އަންނަ އަހަރު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިންތިޚާބުގައި އެމްޑީޕީގެ ޓިކެޓުގައި ވާދަކުރަން ބޭނުންވާ ފަރާތްތަކަށް އެ ޕާޓީން ފުރުސަތު ހުޅުވާލައިފި އެވެ.

އެމްޑީޕީން މިކަން އިއުލާނު ކުރަމުން ބުނެފައިވަނީ، އިންތިޚާބުގައި ވާދަކުރުމަށް ޝައުގުވެރިކަން ފާޅުކުރުމުގެ ފުރުސަތު އަންނަ މަހުގެ 30 ވަނަ ދުވަހުގެ ނިޔަލަށް އޮންނާނެ ކަމަށެވެ. އަދި ޕާޓީގެ ޕްރައިމަރީގައި ވާދަކުރެވޭނީ މި މުއްދަތުގެ ތެރޭގައި ޝައުގުވެރިކަން ފާޅުކޮށްފައިވާ ފަރާތްތަކަށް ކަމަށާއި، ޕްރައިމަރީގެ ޓައިމްލައިން ފަހުގެ ތާރީހެއްގައި އިއުލާނު ކުރާނެ ކަމަށްވެސް އެ ޕާޓީން ބުނެފައިވެ އެވެ.

އިންތިޚާބުގައި ވާދަކުރުމަށް ކުރިމަތިލާ ފަރާތްތަކުގައި ހުންނަންޖެހޭ ޝަރުތުތަކުގެ ތެރޭގައި، އެމްޑީޕީގެ މެންބަރަކަށްވުމާއި، ލޯކަލް ކައުންސިލްތަކުގެ އިންތިޚާބުގެ ޤާނޫނުގެ 12 ވަނަ މާއްދާގައި ބަޔާންކޮށްފައިވާ އެންމެހާ ޝަރުތުތައް ފުރިހަމަވުން ހިމެނެ އެވެ. މީގެ އިތުރުން އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ގަވާއިދުގެ އަށްވަނަ މާއްދާގައި ބަޔާންކޮށްފައިވާ އެންމެހާ ޝަރުތުތައްވެސް ފުރިހަމަވާން ޖެހޭނެ އެވެ.

އެމްޑީޕީން އިތުރަށް ބުނެފައިވަނީ، އިންތިޚާބުގައި ވާދަކުރުމަށް ޝައުގުވެރިވާ ފަރާތްތަކުން ގޫގުލް ފޯމް މެދުވެރިކޮށް ޝައުގުވެރިކަން ފާޅުކުރަންވާނެ ކަމަށެވެ. އަދި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންގެ ކުށާއި ދަރަނީގެ ރިކޯޑު ސާފުކުރާ ފޯމު އެ އިދާރާއިން ސާފުކޮށް، ފުރިހަމަކުރުމަށްފަހު ފޯމާއެކު ހުށަހަޅަންޖެހޭނެ ކަމަށްވެސް އެ ޕާޓީން ބުނެފައިވެ އެވެ.