ފަލަސްތީނުގައި ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް ރ. ވާދޫގެ ހުރިހާ މުވައްސަސާއެއް ގުޅިގެން ކުރިއަށް ގެންދާ ފަންޑު ހޯދުމުގެ ހަރަކާތަށް، މާޅޮސްމަޑުލު އުތުރުބުރީ ވާދޫ ކައުންސިލްގެ އިދާރާގައި މަސައްކަތްކުރާ ހުރިހާ މުވައްޒަފުންގެ މުސާރައިން ބައެއް ހަދިޔާކުރުމަށް ނިންމައިފިއެވެ.
ފަލަސްތީނު ފަންޑަށް ވާދޫ ކައުންސިލްގެ އިދާރާގައި މަސައްކަތްކުރާ ހުރިހާ މުވައްޒަފުންގެ މުސާރައިން ހަދިޔާކުރުމަށް ނިންމާފައި ވަނީ 5 އިންސައްތައެވެ.
މި ހަރަކާތަކީ ހާލުގައި ޖެހިފައިވާ ފަލަސްތީންގެ ރައްޔިތުންނަށް އެޙިތެރިވުމަށް ކުރިއަށް ގެންދެވޭ ހަރަކާތެއް ކަމަށް ރ. ވާދޫ ކައުންސިލްގެ ރައީސް ހުސައިން ޢަލީ ވިދާޅުވެއެވެ.
މި ހަރަކާތުގެ ދަށުން، ވާދޫގެ 3 ސަރަހައްދެއްގައި ފަންޑު ފޮށި ބެހެއްޓިފައި ހުންނާނެއެވެ. އެއީ ރ. ވާދޫ ސިއްހީ މަރުކަޒާއި، ރ. ވާދޫ ކައުންސިލްގެ އިދާރާގެ އިތުރުން ފެނަކަ ކޯޕަރޭޝަންގެ ރ. ވާދޫ އޮފީސް ހުންނަ އިމާރާތުގައެވެ.
މި ހަރަކާތުގައި ފަންޑު ފޮށި ހުޅުވައިދެއްވީ ވާދޫ މެޖިސްޓްރޭޓް ކޯޓުގެ ކުރީގެ މެޖިސްޓްރޭޓް އަބްދުލް ޤާދިރު އިބްރާހިމް އެވެ.
މި ހަރަކާތުގައި ފޯކަލް ޕޮއިންޓުންގެ ގޮތުގައި ހަރަކާތްތެރި ވާނީ ވާދޫ ސްކޫލްގެ ފަރާތުން އިބްރާހިމް ސުޖާއު، ވާދޫ ސިއްހީ މަރުކަޒުގެ ފަރާތުން އަހުމަދު އަފްރާހު، ވާދޫ ފެނަކަ ގޮފީގެ ފަރާތުން އަބްދުލް މަތީން އަދި ކޯޓުގެ ފަރާތުން މުހައްމަދު ޒަކަރިއްޔާއެވެ.
މި ހަރަކާތް ނިންމާލައި މާދަމާގެ މެންދުރު ފަހު، މުވައްސަސާތަކުން ބެހެއްޓި ހުރިހާ ފަންޑުފޮށިތައް ބަންދުކުރުމަށް ވަނީ ނިންމާފައެވެ.
