ރ. އުނގޫފާރުގައި މިއަދު ނިމިގެންދިޔަ ރ. އަތޮޅު ކައުންސިލްގެ ހޭންޑްބޯލް މުބާރާތް 2023 އިން އެންމެ ގަދަޔަށް ވިދާލި ތަރިއަކީ އަނގޮޅިތީމު ހޭންޑްބޯލް ޓީމުގެ ޖާޒީ ނަންބަރު 9 ފާޠިމަތު ރިޝްމާއެވެ. ކުއީން އޮފް ދަ ޓޯނަމަންޓްގެ އިތުރުން އޭނާއަށް ވަނީ މިމުބާރާތުގައި އެންމެ ގިނަ ގޯލްޖެހި ކުޅުންތެރިޔާގެ ޝަރަފު ލިބިފައެވެ.

ރިޝްމާ ފާހަގަކުރެވުނީ ކުޅުނު ހުރިހާ މެޗެއްގެ ވެސް ”ރާނީ“ގެ ގޮތުގައެވެ. ދެއްކީ ފިސާރި މޮޅު ކުޅުމެކެވެ. އެއްވެސް މެޗަކުން ބަލިނުވެ އަނގޮޅިތީމު ޓީމު ފައިނަލަށް ގޮސް، އަތޮޅު ތަށި އުފުލާލުމުގައި އެންމެ ބޮޑު ދައުރެއް އަދާކުރި އެކަކީ އޭނައެވެ. ޓީމުގެ ކެޕްޓަނެއްގެ ފަރާތުން ފެންނަން ޖެހޭ ލީޑަރޝިޕާއި އަޚްލާޤްވެސް ރިޝްމާގެ ކިބައިން ފެނިގެންދިޔައެވެ.

އުމުރުން އެންމެ 24 އަހަރުގެ ޒުވާން ރިޝްމާ ރ. ވާދޫ ލައިވް އަށް ކިޔައިދިން ގޮތުގައި އެންމެ ފުރަތަމަ ހޭންޑްބޯލް ކުޅެންފެށީ ސްކޫލް ދައުރު ނިންމާލުމަށްފަހު އަވަށްޓެރި ލަންކާއަށް ގޮސް މަތީ ތައުލީމް ހާސިލުކުރަމުންދިޔައިރުއެވެ. ޕްރައިމަރީ ޓީޗިން ކޯހެއް ފުރިހަމަކުރަން އުމުރުން 16-17 އަހަރުގައި ލަންކާގައި ހުރިއިރު އޭނާ ހޭންޑްބޯޅައިގެ ތެރެއަށް ވަނީ ދިވެހީންތަކެއް ގުޅިގެން ހަދާފައިވާ ”ސްކައިހޯކްސް“ ކިޔާ ޓީމަކުން ލިބުނު ފުރުސަތެއްގައެވެ.

އެހާ ހަގު އުމުރުގައިވެސް އޭނާވަނީ ހުނަރު ދައްކާލާފައެވެ. އެޓީމާއެކު އޭނާ ކުޅުނު ފުރަތަމަ މުބާރާތުގައިވެސް ޗެމްޕިއަންކަން ހޯދިއެވެ.

އަނގޮޅިތީމު ވައިޖެހޭގެއަށް ނިސްބަތްވާ ރިޝްމާ މިހާރު އަންނަނީ ގައުމީ ޔުނިވާސިޓީން މަތީ ތައުލީމު ހާސިލުކުރަމުންނެވެ. ލަންކާގައި އުޅެފައި މާލެއަށް އައިސް އޭނާވަނީ އޭ.އޭ.އައި ސްޕޯޓްސް ކުލަބަށް ކުޅެދީފައެވެ. އޭގެ ފަހުން ކީންސް ބައި ރެޑްހޯކްސްއާ ގުޅި މިހާރު އޭނާ ކުޅެނީ އެޓީމަށެވެ.

ފާހަގަކޮށްލަންޖެހޭ ގޮތުގައި މިއަހަރު އޮތް ހަވަނަ ހޭންޑްބޯލް މޯލްޑިވްސް ޗެމްޕިއަންޝިޕްގައި ރިޝްމާ ކީންސްއަށް ކުޅުނުއިރު އެ މުބާރާތުން ރަނަރ-އަޕް ޓީމަކަށް ހޮވުނީ އެ ޓީމެވެ. އަދި ރިޝްމާވަނީ މުބާރާތުގެ ގަދަ ހަތް ކުޅުންތެރިންގެ ތެރޭގައި ހިމެނިފައެވެ.

މީގެ އިތުރުން ރިޝްމާ ފާހަގަކުރެވެނީ ކޮލެޖް މުބާރާތްތަކުގައިވެސް ހުނަރުން ފުރިގެންވާ ކުޅުމެއް ދައްކަމުން އަންނަ ޒުވާނެއްގެ ގޮތުގައެވެ. މިއަހަރު އޮތް ކޮލެޖް މުބާރާތުގައިވެސް ރިޝްމާވަނީ ގަދަ ހަތެއްގައި ހިމެނިފައެވެ.

ކޮންމެއަކަސް ރިޝްމާއަކީ އާދައިގެ ކުޅުންތެރިޔެއް ނޫނެވެ. އަނގޮޅިތީމުން ވިދާލި މިއަލިގަދަ ތަރި ވިދާ ބެބުޅުމުގެ އެއް ސަބަބު ކަމަށް އޭނާ ފާހަގަކުރަނީ ސަޕޯޓަރުންދޭ ހިތްވަރެވެ. ރ. އަތޮޅު ކައުންސިލްގެ ފުރަތަމަ ހޭންޑްބޯލް މުބާރާތުގައި އަނގޮޅިތީމު ސަޕޯޓަރުން ދިން ހިތްވަރު ފާހަގަކޮށް ރިޝްމާވަނީ އެ މީހުންނަށް ހައްގު ޝުކުރު އަދާކޮށްފައެވެ.

ރިޝްމާ ބުނި ގޮތުގައި، ރ. އަތޮޅު ކައުންސިލުން އިންތިޒާމްކުރި މިމުބާރާތަކީ އަތޮޅުގެ ރަށްރަށުގެ ހުނަރުވެރިންގެ ހުނަރު ވަޒަންކޮށްލަން ލިބުނު ފުރުސަތެކެވެ. ރިޝްމާ ފާހަގަކުރި ގޮތުގައި މިމުބާރާތް އިންތިޒާމްކޮށްފައިވަނީ ވަރަށް ފުރިހަމަކޮށެވެ.