ރ. ވާދޫ ގޮނޑުދޮށް ހިމާޔަތްކުރުމުގެ މަޝްރޫއާ ގުޅޭ ގޮތުން ރައްޔިތުންގެ ޚިޔާލު ހުށަހެޅުމަށް މާޅޮސްމަޑުލު އުތުބުރީ ވާދޫ ކައުންސިލުން އާންމުކޮށް ހުޅުވާލައިފިއެވެ.
ވާދޫ ކައުންސިލުން ވަނީ، ރައްޔިތުންގެ ޚިޔާލު ހުށަހެޅުމަށް ހާއްސަ ގޫގުލް ފޯމެއް ހިއްސާކޮށްފައެވެ.
ވާދޫ ކައުންސިލުން ބުނީ، މަޝްރޫޢަކީ ވާދޫގެ އިރުމަތީ ފަރާތުން ގިރަމުންދާތީ ރަށް ގިރުމުގެ މައްސަލައަށް ޙައްލެއް ގެނައުމުގެ ގޮތުން، މި ސަރަޙައްދުގައި ތޮށިލުމުގެ މަޝްރޫޢު ކަމަށެވެ. މިމަޝްރޫޢު ކުރިއަށް ގެންދިއުމަށް ބޭނުންވާ ތިމާވެއްޓަށް ކޮށްފާނެ އަސަރު ވަޒަންކުރުމަށް ތައްޔާރުކުރާ އީ.އައި.އޭ ރިޕޯޓަށް މިރަށުގެ ރައްޔިތުންގެ މިމަޝްރޫޢުއާ ދޭތެރޭ އެއްވެސް ޚިޔާލެއް އޮތްތޯ ބަލަން ބޭނުންވާ ކަމަށެވެ.
މިމަޝްރޫޢުގެ ބެލެނިވެރި އިދާރާއަކީ އިމާރާތްކުރުމާއި ބިނާރާ ބެހޭ ވުޒާރާއެވެ. އަދި މަޝްރޫޢުގެ އީ.އައި.އޭ ކޮންސަލްޓަންޓްކީ ސީ.ޑީ.އީ ކޮންސަލްޓިންގއެވެ.
މި މަޝްރޫޢުގައި ހުށަހަޅާފައިވަނީ ވާދޫގެ އިރުމަތީ ފަރާތުގައި ތޮށިލުމާއި ގޮނޑުދޮށް ވެލިން މުއްސަދި ކުރުމުގެ މަސައްކަތް ކުރުމަށެވެ. މިގޮތުން Y އަކުރުގެ ބައްޓަމަށްވާ ބޮޑުހިލަ ޖެހުމާއި 15،000 ކޮޑިމީޓަރުގެ ވެލި ބޭނުންކޮށްގެން 400 މީޓަރުގެ ގޮނޑުދޮށުގެ ސަރަޙައްދެއް ވެލިން މުއްސަނދިކުރާނެއެވެ. އަދި ނެރެއް ކެނޑުމަށާއި ކުރިއަށް އޮތް ތަނުގައި ބޯޓު ބަނުމުގެ މަސައްކަތް ކުރުމަށް ބަނދަރެއް ހެނދުމަށްޓަކައި ފަޅުތެރެއިން ވެލި ނަގާނެއެވެ.
މިގޮތުން ފުޅާމިނުގައި 25 މީޓަރު އަދި ދިގު މިނުގައި 200 މީޓަރު ހުރި ނެރެއް ކަނޑާއި އަދި މެދުދިޔައިން 3 މީޓަރު ފުނަށް ކޮނެފައިވާ 50 މީޓަރު 50 މީޓަރުގެ ބަނދަރެއް ހަދާނެއެވެ. ހުރިހާ މަސައްކަތެއް ކުރުމަށް ހަމަޖެހިފައިވަނީ ވަގުތީ ސޭންޑް ބެޑެއް މަތީގައި އެކްސްކެވޭޓަރ ބަހައްޓައިގެންނެވެ.
އީ.އައި.އޭ ފާސްވުމުން މިމަޝްރޫޢުގެ މަސައްކަތް ފެށުމަށް ވަނީ ހަމަޖެހިފައެވެ. މިމަޝްރޫއަކީ ރައީސް އިބްރާހީމް މުޙައްމަދު ޞާލިޙްގެ ސަރުކާރުގައި އެމްޓީސީސީއާ ހަވާލުކޮށްފައިވާ މަޝްރޫއެކެވެ.
