މި އަހަރު ރ. ވާދޫ ސްކޫލުން އޯލެވެލް އިމްތިޙާން ހެދި އާމިނަތު ރަފާ ރައޫފް ގައުމީ ގަދަ ދިހައެއްގައި ހިމެނިއްޖެއެވެ.
ރ. ވާދޫ ލައިވް އަށް ކަށަވަރުވެފައިވާ ގޮތުގައި ރަފާ ގައުމީ ގަދަ ދިހައެއްގައި ހިމެނުނީ 5 އޭ ސްޓަރ އަދި 3 އޭގެ ނަތީޖާއަކުންނެވެ.
މިއީ ވާދޫ ސްކޫލްގެ ދަރިވަރަކު ގައުމީ ގަދަ ދިހައެއްގައި ހިމެނުން ފުރަތަމަ ފަހަރެވެ.
މަޢުލޫމާތު ލިބިފައިވާ ގޮތުގައި މި އަހަރު ވާދޫ ސްކޫލުން އޯލެވެލް ހެދި ބެޗްގެ ގިނަ ދަރިވަރުންތަކެއް ވަނީ އޭލެވެލް ހެދޭ މިންވަރަށް ފާސްވެފައެވެ.
މި އަހަރުގެ މެއިޖޫންގައި ކުރިއަށްގެންދިޔަ އޯލެވެލް އިމްތިޙާނުގެ ނަތީޖާ ދޫކުރަން ފަށާފައިވަނީ ބުރާސްފަތި ދުވަހުގެ މެންދުރު 12 ޖެހި އިރުގައެވެ. ފަސް ހާހަށްވުރެ ގިނަ ދަރިވަރުން ބައިވެރިވި މި އިމްތިޙާނުގެ ނަތީޖާ ކޮންމެ ދަރިވަރަކުވެސް އިމްތިޙާނުގައި ބައިވެރިވި މަރުކަޒަކުން ދޫކުރާނެކަމަށް ޑިޕާޓްމަންޓް އޮފް ޕަބްލިކް އެގްޒެމިނޭޝަނުން ބުނެއެވެ. އަދި އަންނަ ސެޕްޓެމްބަރު މަހުގެ 21ގެ ކުރިން ޕޭޕަރުތައް ޗެކްކުރަން ބޭނުންވާ ދަރިވަރުންނަށް އެފުރުސަތު އޮންނާނެކަމަށް އެޑިޕާޓްމަންޓުން ބުނެއެވެ.
މިއަހަރުގެ ކެމްބްރިޖް އޯލެވެލް، އައި.ޖީ.ސީ.އެސް.އީ އިމްތިޙާން ހެދުމަށްޓަކައި މުޅިއެކު 236 މަރުކަޒަކުން 5936 ދަރިވަރުން ބައިވެރިވެފައިވެއެވެ.
އެސް.އެސް.ސީ އިމްތިޙާނު ހެދުމަށްޓަކައި 233 މަރުކަޒަކުން 5640 ދަރިވަރުން ވަނީ މިއަހަރު ބައިވެރިވެފައެވެ.
ރ. ވާދޫ ސްކޫލުން ޖުމުލަ 11 ދަރިވަރުން ވަނީ މިއަހަރުގެ ކެމްބްރިޖް އޯލެވެލް، އައި.ޖީ.ސީ.އެސް.އީ އިމްތިޙާންގައި ބައިވެރިވެފައެވެ.
