ރައީސް ޑރ. މުޙައްމަދު މުއިއްޒު މިއަދު ރ. އަތޮޅަށް ފެއްޓެވި ދަތުރުފުޅުގައި އެމަނިކުފާނު ރ. ވާދޫއަށް ވަޑައިނުގަންނަވާނެކަން ހާމަވެއްޖެއެވެ.
ރ. ވާދޫ ލައިވްއަށް ކަށަވަރުކުރެވިފައިވާ ގޮތުގައި، ރައީސުލްޖުމްހޫރިއްޔާ ރ، އަދި ބ އަތޮޅަށް ކުރައްވާ މިދަތުރުފުޅުގައި ފުރަތަމަ ވަޑައިގަންނަވާނި ރ. އަލިފުއްޓަށެވެ.
މިއަދު މެންދުރު ފަހު އިފުރު ޑޮމެސްޓިކް އެއާޕޯޓުން ރައީސް، ރ އަލިފުށްޓަށް ވަޑައިގަންނަވާނެއެވެ.
14:45 ގައި ރައީސް، ރ އަލިފުށީ ރައްޔިތުންނާ ބައްދަލުކުރެއްވުން ބާއްވާ ގޮތަށް ހަމަޖެހިފައިވާއިރު 17:30 ގައި ރައީސް، ރ މީދޫއަށް ވަޑައިގަތުމަށް ވަނީ ހަމަޖެހިފައެވެ.
20:30 ރައީސް، ރ މީދޫ ރައްޔިތުންނާ ބައްދަލުކުރައްވާނެއެވެ.
މިދަތުރުފުޅުގައި ރައީސް ޑރ. މުއިއްޒު ވާދޫއަށް ވަޑައިނުގަންނަވާ ގޮތަށް އޮތް ނަމަވެސް، ރ. އަލިފުށީގައި މާޅޮސްމަޑުލު އުތުރުބުރީ ވާދޫ ކައުންސިލާ ރައީސް ބައްދަލުކުރައްވާނެއެވެ.
ރައީސުލްޖުމްހޫރިއްޔާގެ މި ދަތުރުފުޅުގައި މި ދެ އަތޮޅުގެ ބައެއް ރަށްތަކަށް ޒިޔާރަތްކުރެއްވުމުގެ އިތުރުން، ވަގުތު ލިބިވަޑައިގަތް މިންވަރަކުން ދެ އަތޮޅުގެ ވީހައި ގިނަ ރަށްތަކުގެ ކައުންސިލްތަކާއި އ.ތ.މ. ކޮމިޓީތަކާ ބައްދަލުކުރެއްވުމަށް ވަނީ ހަމަޖެހިފައެވެ. އަދި މި ދެ އަތޮޅުގެ އަތޮޅު ކައުންސިލާވެސް ބައްދަލުކުރައްވާނެއެވެ.
ރާއްޖޭގެ ހުރިހާ އަތޮޅަކަށް ޒިޔާރަތްކުރެއްވުމަށާ، އަތޮޅުތަކާ ރަށްތަކާ ސިޓީތަކުގެ ލޯކަލް ކައުންސިލުތަކާ ބައްދަލުކުރެއްވުމަށް ރައީސް ޑރ. މުއިއްޒު ފަށްޓަވައިގެން މިހާރު ކުރިޔަށްގެންދަވާ ސިލްސިލާ ދަތުރުފުޅުތަކުގައި ރައްޔިތުންގެ ހާލުއަހުވާލު ބައްލަވައި ތަރައްޤީގެ މަޝްރޫޢުތައް ތަރުތީބުކުރާނޭގޮތާއިމެދު މަޝްވަރާކުރައްވާނެއެވެ. އަދި ރައްޔިތުން އެންމެ އެދޭ ކަންކަން އޮޅުންފިލުއްވާނެއެވެ.
ރައީސް ޑރ. މުއިއްޒު ވިދާޅުޅުވެފައި ވަނީ އެމަނިކުފާނުގެ އަމާޒަކީ މި ފަސްއަހަރުގެ ތެރޭގައި ރާއްޖޭގެ ކޮންމެ ރަށަކަށްވެސް މަދުވެގެން ދެ ފަހަރު ޒިޔާރަތްކުރެއްވުންކަމުގައެވެ.
މިދިޔަ ފެބްރުވަރީމަހުގެ ތެރޭގައި ރައީސް ޑރ. މުއިއްޒު ވަނީ އައްޑޫ ސިޓީ، ފުވައްމުލައް ސިޓީ، ތިނަދޫ ސިޓީ، ތ. އަތޮޅު އަދި ގދ. އަތޮޅުގެ ހުރިހާ ކައުންސިލުތަކާ ބައްދަލުކުރައްވާފައެވެ. އަދި ދެ ކައުންސިލެއް ފިޔަވާ ގއ. އަތޮޅުގެ ހުރިހާ ކައުންސިލަކާވެސް ބައްދަލުކުރައްވާފައިވެއެވެ. އަދި ހއ. ހދ، ށ އަތޮޅުގެ ހުރިހާ ކައުންސިލުތަކާއި އަދި ނ އަތޮޅުގެ ވެސް އެންމެ ކައުންސިލެއް ފިޔަވާ އެހެން ހުރިހާ ރަށެއްގެ ކައުންސިލުތަކާ އ.ތ.މ. ކޮމިޓީތަކާ ބައްދަލުކުރައްވައި މި އަތޮޅުތަކާ ރަށްރަށާ ސިޓީތަކުގެ ތަރައްޤީގެ ކަންކަމާ ގުޅޭގޮތުން ވަނީ މަޝްވަރާކުރައްވާފައެވެ.
