ރ. ވާދޫ ހިމެނޭ، ރ. އަލީފުށި ދާއިރާގެ މެންބަރު މުހައްމަދު ރަޝީދު ހުސައިން (ބިގޭ) އަކީ ކެރޭ، ހީވާގި ލީޑަރެއް ކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙުގެ އަނބިކަނބަލުން، ފަސްޓް ލޭޑީ، މެޑަމް ފަޒްނާ އަޙްމަދު ވިދާޅުވެއްޖެއެވެ.

ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙުގެ އަނބިކަނބަލުން މިހެން ވިދާޅުވީ ރާއްޖެ ޓީވީގެ ”ފަށާއިރު“ ޕްރޮގްރާމްގައި ބިގޭ ދެއްކެވި ވާހަކަތަކަކަށް އިޝާރާތް ކުރައްވައި އެ ކަމަނާގެ ފޭސްބުކްގައި ކުރެއްވި ޕޯސްޓެއްގައެވެ.

ފަސްޓް ލޭޑީ ފަޒްނާ ވިދާޅުވީ ބިގޭ ވާހަކަ ދެއްކެވީ ސީދާ މައްސަލައަށް ކަމަށާއި، ވަކި މީހަކު މޮޅުކޮށް ދެރަކޮށް ނޫންކަން ފާހަގަކުރެވުނު ކަމަށެވެ. އަދި ނިންމުންތައް ނިންމުމުގައި އިސްކަން ދެނީ ވަގުތާއި ހާލަތަށް ބަލައި، އެ އިރަކު ގައުމަށް އެންމެ ފައިދާ ހުރި ގޮތަށް ކަމަށްވެސް ބިގޭ ފާހަގަކުރެއްވި ކަމަށް ފަޒްނާ ވިދާޅުވިއެވެ.

”ބިގޭ އަކީ ވެސް ބަސްމަދު އަމަލު ގިނަ، ސިޔާސީ ތަޖުރިބާ ހުރި، ކެރޭ، ހީވާގި ލީޑަރެއްކަން ހާމަވެގެން ހިނގައްޖެއް“ ފަޒްނާ ވިދާޅުވިއެވެ.

އެ ޕްރޮގްރާމްގައި ވާހަކަދައްކަވަމުން ބިގޭ ވިދާޅުވީ އޭނާގެ ޖަލު ހަޔާތް ފެށުނީ 1990 ވަނަ އަހަރު ކަމަށާއި އެގޮތުން ދޫނިދޫ ޓިނު ގޮޅީގައި ހަ މަސް ދުވަސްވަންދެން އޮންނެވި ކަމަށެވެ. އޭގެ އިތުރުން ދޫނިދޫ ތިން ނަމްބަރު ކުޑަގޮޅީގައި ދެ ރޯދަ މަސް ހޭދަކުރެއްވި ކަމަށްވެސް ބިގޭ ވިދާޅުވިއެވެ. އަދި ހުކުމުގެ ބާކީ ބައި ތަންފީޒު ކުރަން އެއް އަހަރު ދުވަހު ހޯރަފުށީގައި އަދި ބާކީ އޮތް މުއްދަތު އަލިފުށީގައި ހުންނަވައިގެން ވެސް ތަންފީޒު ކުރެއްވި ކަމަށް ބިގޭ ވިދާޅުވިއެވެ.

ފަޒްނާ ބިގޭ އަށް ތައުރީފުކޮށްފައިވާއިރު، ޑިފެންސް މިނިސްޓްރީގެ ޑެޕިއުޓީ މިނިސްޓަރު ހަސަން ޒަމީލު ރައްޔިތުންގެ މަޖިލީހުގެ އިމްތިޔާޒަށް އަރައިގަތް ކަމަށް ބުނެ އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިމްތިޔާޒާއި ސުލޫކު ކޮމިޓީއަށް ހުށަހެޅުއްވި މައްސަލަ އެމްޑީޕީގެ ބައެއް މެމްބަރުންގެ ވޯޓާއެކު ބޭރުކޮށްލުމުން އެ ޕާޓީގެ އެތެރޭގައި ބޮޑެތި ހިޔާލުތަފާތުވުންތަކެއް ވަނީ އުފެދިފައެވެ.

އެގޮތުން އެމްޑީޕީގެ ބައެއް މެމްބަރުން ތުހުމަތުކުރާ ގޮތުގައި އެ މައްސަލަ އެ ކޮމިޓީން ބޭރުކޮށްލީ ބިގޭ އެ ކޮމިޓީގެ ބައެއް މެމްބަރުންނަށް ގުޅައި މައްސަލަ ބޭރުކޮށްލަން އެދުމުންނެވެ. ނަމަވެސް، ބިގޭ މި ތުހުމަތަުތައް ދޮފުކުރައްވައެވެ.