ރާއްޖެއަކީ ހެޕަޓައިޓިސް ބީ ބަލި ކޮންޓްރޯލު ކުރެވިފައިވާ ގައުމެއްގެ ގޮތުގައި ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބަލައިގެންފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު ބުނީ ރާއްޖެއަކީ ހެޕަޓައިޓިސް ބީ ކޮންޓްރޯލު ކުރެވިފައިވާ ގައުމެއް ކަމަށް ޑަބްލިއުއެޗްއޯ އިން މިހާރު ކަނޑައަޅާފައިވާ ކަމަށާއި އެ ގޮތަށް ނިންމީ ހެޕަޓައިޓިސް ވެކްސިން ދިނުމުގައި ގިނަ އަހަރުތަކެއް ވަންދެން މަސައްކަތް ކުރުމުން ކަމަށެވެ. އްޖޭގެ ގިނަ އަދަދެއްގެ ކުޑަކުދިންނަށް ހެޕަޓައިޓިސް އެ ވެކްސިން ދެވިފައިވާ ކަން ޑަބްލިއުއެޗްއޯ އިން ފާހަގަ ކުރާ ކަމަށް ވެސް އެޗްޕީއޭ އިން ބުންޏެވެ.
ހެޕަޓައިޓިސް ބީ ފެތުރޭތޯ ބަލަން ކުރިއަށްގެންދިޔަ ސާވޭގެ ތެރެއިން، އުމުރުން ހަ އަހަރާއި ހަތް އަހަރާ ދެމެދުގެ ސްކޫލް ކުދިންގެ ގައިން އެ ބަލި ފެނިފައި ނުވާ ކަމަށް ވެސް އެޗްޕީއޭ އިން ބުންޏެވެ. އަދި މިހާރު ވެސް ހެޕަޓައިޓިސް ބީ އަށް މާބަނޑު މީހުން ގަވާއިދުން ސްކްރީންކޮށް ޕޮޒިޓިވް މީހުނަށް ފަރުވާ ދިނުމާއި، ޕޮޒިޓިވް މައިންނަށް އުފަންވާ ތުއްތު ކުދިންނަށް ޕްރިވެންޓިވް ތެރަޕީދީ އާއި ކުޑަކުދިން ބަލިން ރައްކާތެރިކުރުމަށް ފިޔަވަޅުތައް އަޅަމުން އަންނަ ކަމަށް ބުނެފައިވެއެވެ.
ހެޕަޓައިޓިސް އަކީ ފުރަމޭ އަށް ޖެހޭ ބައްޔެކެވެ. އެ ބަލީގެ މައިގަނޑު ފަސް ބާވަތެއް ހުރި ނަމަވެސް އެންމެ އާންމުކޮށް ފެންނަނީ ހެޕަޓައިޓިސް ބީ އާއި ސީއެވެ. މިއީ ކުރީ ބައިގައި ފަރުވާ ނުހޯދައިފި ނަމަ، ފުރާނަ އަށް ގެއްލުންވާ ވަރުގެ ބައްޔެކެވެ. މި ބައްޔަށް ރައްކާތެރިކަން ލިބޭނެ ހަމައެކަނި ގޮތަކީ ވެކްސިން ޖެހުމެވެ.
ރާއްޖޭގެ އިތުރުން އަވަށްޓެރި ސްރީލަންކާއަކީ ވެސް ހެޕަޓައިޓިސް ބީ ކޮންޓްރޯލް ކުރެވިފައިވާ ގައުމެއްގެ ގޮތުގައި ޑަބްލިއުއެޗްއޯ އިން މިއަދު ވަނީ ކަނޑައަޅައިފައެވެ.
ޑަބްލިއުއެޗްއޯގެ އިރުއުތުރު އޭޝިއާގެ ރީޖަނަލް ޑިރެކްޓަރު ޑރ. ޕޫނަމް ކެޓްރަޕަލް ވިދާޅުވީ ރާއްޖެ އާއި ސްރީލަންކާ އިން މި ހޯދި ކާމިޔާބީއަކީ އެ ގައުމުތަކުގެ ސިއްހީ ދާއިރާގެ ވެރިންނާއި އޮފިޝަލުންނާއި ސިއްހީ ހިދުމަތްތެރިންނާއި ރައްޔިތުން ކުރި މަސައްކަތުގެ ނަތީޖާ ކަމަށާއި އެހެންވެ އެކަމުގައި ބައިވެރިވި މީހުންނަށް ޝުކުރު އަދާ ކުރާ ކަމަށް ވެސް އޭނާ ވިދާޅުވިއެވެ.
Leave a Reply