ރާއްޖެއަކީ ވަކިވަކި ޖަޒީރާ ރަށްތަކެކެވެ. މީހުން ދިރިއުޅެނީ 187 ރަށެއްގަ އެވެ. މިއިން ކޮންމެ ރަށެއްގައި ތަފާތު ކޮންމެ ވެސް ސަގާފަތެއް އޮވެ އެވެ. ގުދުރަތީ ގޮތުން ކޮންމެ ރަށަކީ ވެސް، ހާއްސަ ރަށެކެވެ. ދިވެހީންގެ ތެރޭގައި ވެސް ރަށްރަށް ބެލުމަށާއި ދަތުރު ކުރުމުގެ ސަގާފަތެއް މިހާރު އުފެދިއްޖެ އެވެ.
މިއީ މަދަރުސީ ބޮޑު ބަންދުގެ ދުވަސްވަރެވެ. ދަތުރުފަތުރުގެ މޫސުން ފެށުނީ އެވެ. އާންމު ގޮތެއްގައި މިފަދަ ދުވަސްވަރެއްގައި ދަތުރުފަތުރުގެ މައި މަންޒިލަކަށް އޮންނަނީ ވެރިރަށް މާލެ އެވެ. މާލޭން ލިބޭ ހިދުމަތްތައް ހޯދަން ރަށްރަށުން މީހުން އައިސް ގިނަ އެވެ.
ހިތްހަމަޖައްސާލުމުގެ އަސާސީ ޚިދުމަތްތައް ހޯދަން ވެސް ދަތުރަށް ދިޔުން އާންމު އިރު ރ. ވާދޫ ވެސް މި ފަހަރު ފުރިއްޖެ އެވެ. މާޅޮސްމަޑުލު އުތުރުބުރީގެ މި ރީތި ރަށަށް ދިވެހިން އެބަ އާދެ އެވެ. ވާދޫގެ ގެސްޓްހައުސްތަކުގެ ބުކިން ފުލްވެއްޖެ އެވެ. ގެސްޓްހައުސް ފުލްވުމުން މީހުން ދިރިއުޅޭ ގޭގޭގައި ހުސްކޮށް ހުރި ބައެއް ކޮޓަރިތައް ވެސް ކުއްޔަށް ދޫކޮށްފަ އެވެ.
”ލޯކަލްސް، ހަމަ ދިވެހިން އައިސް ތިބީ، ގެސްޓްހައުސް މުޅި ވީކްއަށް ފުލް، ގޭގޭގައި ވެސް ކޮޓަރިތައް ކުއްޔަށް ދީފަ އެބަ ހުރި،“ ވާދޫގައި ގެސްޓް ހައުސް ހިންގާ ފަރާތަކުން ބުންޏެވެ.
ވާދޫއަކީ ރީތި ރަށެކެވެ. ސްކޫލް ބަންދުގެ ދުވަސްވަރު އައުމުން އާއިލާއާއެކު ހިތްފަސޭހަ، ހިތްހަމަޖެހޭ މާހައުލަކަށް އަންނަންޏާ މިއީ ހަމަ އެއްވަނައިގެ އިހުތިޔާރެކެވެ. މި މަހުގެ26 ވަނަ ދުވަހާ ހަމައަށް ބޮޑު ބަންދު ދެމިގެންދާއިރު ވާދޫއަށް ޖައްސާލަން ރަނގަޅެވެ.
