މާލޮސްމަޑުލު އުތުރުބުރީ އަތޮޅު ކައުންސިލުން، ކޮންމެ އަހަރަކު އެއް ފަހަރު، ސިލްސިލާކޮށް ބާއްވާ، ރ. އަތޮޅު ފުޓްސަލް ޗެލެންޖުގެ މިއަހަރުގެ މުބާރާތުގައި، އުނދަގޫ މޮޅަކުން، ފަހުގެ ޗެމްޕިއަން ރ. ދުވާފަރު ފައިނަލަށް ދަތުރުކޮށްފިއެވެ.
މި މުބާރާތުގެ ސެމީ ފައިނަލަށް ދަތުރުކުރި ޓީމުތަކަކީ ރ. އިނގުރައިދޫ ފުޓުބޯޅަ ޓީމު، ރ. ރަސްމާދޫ ސްޕޯޓްސް ކްލަބު، ރ. ދުވާފަރު ސްޕޯޓްސް ކްލަބު އަދި ރ. އަލިފުށި ރިކްރިއޭޝަން ކުލަބެވެ.
ރ. އިންނަމާދޫ ފުޓްސަލް ދަނދުގައި ސެމީގެ ދެވަނަ މެޗުގައި މިރޭ ބައްދަލުކުރީ އަލިފުށްޓާއި ދުވާފަރެވެ.
މިމެޗު 2-0 ގެ ނަތީޖާއަކުން ކާމިޔާބުކުރީ ދުވާފަރެވެ. ދުވާފަރު މިމުބާރާތުގައި ފައިނަލަށް ދަތުރުކުރީ ކުޅުނު އެއްވެސް މެޗަކުން ބަލި ނުވެއެެވެ.
ފޯރިގަދަ ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ނުޖެހުނެވެ. މެޗުގައި އަލިފުށީ ޓީމުން ކުޅުނީ ވަރުގަދަ ޑިފެންސިވް ކުޅުމެކެވެ.
މިމެޗުގައި ޖެހި ހަމައެކަނި ދެ ލަނޑު ދުވާފަރުން ކާމިޔާބުކުރީ ފަހު ހާފުގައި ވަރަށް ގާތްގާތުގައެވެ. ދެ ޓީމުގެ ގޯލަށްވެސް ނުރައްކާކުރި މިމެޗުގައި ލަނޑު ޖަހާނެ ގިނަ ފުރުސަތުތަކެއް ވަނީ ބޭކާރުވެފައެވެ.
މި މުބާރާތުގެ ޗެންޕިއަން ޓީމަށް 30،000 ރުފިޔާގެ ފައިސާގެ އިނާމެއް ހުށަހަޅާފައިވާ އިރު މި މުބާރާތް ކުރިއަށް ގެންދަނީ ބައިވެރިވި 7 ޓީމު ދެ ގްރޫޕަކަށް ބަހާލައިގެން ކޮންމެ ގްރޫޕަކުން ވެސް އެންމެ ގިނަ ޕޮއިންޓް ހޯދާ ދެޓީމު ސެމީ ފައިނަލަށް ހޮވޭގޮތަށެވެ.
މިއަހަރުގެ މުބާރާތް އެންމެ ފުރަތަމަ ބާއްވަން ނިންމީ ވެރިކަން ކުރާ ރަށް ރ. އުނގޫފާރުގައެވެ. ނަމަވެސް މުބާރަތް ފެށެން ކުޑަ ދުވަސްކޮޅަކަށްވެފައި ވަނިކޮށް އުނގޫފާރުން މުބާރާތް ބޭއްވެން ނެތްކަމަށް އެ ރަށު ކައުންސިލުން އެންގުމުން، އިންނަމާދޫގައި މުބާރާތް ބޭއްވުމަށް ނިންމީއެވެ. އިންނަމާދޫގައި މި މުބާރާތް ބާއްވަން ނިންމިއިރު މުބާރާތް ފެށުމަށް އޮތީ ގާތްގަނޑަކަށް ދެ ހަފްތާއެވެ.
ނަމަވެސް މިމުބާރާތް އިންނަމާދޫގައި ކުރިއަށްދާއިރު، އިންނަމާދޫއިން އޮތީ މިމުބާރާތަށް ވަރަށް ފުރިހަމައަށް ތައްޔާރުވެފައެވެ.
މަހުގެ 29 ވަނަ ދުވަހު ކުޅޭ މުބާރާތުގެ ފައިނަލުގައި ކުޅޭނީ ދުވާފަރާއި އިނގުރައިދޫއެވެ.
މިމުބާރާތުގެ ފަހުގެ ޗެމްޕިއަނަކީ ދުވާފަރެވެ.
