މައި ކޮލެޖް ސްޓޫޑެންޓް އެސޯސިއޭޝަން (މިކްސާ)ގެ ކުރީގެ އިސްވާރުންނާ މިއާންޒް ގުރޫޕްގެ ޗެއާމަން އަދި މިއާންޒް އިންޓަނޭޝަނަލް ކޮލެޖް (މައި ކޮލެޖް)ގެ ބާނީ އަޙުމަދު މުއްތަކީ ބައްދަލުކުރައްވައިފިއެވެ.
”އަލުމުނި ގެޓްޓުގެދަރ – ޑިނަރ ނައިޓް ވިތު ޗެއާމަން“ގެ ނަމުގައި ރޭގަނޑުގެ ކެޔުމަކާއެކު މިބައްދަލުވުން އޮތީ ބުދަ ދުވަހުގެރޭ މައި ކޮލެޖް މާލޭގައި ހުންނަ މައި ކެމްޕަހުގައެވެ.
ޗެއާމަން މުއްތަކީގެ ދައުވަތަކަށް މައި ކޮލެޖް ސްޓޫޑެންޓް އެސޯސިއޭޝަން އުފެދުނީއްސުރެ މިހާތަނަށް އައިއިރު އެކި ދައުރުތަކުގައި އިސްވާރުންގެ ގޮތުގައި ހަރަކާތްތެރިވި ދަރިވަރުންވަނީ މިބައްދަލުވުމުގައި ބައިވެރިވެފައެވެ. މިއީ މިފަދަ ގޮތަކަށް މިކްސާގެ އެކި ދައުރުތަކުގެ އިސްވާރުން އެއްތަންވި ފުރަތަމަ ފަހަރެވެ.
މިބައްދަލުވުމުގައި ރެކްޓާ ލަމްޔާ އަބްދުލް ހާދީއާއި އެކޮލެޖްގެ ބައެއް އިސްވެރިންނާއި މުވައްޒަފުންވެސް ވަނީ ބައިވެރިވެފައެވެ.
މި ޑިނާ ނައިޓްގައި އިސްވާރުންވަނީ މައި ކޮލެޖްގެ ދަރިވަރުންގެ ގުޅުން އިތުރަށް ހަރުދަނާ ކުރެވިދާނެ ގޮތްތަކާ ގުޅޭގޮތުން މެނޭޖްމަންޓާއެކު މަޝްވަރާކޮށްފައެވެ.
އަދި އެ މީހުންގެ ދައުރުތަކުގައި އެ އެސޯސިއޭޝަނުން ކޮށްފައިވާ ތަޖުރިބާތައްވަނީ ހިއްސާކޮށްފައެވެ. މީގެ އިތުރުން ކުރިއަށް އޮތް ތަނުގައި މިކްސާގެ އެލުމުނި އަދި މިކްސާ ގުޅިގެން ކުރެވިދާނެ ކަންކަމާ ގުޅޭގޮތުންވެސް ވަނީ ޚިޔާލުބަދަލުކޮށްފައެވެ.
މިކްސާއަކީ ޕްރައިވެޓް ކޮލެޖްތަކުން އެންމެ ހަރަކާތްތެރި ކަމަށް ފާހަގަކޮށްލެވޭ ދަރިވަރުންގެ ގުޅުމެވެ. މިކްސާއިން ދަރިވަރުންނާ ގުޅުންހުރި އެކިއެކި މުބާރާތްތަކާއި ހަރަކާތްތަކުގެ އިތުރުން ދަތުރުތައް ރާވައި ހިންގައެވެ.
މިކްސާގެ ކުރީގެ އިސްވާރުންގެ ތެރެއިން އެ އެސޯސިއޭޝަންގެ 2018 ވަނަ އަހަރުގެ ރައީސް ޒިދާން މުޙައްމަދު ނިސްބަތްވަނީ ރ، ވާދޫއަށެވެ.
