މިކަމާއި ގުޅިގެން ވާދޫ ސްކޫލުން ނެރުނު ބަޔާނެއްގައި ބުނީ ވާދޫގެ ދަރިންނަށް ތަޢުލީމު ފޯރުކޮށްދިނުމަށްޓަކައި 37 އަހަރަށްވުރެ ދިގު މުއްދަތެއްގައި މުދައްރިއްސެއްގެ ގޮތުގައި އަޙްމަދު ދާއޫދު، ތެދުވެރިކަމާއި އިޚްލާސްތެރިކަމާއެކު ކޮށްދެއްވި އަގު ހުރި ބުރަ މަސައްކަތް އެ ސްކޫލުން ފާހަގަ ކުރަނީ ނުހަނު އިޚްލާސްތެރިކަމާއި އެކުގައި ކަމަށެވެ.

އަދި ބޮޑު ސާރ ކޮށްދެއްވި އަގުހުރި ޚިދުމަތްތަކާއި އެކު މިއަދު ރިޓަޔާ ކުރައްވާ ވަޑައިގެންނެވީ އެ ސްކޫލުގެ ހުރިހާ ދަރިވަރުންނާއި ބެލެނިވެރިން އަދި އެކުގައި މަސައްކަތްކުރެއްވި ހުރިހާ މުދައްރިސުންނާއި މުވައްޒަފުންގެ ފުރިހަމަ ލޯތްބާއި އިހްތިރާމާ އެކުގައިކަން ސްކޫލުން ފާހަގަކުރިއެވެ.

ވާދޫ ސްކޫލްގެ ބަޔާނުގައި އިތުރަށް ވަނީ ބޮޑު ސާރގެ އަގުހުރި ޚިދުމަތްތަކަށް އެ ސްކޫލު ފަޚުރުވެރިވާ ހިނދު، ކުރިމަގުގައިވެސް ކާމިޔާބީއާއި ފަލާޙް މިންވަރުކުރެއްވުން އެދި ދުޢާކުރާ ކަމަށް ބުނެފައެވެ.

އަޙްމަދު ދާއޫދު ވަނީ 37 އަހަރާއި 8 މަހާއި 8 ދުވަސް ވަންދެން ޚިދުމަތްކުރައްވާފައެވެ.

ބޮޑު ސާރއަކީ ވާދޫ ސްކޫލްގައި މިހާތަނަށް އެންމެ ގިނަ ދުވަސް ވަންދެން ޚިދުމަތްކުރެއްވި އެއް މުދައްރިސެވެ.