ރ. ވާދޫ ވާދޫ ހެލްތު ސެންޓަރަށް އިތުރުކުރެވޭ ބައިގެ މަސައްކަތް ބާރަށް ކުރިއަށް ދާ ކަމަށް ހާސާކޮށްފިއެވެ.
ރ. ވާދޫ ހެލްތު ސެންޓަރުގެ އޮފިޝަލަކު ވިދާޅުވީ، އެ މަސައްކަތް ބާރު ދުވެލީގައި ކުރިއަށްދާ ކަމަށާއި މިހާރު ފައުންޑޭޝަން އެޅުމުގެ މަސައްކަތް ނިމިފައިވާ ކަމަށެވެ. ދެން ކުރިއަ އޮތީ ތަނބު އެޅުމުގެ މަސައްކަތެވެ.
މި އިމާރާތުގެ މަސައްކަތަށް ބޭނުންވާ ސާމާނު ވާދުއަށް ގެނެސްފައި ވަނީ މިދިޔަ އޯގަސްޓް މަހުއެވެ. ބިން ސާފުކުރުމުގެ މަަސައްކަތް ފެށީ ވެސް އޯގަސްޓް މަހުއެވެ.
260,000 ދިވެހި ރުފިޔާ ބަޖެޓްކޮށްފައިވާ މި މަޝްރޫޢުގެ ދަށުން ރ. ވާދޫ ސިއްހީ މަރުކަޒުގައި ސްޓޯރ، ގަރާޖް އަދި ލޯންޑްރީ ހެދުން ކުރިއަށް ދާނެއެވެ.
މީގެ ކުރީގެ ސަރުކާރުތަކުން މާ ބޮޑު އަޅާލުމެއް ދީފައި ނުވާ ވާދޫ ހެލްތު ސެންޓަރަށް މި ސަރުކާރުން ދަނީ ގިނަ ކަންތައްތަކެއް ކޮށްދެމުންނެވެ. އެ ގޮތުން އެ ސެންޓަރުގައި ބަލި މީހުން އެޑްމިޓްކުރަން ބޭނުންކުރާ އެނދުތައް މި ސަރުކާރުން ވަނީ އިލެކްޓްރިކް އެނދަށް ބަދަލުކޮށްފައެވެ. އަދި މި ނޫނަސް މަރުކަޒަށް ބޭނުންވާ ޒަމާނީ އާލާތްތައް ސަރުކާރުން ދަނީ ފޯރުކޮށްދެމުންނެވެ.
ވާދޫ ހެލްތު ސެންޓަރަކީ ވަށާފާރު ނެތް ހަމައެކަނި ދައުލަތުގެ އިމާރާތެވެ. މި ކަން އެ ސެންޓަރުގެ ފަރާތުން ވަނީ ސަރުކާރުގެ ސަމާލުކަމަށް ގެނެސްފައެވެ. އެ ގޮތުން، ރައީސުލްޖުމްހޫރިއްޔާ އަށް މި މަޢުލޫމާތު ވަނީ އަރުވާފައެވެ.
ސަރުކާރުން ވާދޫގައި ކުރިއަށް ގެންދިއުމަށް ބަޖެޓްކޮށްފައިވާ އިތުރު މަޝްރޫޢުތައް:
6,856,470 – ރ. ވާދޫ ފެނާއި ނަރުދަމާ ނިޒާމް ގާއިމުކުރުން. (ކުރިއަށްދަނީ)
2,009,893 – ރ. ވާދޫގައި މިސްކިތް އިމާރާތްކުރުން. (ކުރިއަށްދަނީ)
1,600,000 – ރ. ވާދޫ ސްކޫލް 2 ބުރި އިމާރާތް. (ކުރެހުން ފައިނަލްކުރެވި، ބިޑްކުރުމަށް ތައްޔާރުވަނީ)
3,500,000 – ރ. ވާދޫގައި ފުޓްބޯޅަ ދަނޑު އެޅުން. (ރޭވިފައި)
1,000,000 – ރ. ވާދޫ ގޮނޑުދޮށް ހިމާޔަތްކުރުން. (ބިޑްކުރުމަށް ތައްޔާރުވަނި)
