ރ. އަތޮޅު ފުޓްސަލް ޗެލެންޖު 2023 އަކީ ހޯސްޓުކުރުމަށް ”ސަތޭކަ“ ދޭ ވަރުގެ މުބާރާތެކެވެ. މިއީ އަހަރެންގެ ޚިޔާލެއް ނޫނެވެ. އެކަމަކު މުބާރާތުގެ މެޗުތައް ބެލުމަށް ރ. އިންނަމާދޫއަށް ޒިޔާރަތްކުރި ގިނަ މެހެމާނުންނާއި މުބާރާތުގައި ބައިވެރިވި ޓީމުތަކުގެ ކުޅުންތެރިންނާއި އޮފިޝަލުން ދެއްކި ވާހަކައެވެ. މުބާރާތުގެ އިންތިޒާމުތައް ބަރާބަރު ކަމަށް ބުނެ ކުރީ ތައުރީފުން ތައުރީފެވެ. އޮހުނީ އުފާވެރިކަމުގެ ޝުއޫރުތަކެވެ.
ގާތްގަނޑަކަށް 950 މީހުންގެ އާބާދީއެއް އޮންނަ ރ. އިންނަމާދޫއާ ހަމަައަށް ރ. އަތޮޅު ފުޓްސަލް ޗެލެންޖުގެ ދެވަނަ މުބާރާތް ދަތުރުކުރީ މާޔޫސީ ދަތި ކަނޑެއްގައެވެ. ގޮންޖެހުމުގެ ބިޔަ ރާޅުތަކާ ހަނގުރާމަ ކުރަމުންނެވެ.
ތިލަކޮށް ފަސޭހަކޮށް ފަހުމުވާނެހެން ބުނާނަމަ، އިންނަމާދޫގައި މިމުބާރާތް ބާއްވަން ހަމަޖެއްސީ މާޅޮސްމަޑުލު އުތުރުބުރީ އަތޮޅު ކައުންސިލުން މިމުބާރާތް ފުރަތަމަ ބާއްވަން ހަމަޖެއްސި ރ. އުނގޫފާރުގައި ހޯސްޓުނުކުރެވޭނެ ކަމަށް އެ ރަށު ކައުންސިލުން ނިންމުމުންނެވެ. އަތޮޅުގެ ވެރިކަންކުރާ އުނގުފާރުގެ ރަށު ކައުންސިލުން މިގޮތަށް ނިންމީ އެ ކައުންސިލްގެ ބައްދަލުވުމެއްގައެވެ. އަދި މިގޮތަށް ނިންމި ސަބަބެއް ކަމަށް ބުނެފައިވަނީ އެރަށުގެ ގިނަ އަދަދެއްގެ މީހުން އެކަމާ މެދު ނުރުހޭތީ ކަމަށެވެ. އުނގޫފާރު ކައުންސިލްގެ 110 ވަނަ ޖަލްސާގައި އެގޮތަށް ނިންމާފައިވާ ކަމަށް ކައުންސިލް މެމްބަރު މުހައްމަދު މުނީޒް މޫސާވަނީ ފޭސްބުކް ޕޯސްޓެއްގައި ހާމަކުރައްވާފައެވެ.
އުނގޫފާރުގައި މުބާރާތް ބޭއްވޭ ގޮތް ނުވުމުން، އަތޮޅު ކައުންސިލުން އަވަސްވެގަތީ މުބާރާތް އެހެން ރަށަކަށް ބަދަލުކުރުމަށެވެ. މިގޮތުން އެކި ފަރާތްތަކާއެކު މަޝްވަރާކުރުމުން، އެ ކައުންސިލަށް މިކަމުގައި އާނބަސް ބުނީ މާޅޮސްމަޑުލު އުތުރުބުރީ އިންނަމާދޫ ކައުންސިލުންނެވެ. ދިމާވި ގިނަ ގޮންޖެހުންތަކުގެ ސަބަބުން 15 ޑިސެމްބަރ 2023 ގައި ފެށުމަށް ތާވަލުކުރި ރ. އަތޮޅު ފުޓްސަލް މުބާރާތް، 23 ޑިސެމްބަރު 2023 ވަނަ ދުވަހަށް ފަސްކޮށް، އިންނަމާދޫގައި ބާއްވަން ތައްޔާރީތައް ފެށިއެވެ.
މިމުބާރާތަށް ތައްޔާރުވުމަށް އިންނަމާދޫއަށް ލިބުނީ ގާތްގަނޑަކަށް ހަފުތާއެއްހާ ދުވަހެވެ. އެކަމަކު މިމުބާރާތް ގާތުން ބެލި މީހުން މިނޫހަށް ބުނެފައިވާ ގޮތުން ނަމަ، މިދިޔަ އަހަރު ރ. އުނގޫފާރުގައި ބޭއްވި ރ. އަތޮޅު ފުޓްސަލް ޗެލެންޖު 2022 އަށްވުރެ އެތައް ގޮތަކުން، އިންނަމާދޫގައި ނިމިދިޔަ މުބާރާތް ރަނގަޅެވެ. އެންމެންވެސް ކިޔަނީ އެކައްޗެކެވެ. ރަށަށް އެރި މެހެމާނުންނަށް ކީފުރިހަމަ މަރުހަބާއެވެ. ޓީމުތައް ރިސީވްކުރުމުގައި ދެއްކި މެހެމާންދާރީއާއި އިޚުތިރާމުގެ ނަމޫނާއެވެ.
