ރ. ވާދޫ ބަނދަރު ސަރަހައްދުން ބޯފެން ލިބޭނެ ގޮތް ހެދުމުގެ މަސައްކަތް ފަށައިފިއެވެ.
އެ ގޮތުން މިއަދު ވަނީ، ބަނދަރަށް ބޯފެން ފޯރުކޮށްދިނުމަށް ބޭނުންވާ ހޮޅި ވަޅުލުމަށް ކޯރު (ހަނި ދިގު ވަޅު) ކޮނެފައެވެ. ފެން ޖަމާކުރުމަށް ހަން ބަހައްޓަން ހަމަޖެހިފައި ވަނީ ވާދޫ ކުޑަކުދިންގެ ޕާކުގައެވެ. ފެން ނެގުމަށް ދެ ހަން ބަހައްޓަން ވަނީ ހަމަޖެހިފައެވެ.
އެނގިފައިވާ ގޮތުގައި މިއީ އާންމު ފަރުދެއްގެ ދީލަތި އެހީގައި ކުރަމުން އަންނަ ކަމެކެވެ. މި ކަމަށް ބޭނުންވާ ހުރިހާ ސާމާނެއް ހަދިޔާކޮށްފައި ވަނީ ވިޔަފާރިވެރިޔާ ހުރާ ވާހިދުއެވެ.
ވާދޫ ބަނދަރުން ބޯފެން ލިބޭނެ އިންތިޒާމެއް ހަމަޖެއްސުމުގެ މަސައްކަތް ފަށާފައި ވާއިރު، މީގެ ކުރިން ވަޅުފެން ލިބޭ ނިޒާމެއް ގާއިމްކޮށްފައި ވެއެވެ.
ބަނދަރުގައި ވަޅުފެން ލިބޭ ނިޒާމެއް ގާއިމުކުރީ ރ. ވާދޫ ކައުންސިލުންނެވެ. އަދި ވާދޫގެ ފައިބަރ ބޯޓު ބިލްޑިންގ ކުންފުނި ޒަގާ މެރިން ޕްރައިވެޓް ލިމިޓެޑްގެ އިޖުތިމާއީ ހަރަކާތެއްގެ ގޮތުން، މެއިންޓެނެންސްގެ ބައެއް ކަންކަން ކޮށްދިނުމަށް ވަނީ އެއްބަސްވެފައެވެ.
