21 ޑިސެމްބަރު 2023 – އެޑިޓަރުގެ ނޯޓު: ރ. ވާދޫ، ވިންޑްސްޓަރ، މަރިޔަމް ސާނިޔާ (މަރީ) ވަނީ މިއަދުގެ ވަގުތެއްގައި ދެމިއޮތުމުގެ އާލަމަށް ދަތުރުކޮށްފައެވެ.
ރ. ވާދޫ، ވިންޑްސްޓަރ، މަރިޔަމް ސާނިޔާ (މަރީ)އެވެ.
އޭނާއަކީ ފުއްޕާމެއަށްޖެހޭ ބައްޔެއް ކަމަށްވާ ނިމޯނިއާގެ ޝިކާރަަކަށްވެ ހޮސްޕިޓަލުގައި އެނދުމަތިކޮށްފައިވާ ނިމޯނިއާ ޕޭޝަންޓެކެވެ.
ނިމޯނިއާގެ އިތުރުން، އެކިއުޓް ރެސްޕިރޭޓަރީ ޑިސްޓްރެސް ސިންޑްރޯމް (އޭއާރްޑީއެސް) އަދި ސްކެމިކް މަޔޯކާޑިކަލް ބައްޔަށް ހުށަހެޅި ހާލު ދެރަވެގެން އޭނާއަށް ފަރުވާދެމުން އަންނަނީ ހުޅުމާލޭގައި ހުންނަ ޓްރީ ޓޮޕް ހޮސްޕިޓަލުގައެވެ. 2023، ސެޕްޓެމްބަރުމަހުގެ 19 ވަނަ ދުވަހުން ފެށިގެން މަަރީ ނޭވާލަމުން އަންނަނީ ވެންޓިލޭޓަރުގެ އެހީގައެވެ.
މިބަލިތަކަށް ފަރުވާކުރުމަށް ކުރަންޖެހޭ ހޭދައިގެ އިތުރުން، ހޮސްޕިޓަލުގެ އެހެނިހެން ބިލްތަކަށް ކުރަންޖެހޭ ހޭދަ ބޮޑެވެ. މިވަރުގެ ބޮޑު ޚަރަދުތަކެއް ކުރުމަށް އެކަށިގެންވާ ތަނަވަސްކަމެއް އޭނާގެ އާއިލާގެ ނެތެވެ. އެހެންކަމުން، އެއާއިލާއިން އެދެނީ ތިޔަ އެންމެ ފަރާތްތަކުގެ ދީލަތި އެހީއަށެވެ. ކިތަންމެ ކުޑަ ނަމަވެސް ޞަދަޤާތަކަށެވެ.
އެހީތެރިކަން ފޯރުކޮށްދޭން ހަދަންވީ ކިހިނެތް؟
މަރީގެ ބޭސްފަރުވާއަށް ބޭނުންވާ މާލީ އެހީތެރިކަން އާއިލާއަށް ފޯރުކޮށްދޭން ބޭނުންވާ ނަމަ، އެ ފަރާތްތަކަށް އެ ފުރުސަތުވަނީ ހުޅުވާލާފައެވެ. އޭނާގެ ފިރިމީހާ ޢަލީ ފަޔާޟްގެ ބޭންކު އޮފް މޯލްޑިވްސް އެކައުންޓަށް ފައިސާ ޖަމާކުރެވޭނެއެވެ.
ބީއެމްއެލް ރުފިޔާ އެކައުންޓް: 7730000265296
ބީއެމްއެލް ޑޮލަރު އެކައުންޓް: 7730000519263
މަރީގެ ސިއްޙަތާ ގުޅޭ އެއްވެސް ސުވާލެއް އޮތް ނަމަ 7990697 (ޢަލީ ފަޔާޟް) އާ ގުޅުމަށް އާއިލާއިން އެދެއެވެ.
އެކަކު އަނެކަކަށް އެހީތެރިވުމަށް ނަބަވީ އިރުޝާދު
މާތް ނަބިއްޔާ މުޙައްމަދު ޞައްލަﷲ ޢަލައިހި ވަސައްލަމް ޙަދީޘްކުރެއްވި ބަސްފުޅެއްގެ މާނައިގައި ވެއެވެ.
”އަދި އެމީހެއްގެ އަޚާގެ ކިބައިން ދުނިޔެ މަތީގައި ދަތިކަމެއް ފިލުވައިދީފި މީހަކަށް، އެ މީހަކަށް ޤިޔާމަތް ދުވަހު ޖެހޭ މުޞީބާތް ތަކުގެ ތެރެއިން މުޞީބާތެއް ﷲ ފިލުއްވައި ދެއްވާހުއްޓެވެ. އަދި އުނދަގުލެއް ޖެހިފައިވާ މީހާއަށް ފަސޭހަ ކޮށްދީފި މީހަކަށް، ﷲ އެމީހަކަށް ދުނިޔެމަތީގައްޔާއި އާޚިރަތުގައި ފަސޭހަ ކޮށްދެއްވާނެއެވެ. އަދި ހަމަކަށަވަރުން އެމީހެއްގެ އަޚާއަށް އެހީވުމުގެ މަތީގައި ހުންނަ މީހާއަށް އެހީތެރިވެވޮޑިގަތުން މަތީގައި ﷲ ވޮޑިގެންވެއެވެ.“
މާތް ﷲއަށް ޓަކައި ކުރާ އެއްވެސް ހޭދައަކީ ގެއްލިގެންދާނެ އެއްޗެއް ނޫނެވެ. ދެ ދުނިޔޭގައި ވެސް މަތިވެރި ވެގެންވާ ސަވާބާއި ދަރުމައާއި ލުއިފަސޭހަކަން ލިބިގެންދާ ތަން ދެކޭނެތެވެ.
