ކުރީގެ ރައީސް މައުމޫން އަބްދުލް ޤައްޔޫމްގެ ސަރުކާރުން ވާދޫގައި ބަނދަރެއް ތަރައްޤީކޮށްދިންތާ، ފަނަރަ އަހަރު ފަހުން ސަރުކާރުން ވާދޫ ބަނދަރު އަޕްގްރޭޑްކުރަން ނިންމައިފިއެވެ.

ރައީސް އިބްރާހިމް މުހައްމަދު ޞާލިޙްގެ ސަރުކާރުން ރާއްޖޭގައި ހިންގާ މަޝްރޫއުތަކުގެ އެންމެ ފަހުގެ ތަފުސީލްތައް ގެނެސްދޭ ”އައިލްސް“ގައި ވާ ގޮތުން، މިނިސްޓްރީ އޮފް ނެޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ ހިންގާ މި މަޝްރޫއު މި ހިނގާ 2023 ވަނަ އަހަރުގެ ތެރޭގައި ފަށާނެއެެވެ. ނަމަވެސް، މަޝްރޫއު ފަށާނެ ސީދާ ވަކި ތާރީޚެއް ހާމަކޮށްފައެއް ނުވެއެެވެ.

މި މަޝްރޫއަށް 2023ގެ ބަޖެޓްގައި 3,697,911.00 ރުފިޔާ ވަނީ ހިމަނާފައެވެ.

ވާދޫއަށް ދިމާވެފައި އޮތް ލަފާފުރުމުގެ ދަތިކަމަށް ހައްލު ގެނެސްދިނުމަށް ބަނދަރު ތަރައްގީކުރުމުގެ މަޝްރޫއު ފަށާފައި ވަނީ ރައީސް މައުމޫންގެ ޒައާމަތުގައެވެ. މަޝްރޫއުގެ ނުނިމި އޮތް ބައި ކުރިއަށް ގެންދިޔައީ ރައީސް މުހައްމަދު ނަޝީދުގެ ވެރިކަމުގައެވެ.

ވާދޫގެ އިރުމަތީ ބިތުގައި ތަރައްގީކޮށްފައިވާ ބަނދަރަށް ވާދޫ ކައުންސިލުން ވަނީ ބަދަލުތަކެއް ގެނެސްފައެވެ. މިގޮތުން 2015 ވަނަ އަހަރު ރަށު ކައުންސިލުން އިސްނަގައިގެން
ބަނދަރު ސަރަހައްދުގައި ގާ އަތުރާ ލައިޓް ޖަހާ ސައުވީސް ގަޑިއިރު ބޭނުންކުރެވޭ ގޮތް ހަދާފައި ވެއެވެ. ބަނދަރުގައި ގައު އެތުރުމުގެ އިތުރުން މީހުންނަށް
މަޑުކޮށްލައިގެން ތިބެވޭނެހެން ދެ ތަނެއްވެސް ވަނީ ހަދާފައެވެ.

ވާދޫ ކައުންސިލުން މި މަސައްކަތްކޮށްފައި ވަނީ އެކި ފަރާތްތަކުން އެހީ ހޯދައިގެން ތަކެތި ޖަމާކުރުމަށްފަހު އަމިއްލަޔަށް މަސައްކަތްކޮށްގެންނެވެ.