ރ. ވާދޫ ސްކޫލްގެ އައު އިމާރާތުގެ އަމަލީ މަސައްކަތް ނިމުނު ކަމަށް ސަރުކާރުން ބުނެފިއެވެ.
ސަރުކާރުން ހިންގާ މަޝްރޫޢުތަކުގެ އަދާހަމަތައް އާންމުކުރުމަށް އުފައްދާފައިވާ ވެބް ޕޯޓަލް އައިލްސްގައި އެންމެ ފަހުން އާންމުކޮށްފައިވާ މައުލޫމާތުތަކަށް ބަލާއިރު، ރ.ވާދޫ ސްކޫލް 2 ބުރި އިމާރާތުގެ 22 ޖުލައި 2022 ލިޔެފައި ވެއެވެ. ނަަމަވެސް މި މަޝްރޫއަކީ އަދިވެސް ހިނގަމުންދާ މަޝްރޫއެކެވެ. މަޝްރޫޢުގެ ޢަމަލީ މަސައްކަތް ނިމެން އަދި ގާތް ވެސް ނުވެއެވެ.
އައިލްސްގައި މަޝްރޫޢުތަކުގެ އަދާހަމަތައް ޢާންމުކުރަނީ އެ މަޝްރޫޢެއް ހިންގާ ވުޒާރާއެކެވެ. ސްކޫލްތަކުގައި ހިންގާ މި ފަދަ މަޝްރޫޢުތަކުގެ ބެލެނިވެރި ފަރާތަކީ މިނިސްޓްރީ އޮފް އެޑިޔުކޭޝަނަށް ވާއިރު، 18 އޮކްޓޫބަރު 2022ގައި އާންމުކޮށްފައިވާ ސައްހަ ނޫން މި މަޢުލޫމާތަކީ މިނިސްޓްރީ އޮފް އެޑިޔުކޭޝަން (އަތޮޅުތެރޭ ސްކޫލް އިމާރާތް ކުރުން) އިން އާންމުކުރި މަޢުލޫމާތެކެވެ.
މި ނޫނަސް ވަރަށް ގިނަ ސައްހަ ނޫން މައުލޫމާތުތައް އައިލްސް ޕޯޓަލްގައި ހުރިކަން ފާހަގަކުރެވެއެވެ. އޭގެ ތެރޭގައި އެކިއެކި ރަށްރަށުގައި އެކި ވުޒާރާތަކުން ހިންގާ މަޝްރޫޢުތައް ހިމެނެއެވެ.
ވާދޫ ސްކޫލްގެ އައު އިމާރާތް ހެދުމުގެ މި މަޝްރޫއަކީ ސަރުކާރުގެ ބަޖެޓުން ޚަރަދުކުރާ މަޝްރޫޢެކެވެ. މި މަޝްރޫޢަށް 2021ގެ ބަޖެޓްގައި 1,600,000.00 ރުފިޔާ އަދި 2022ގެ ބަޖެޓްގައި 6,000,000.00 ރުފިޔާ ހިމަނާފައި ވެއެވެ.
ދިވެހި ސަރުކާރުން، ރ. ވާދޫގައި 7 މަޝްރޫޢެއް ކުރިއަށް ގެންދިއުމަށް ބަޖެޓްކޮށްފައިވެއެވެ.
މި މަޝްރޫޢުތަކުގެ އިތުރަށް ސަރުކާރު ހިއްސާވާ ކުންފުންޏެއް ކަމަށް ވާ ފެނަކަ ކޯޕަރޭޝަނުން ދަނީ ވާދޫގައި އައު އިންޖީނު ގެއަކާއި، އޮފީސް އިމާރާތެއްގައި މަސައްކަތް ކުރަމުންނެވެ.
