ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙް، ރ. ވާދޫގެ ތަރައްޤީގެ ބައެއް މަޝްރޫޢުތަކުގެ ނިމުން ފާހަގަކޮށްދެއްވައިފިއެވެ. ރައީސުލްޖުމްހޫރިއްޔާ މި މަޝްރޫޢުތަކުގެ ނިމުން ފާހަގަކޮށްދެއްވީ އެމަނިކުފާނު 5 ސެޕްޓެންބަރު 2023 ގައި ވާދުއަށް ވަޑައިގެންނެވެ.
މިއީ އެމަނިކުފާނުގެ މިދައުރުގެ ތެރޭގައި މިރަށަށް ވަޑައިގެން ދެވަނަ ފަހަރެވެ. އަދި ތާރީޚުގައި ރައީސަކު އެއް ދައުރުގެ ތެރޭގައި ވާދޫއަށް ދެ ޒިޔާރަތެއްކުރެއްވި މިއީ ފުރަތަމަ ފަހަރެވެ.
ރައީސުލްޖުމްހޫރިއްޔާ ވާދުއަށް ވަޑައިގެން ވާދޫ އިންޖީނުގެއާ ފެނަކަ އޮފީސް އަދި ޞިއްޙީ މަރުކަޒަށް އަލަށް އިތުރުކުރި އިމާރާތް ހުޅުއްވައިދެއްވިއެވެ.
ރައީސުލްޖުމްހޫރިއްޔާ ހުޅުއްވައިދެއްވި ވާދޫ އިންޖީނުގެ އަދި ފެނަކަ އޮފީސް، އިމާރާތްކޮށްފައި ވަނީ ރަށުގެ މީހުން ދިރިއުޅޭ ސަރަހައްދާ ދުރުގައި، ކުރިޔަށްވުރެ ޖާގަ ތަނަވަސް އަދި ބޭނުންވާ އިތުރު ވަޞީލަތްތަކާ އެކުގައެވެ. ކުރީގެ އިންޖީނުގޭގެ ކެޕޭސިޓީއަކީ 528 ކިލޯވޮޓް ކަމުގައި ވީނަމަވެސް އައު އިންޖީނުގެއާއެކު އިންޖީނުގޭގެ ކެޕޭސިޓީ ވަނީ 800 ކިލޯވޮޓަށް އިތުރުކުރެވިފައެވެ.
ރައީސުލްޖުމްހޫރިއްޔާ ހުޅުއްވައިދެއްވި ވާދޫ ޞިއްޙީ މަރުކަޒަށް އިތުރުކުރި އިމާރާތުގެ މަސައްކަތް ކޮށްފައި ވަނީ ކްލޭ އެލް.އެލް.ޕީ އާ ހަވާލުކޮށްގެންނެވެ. މި \އިމާރާތުގައި ކޮންފަރެންސް ހޯލް، އިދާރީ އޮފީސް، ޖެނެރަލް ސްޓޯރ މެޑިކަލް ސްޓޯރ، އޮފީސް ސްޓޯރ، ގަރާޖު ހިމެނެއެވެ.
އަތޮޅުތަކުގެ ރަށްރަށުގައި އަސާސީ ޚިދުމަތްތައް ޤާއިމްކޮށް، ރައްޔިތުންގެ ދިރިއުޅުމުގެ ފެންވަރު މަތިކުރުމަށްޓަކައި، ސަރުކާރުން ވަނީ، އަތޮޅުތަކުގެ ރަށްރަށުގައި ޢުމުރާނީ ތަރައްޤީގެ ވަރަށް ގިނަ މަޝްރޫޢުތައް ހިންގާފައެވެ.
މިސަރުކާރުން ވާދޫގައި އިމާރާތްކުރި އައު ހުކުރު މިސްކިތް މީގެ ކުރިން އިސްލާމިކް މިނިސްޓަރ ޑރ. އަހުމަދު ޒާހިރު އަލީ ވާދުއަށް ވަޑައިގެންވަނީ ހުޅުވައިދެއްވާފައެވެ.
މިއީ ވާދޫގައި މިހާތަނަށް އެންމެ ގިނަ މަޝްރޫއުތައް ހިންގި އަދި ހިންގަމުންދާ ސަރުކާރެވެ.
