ރ. ވާދޫގައި އަދުގެ ސަރުކާރުން އަލަށް ބިނާކުރަމުންދާ މިސްކިތުގެ ނަމަކަށް ”މަސްޖިދުލް އަލިކިލެގެފާނު“ގެ ނަމުން ނަން ދިނުމަށް ވާދޫ ކައުންސިލުން ނިންމައިފިއެވެ.
ވާދޫ ކައުންސިލުން މި ނަން ކިޔުމަށް ނިންމާފައިވަނީ އެ ކައުންސިލްގެ 38ވަނަ އާއްމު ޖަލްސާގައި ނެގުނު ވޯޓުން ފާސްކުރެވިގެންނެވެ.
މިކަމާއި ގުޅޭގޮތުން ބޭއްވި ބައްދަލުވުމުގެ ޔައުމިއްޔާ ވަނީ ކައުންސިލްގެ ނައިބް ރައީސް އަހުމަދު އަރުޝަދު އާންމު ކުރައްވާފައެވެ.
ޔައުމިއްޔާގައި ވާ ގޮތުން މި ބައްދަލުވުމުގައި ބައިވެރިވީ ކައުންސިލްގެ ރައީސް ހުސައިން ޢަލީ އާއި ނާއިބް ރައީސްގެ އިތުރުން ކައުންސިލްގެ އަންހެން މެންބަރު އައިޝަތު ނުހާއެވެ.
ކައުންސިލް މެންބަރު އާއިޝަތު ނުހާ ހުށައަޅާފައިވާ އެ ނަން މިސްކިތަށް ކިޔުމަށް ފާސްވެފައި ވަނީ ކައުންސިލްގެ ރައީސް ހުސައިން އަލީ އާއި ކައުންސިލް މެންބަރު އާއިޝަތު ނުހާގެ ވޯޓާއި އެކުއެވެ.
އެ ބައްދަލުވުމުގައި ކައުންސިލްގެ ނައިބް ރައީސް އަހުމަދު އަދުޝަދު ވެސް ވަނީ ނަމެއް ހުށައަޅުއްވާފައެވެ. އަރުޝަދު ހުށައަޅާފައިވާ ނަމަކީ ”މަސްޖިދުލް ތަޢުބާ“ މި ނަމެވެ.
ސަރުކާރުން އިމާރާތް ކުރަމުންދާ މި މިސްކިތައް ކައުންސިލުން ކިޔަން ނިންމާފައި ވާ ނަމަށް ސޯސަލް މީޑިއާގައި ބައެއް ފަރާތްތަކުން ދަނީ ހިތްހަމަ ނުޖެހުން ފާޅުކުރަމުންނެވެ.
ކައުންސިލުން މިހާރު ފާސްކޮށްފައިވާ ނަން ނިސްބަތް ވަނީ ވާދޫ ކައުންސިލްގެ ރައީސްގެ ކާފާފުޅު ޢަލީ ޔޫސުފަށެވެ.
ޚަބަރު ރިވިއުކުރީ: ޒިދާން މުޙައްމަދު