ޖުމުލަ ހަތް ޓީމަކުން ބައިވެރިވި މިމުބާރާތަށް ތައްޔާރުވުމުގައި ރަށުގެކުދިބޮޑު ރައްޔިތުން ރެޔާއިދުވާލު ޝާމިލުވެ މަސައްކަތްކުރީ ރަށުވަންތަ ޖޯޝާއި ލޯބީގައެވެ. މުބާރާތުގެ މެޗުތަކަށް ދަނޑު ތައްޔާރު ކުރުމުގެ އިތުރަށް ރަށުތެރެއާއި ބަނދަރުމަތި ނިކަން ސާފުކޮށްލިއެެވެ. އިންނަމާދޫ ”ނަލަނަލަ އިންނަމާދޫއަށް“ ހަދާލިއެވެ.
މިއީ އަތޮޅު ފެންވަރުގެ މުބާރާތަކަށް ވާތީ، ރަށްރަށުން ގިނަ މެހެމާނުންތަކެއް ޒިޔާރަތްކުރާނެ ކަމަށް ބަަލައި، އެމީހުންނަށް ފުރިހަމައަށް ކޭޓަރކުރެވޭނެކަން ކަށަވަރުކުރުމަށް، ރޭވުންތެރިކަމާއެކު ކަންކަން އިންތިޒާމުކޮށް، ރަށުގެ ފިހާރަތަކާއި، ކެޔުންބުއިމުގެ ޚިދުމަތްދޭ ތަންތަންވެސް، ކަމާވެގެން ތައްޔާރުކުރިއެވެ. އަދި މިފަދަ މުބާރާތެއް ބޭއްވުމަށް އެ ރަށު ފުޓަސަލް ދަނޑު ފައްކާކުރުމަށް، ދަނޑުގެ ޗޭންޖިންރޫމް، ފާހާނާތަކަކާއެކު އިމާރާތްކޮށް، ދަނޑުގެ ޓަރފް އައުކޮށް، އާބާތުރަފިލުވައި ޒީނަތްތެރިކުރުމުގެ މަސައްކަތްވެސް ކުރީ ފަރުވާތެރިކަމާއެކު އެންމެން ގުޅިގެންނެވެ.
މިމުބާރާތް ފެށުމުގެ ރަސްމިއްޔާތާއި ނިންމުމުގެ ރަސްމިއްޔާތުން ފެނިގެންދިޔަ ސްކޫލްކުދިންގެ ހުށަހެޅުންތަކަކީވެސް ފާހަގަނުކޮށް ދޫކޮށްލެވޭ ވަރަށްވުރެ ހިތްގައިމު ހުށަހެޅުންތަކެކެވެ. ހާއްސަކޮށް ފެށުމުގެ ރަސްމިއްޔާތުގައި ހުށަހެޅި މަރުހަބާ އައިޓަަމަށް ގިނަ ބައެއްގެ ތައުރީފު އޮހުނެވެ.
ކޮންމެއަކަސް މުބާރާތް ހޯސްޓުކުރީ އަހަރެންގެ ބަހުން ބުނާ ނަމަ ”ރަނެއް، މަލެއް. ޖަވާހިރެއް ކަހަލަބައެކެވެ.“
އިތުރަށް ކިޔާލަން:
ރ. އަތޮޅު ފުޓްސަލް ޗެލެންޖު 2023 ގެ ޗެމްޕިއަނަކީ ދުވާފަރު
ރ. އަތޮޅު ފުޓްސަލް ޗެލެންޖު 2023 ގެ ފޯރިގަދަ ފައިނަލްގައި ވާދަކުރިީ ރ. އަތޮޅު ފުޓްސަލް ޗެލެންޖު 2022 ގެ ރަނަރ-އަޕް ރ. އިނގުރައިދޫ އާއި ޗެމްޕިއަން ރ. ދުވާފަރެވެ.
ގިނަ އަދަދެއްގެ ސަޕޯޓަރުންގެ ކުރިމަތީގައި ރ. އިންނަމާދޫ ފުޓްސަލް ދަނޑުގައި ކުޅުނު ރ. އަތޮޅު ފުޓްސަލް ޗެލެންޖުގެ ފައިނަލް މެޗު ނިމުނީ 6-0 ގެ ނަތީޖާއަކުންނެވެ.
2022 ވަނަ އަހަރުގެ ރ. އަތޮޅު ފުޓްސަލް މުބާރާތުގެ ތަށި ދުވާފަރުން ނަގާފައިވަނީ އުނގޫފާރުގައި ހަމަ އިނގުރައިދޫއާ ދެކޮޅަށް ކުޅެ އެ ޓީމު ބަލިކޮށްގެނެވެ.
ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެންބަރު މުޙައްމަދު ނަޝީދު އަބްދު ﷲ ޝަރަފުވެރިކޮށްދެއްވި، މި މުބާރާތުގެ ފައިނަލް މެޗުން މޮޅުވި ދުވާފަރަށް 30،000 ރުފިޔާގެ ފައިސާގެ އިނާމާއި ރަނަރ-އަޕް އިނގުރައިދޫއަށް 20،000 ރުފިޔާގެ ފައިސާގެ އިނާމު ދީފައިވެއެވެ.
ފުރިހަމަ އިންތިޒާމުތަކާއެކު މި މުބާރާތް ކުރިއަށް ގެންދިއުމުގައި އިންނަމާދޫ ކައުންސިލާއި މުއައްސަސާތަކާއި ރަށުގެ ރައްޔިތުން ކޮށްދެއްވި ބުރަ މަސައްކަތްތަކަށް ރ. އަތޮޅު ކައުންސިލުން ވަނީ ޝުކުރު އަދާކޮށްފައެވެ.
Leave a Reply