން، ލަސް ނުވެ އެމްބިއުލޭންސް ފޮނުވައިދިނުމުގެ ޚިދުމަތާއި، މަރުކަޒުން ސާފުކުރަންޖެހޭ ޚިދުމަތްތަކާއި ބެހޭ މަޢުލޫމާތު ސާފުކޮށްދިނުމުގެ ޚިދުމަތް ވެސް ލިބިގެންދާނެ ކަމަށް މޯސޭ ވިދާޅުވިއެވެ.
މި ނަމްބަރަށް އާންމުން ހޭލުންތެރިކުރުމަށް ފޭސްބުކް ޕޭޖްގެ އިތުރުން ވައިބާރ އަދި ޓްވިޓާގައި ވެސް ދަނީ ނަމްބަރު ޕްރޮމޯޓުކުރަމުންނެވެ. ވައިބާ ސްޓިކާ ޕެކެއްގެ އުފައްދާފައިވާއިރު، ފޭސްބުކް ޕޭޖްގެ ކޯލް ބަޓަނަށް ފިއްތާލުމުން ސީދާ މި ނަމްބަރަށް ގުޅޭނެ ގޮތް ވަނީ ހަދާފައެވެ.
މީގެ އިތުރުން މި ނަމްބަރަށް އާންމުން ހޭލުންތެރިކުރުމަށް މީހުން ދިރިއުޅޭ ގޭގޭގައި ވެސް ވަނީ ނަމްބަރު ލިޔެފައިވާ ސްޓީކާ ތަތްކޮށްފައެވެ.
