ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ އުސޫލުތަކާއި އެއް ގޮތަށް ބަލީގެ ނުރައްކާ ނުވާނެހެން، ކުރިއަށް އޮތް އަލްޙާ އީދުގައި ޢީދު ކުޅިވަރު ކުޅުމަށާއި ހަރަކާތްތައް ހިންގުމަށް، ކައުންސިލުން އެއްބާރުލުން ދޭނެ ކަމަށް ރ. ވާދޫ ކައުންސިލްގެ ރައީސް ހުސައިން ޢަލީ ވިދާޅުވެއްޖެއެވެ.
ޢީދާ ގުޅިގެން، ރ. ވާދޫ ލައިވް އަށް ދެއްވި ހާއްސަ ބަސްދީގަތުމެއްގައި ހުސައިން ޢަލީ ވިދާޅުވީ، އެހެން އަހަރުތަކާއި އެއްގޮތަށް މި އަހަރު ޢީދު ކުޅިވަރުތައް ރަށު ފެންވަރުގައި ބޮޑުކޮށް ކުރިއަށް ގެންދެވެން ނެތް ކަމަށެވެ. ނަމަވެސް، ގައިދުރުކަމާއެކު މާސްކު އަޅައިގެން، އެޗްޕީއޭގެ އުސޫލުތަކާއި އެއް ގޮތަށް، ކުޅިވަރުތަކެއް ކުރިއަށް ގެންދެވިދާނެ ކަމަށް ދެކޭ ކަމަށް ހުސައިން ވިދާޅުވިއެވެ.
ކޮންމެ އީދެއްގައި ވެސް މައިގަނޑު ކުޅިވަރެއްގެ ގޮތުން ކުޅޭ ”ކޯޑި“ މި އަހަރު އޮންނާނެތޯ ސުވާލުކުރުމުން ހުސައިން ވިދާޅުވީ ”އެ ކަން އަދި އޮތީ ސުވާލު މާކެއްގެ ތެރޭގައި“ ކަމަށެވެ. ޢީދު ކުޅިވަރުގެ ކަންކަން ނިންމާނީ އަންހެނުންގެ ތަރައްގީއަށް މަސައްކަތް ކުރާ ކޮމެޓީން ކަށާއި ކޮމިޓީން އަދި ވަކި ގޮތެއް ނިންމާފައި ނުވާ ކަމަށް ހުސައިން ވިދާޅުވިއެވެ.
ކޯވިޑް-19ގެ ސަބަބުން ފުރަބަންދުގައި ދުވަސްތައް ހޭދަކުރަން ޖެހިފައި ތިބުމުން ގިނަ ބަޔަކަށް ވަނީ ނަފުސާނީ ފޮތުން އަސަރުކޮށްފައެވެ. ހުސައިން ވިދާޅުވީ، ޢީދަކީ އުފާފާޅުކޮށް ގުޅުންތައް ބަދަހިކުރަން ލިބޭ ފުރުޞަތަކަށް ވާތީ، ކުޅިވަރުތައް ކުރިއަށް ގެންދިއުމަށް ކޮމިޓީން ނިންމައިފި ނަމަ އެ ކަމަށް އެއްބާރުލުންދީ ކައުންސިލްގެ ފަރާތުން އެހީތެރިކަން ފޯރުކޮށްދޭނެ ކަމަށެވެ.
ހުސައިން ޢަލީ ވިދާޅުވީ، ޢީދު ކުޅިވަރު ކުޅުނު ނަމަވެސް، އުސޫލުތަކަށް ބޯލެނބުން މުހިންމު ކަމަށެވެ. އަދި އެ ކަމަށް ވަރަށް ބޮޑަށް ރަށު ރައީސް އިލްތިމާސްކުރެއްވިއެވެ.
މިއަހަރުގެ އަލްޙާ ޢިދު ދުވަހަކީ 20 ޖުލައި 2021 (މ.) ވާ އަންގާރަ ދުވަހެވެ. އަދި 19 ޖުލައި 2021 (މ.) ވާ ހޯމަ ދުވަހަކީ ހައްޖު ދުވަހެވެ.