ނިއުމޯނިއާ އަކީ ކޮބާ؟
ނިއުމޯނިއާ އަކީ ފުއްޕާމޭގެ އިންފެކްޝަންއަށް ކިޔާ އާންމު ނަމެކެވެ. އެހެނީ އެއީ ފުއްޕާމެއަށް ކޮންމެވެސް ގޮތަކުން ޖަރާސީމް ދަތުރުކޮށް ފުއްޕާމޭގައި އަރިދަފުސް ހިފުމަށް މެދުވެރި ކުރުވާ ބައްޔެކެވެ. މީގެ ސަބަބުން ކެއްސުމާއެކު އަރިދަފުސް އައުމަށާއި ނޭވާލުމަށް އުނދަގޫވެ އަދި ހުން އައުން ފަދަ އުނދަގޫތައް މެދުވެރި ކުރުވަ އެވެ.
ނިއުމޯނިއާ އެންމެ އާންމުކޮށް ޖެހެނީ އަހަރުމެން ނޭވާ ލާ ވައިގައި ހުންނަ ބެކްޓީރިއާ ނުވަތަ ވައިރަހެއްގެ ސަބަބުންނެވެ. އާންްމުކޮށް އަހަރުމެންގެ ދިފާއީ ނިޒާމަށް މި ޖަރާސީމްތައް އަހަރުމެންގެ ހަށިގަނޑަށް، ހާއްސަކޮށް ފުއްޕާމެއާ ހަމައަށް ދިޔަ ނުދިނުމުގެ ކުޅަދާނަކަން ލިބިފައިވެ އެވެ. ނަމަވެސް ބައެއް ހާލަތްތަކުގައި ދިފާއީ ނިޒާމާ ހަނގުރާމަކޮށް މި ޖަރާސީމްތައް ފުއްޕާމެއާ ހަމައަށް ފޯރާ، އިންފެކްޓް ވުމަށް މެދުވެރި ކުރުވަ އެވެ.
ނިއުމޯނިއާގެ އަލާމާތްތައް
ބައެއް ހާލަތްތަކުގައި ނިއުމޯނިއާ އަކީ ފަސޭހައިން ފަރުވާ ކުރެވޭ އެހާ ސީރިއަސް ބައްޔެއް ނޫން ކަމުގައި ވީނަމަވެސް އަނެއްބައި ހާލަތްތަކުގައި މިއީ ފުރާނައަށް ނުރައްކާ ކުރަނިވި ބައްޔެކެވެ. ބަލީގެ ނުރައްކާތެރިކަން ބިނާވަނީ ބަލި ޖެހުމަށް މެދުވެރި ކުރުވި ޖަރާސީމުގެ ބާވަތާއި، ބަލި މީހާގެ ސިއްހީ ހާލަތަށާއި އުމުރު ފަދަ ކަންކަމުގެ މައްޗަށެވެ. ވީމާ ބަލީގެ އަލާމާތްތައް ވެސް ބިނާވާނީ ހަމަ މި ކަންކަމުގެ މައްޗަށެވެ. އެހެނީ އުމުރުން ދުވަސްވީ މީހުންނާއި ކުޑަ ކުދިން އަދި ކޮންމެވެސް އެހެނިހެން ބައްޔެއްގެ ސަބަބުން ދިފާއީ ނިޒާމު ބަލިކަށިވެފައިވާ ފަރާތްތަކަށް ނިއުމޯނިއާ އަކީ ފުރާނައަށް ނުރައްކާ ކުރުވަނިވި ބައްޔަކަށް ވުމުގެ ފުރުސަތުތައް ވަރަށް ބޮޑެވެ.
ނިއުމޯނިއާގެ އާންމު އަލާމާތްތައް:
- ކެއްސުމާއެކު އަރިދަފުސް އައުން
- ނޭވާލާއިރު ނުވަތަ ކެއްސާއިރު މެއަށް ތަދުވުން
- ވަރުބަލިވުން
- ނޭވާލުމަށް އުނދަގޫވުން/ ނޭވާކުރުވުން
- ހުންއައުން، ތުރުތުރު އެޅުމާއި ހީކެރުވުން، ދާހިތްލުން
- ހޮޑުލެވުން
- ބޭރަށް ހިންގުން
ކުރިންވެސް ފާހަގަކޮށްލެވުނު ފަދައިން ބައެއް ހާލަތްތަކުގައި މިއީ ފުރާނައަށް ނުރައްކާ ކުރުވަނިވި ބައްޔަކަށް ވެދާނެތީ މަތީގައި ބަޔާން ކުރެވިފައިވާ އަލާމާތްތަކުގެ ތެރެއިން އެއްވެސް ކަމެއް ފެނިއްޖެ ނަމަ ލަސްނުކޮށް ޑޮކްޓަރަކަށް ދައްކަން ވާނެއެވެ.
21 ޑިސެމްބަރު 2023 – އެޑިޓަރުގެ ނޯޓު: ރ. ވާދޫ، ވިންޑްސްޓަރ، މަރިޔަމް ސާނިޔާ (މަރީ) ވަނީ މިއަދުގެ ވަގުތެއްގައި ދެމިއޮތުމުގެ އާލަމަށް ދަތުރުކޮށްފައެވެ.
