ރ. އުނގޫފާރުގައި ކަރަންޓުގައި ޖެހުނު ކުޑަކުއްޖަކު ސަލާމަތްކުރަން އުޅުމުގެ ތެރޭގައި ކަރަންޓުގައި ޖެހި ހާލު ސީރިއަސްވި ޒުވާނާ އިތުރު ފަރުވާއަށް މާލެ ފޮނުވަން އުނގޫފާރު ރީޖަނަލް ހޮސްޕިޓަލުން ނިންމައިފިއެވެ.

މިދިޔަ ބުރާސްފަތި ދުވަހު ހިނގި މި ހާދިސާގައި ބޮޑުވަރުވެފައި ވަނީ އުމުރުން 18 އަހަރުގެ ޒުވާނަކަށެވެ. މައުލޫމާތު ލިބޭ ގޮތުގައި އެ ޒުވާނާއަކީ ހާއްސަ އެހީއަށް ބޭނުންވާ ކުއްޖެކެވެ.

އުނގޫފާރު ހޮސްޕިޓަލުގެ އޮފިޝަލަކު ބުރާސްފަތި ދުވަހު ރ. ވާދޫ ލައިވްއަށް ވިދާޅުވީ މި ހާދިސާއާ ގުޅިގެން ތިން ކުއްޖަކު ހޮސްޕިޓަލަށް ގެންދިޔަ ކަމަށެވެ. އެ ކުދިން އެ ހޮސްޕިޓަލަށް ގެންދިޔައީ އެ ދުވަހުގެ މެންދުރު ފަހު 1:40 ހާއިރު ކަމަށް އޭނާ ވިދާޅުވިއެވެ.

ކަރަންޓުގައި ޖެހެން މެދުވެރިވީ މަގު ބައްތީގެ ހޮޅިން ކަމަށްވެއެވެ. ވިއްސާރަވެގެން ބައްތިން ކަރަންޓު ދޫވެފައި ހުރީ އެ ސަރަހައްދުގައި އޮތް ފެންގަނޑަށެވެ.

ކަރަންޓުގައި ޖެހިގެން ފަރުވާދީފައި ވަނީ 18 އަހަރުގެ ޒުވާނާގެ އިތުރުން ކުޑަކުއްޖަކަށެވެ. އަދި އެ މަންޒަރު ފެނި ހެއަށްގޮތްވި ކުއްޖަކަށްވެސް ހޮސްޕިޓަލުގައި ފަރުވާދީފައިވެއެވެ. މީގެ ތެރެއިން 18 އަހަރުގެ ޒުވާނާ ފިޔަވައި ދެން ތިބި ކުދިން ފަރުވާއަށް ފަހު ވަނީ ޑިސްޗާޖުކޮށްލާފައެވެ.

އެ ޒުވާނައަށް ބުރާސްފަތި ދުވަހުން ފެށިގެން ފަރުވާ ދެމުން އަންނަނީ އައިސީޔޫގައެވެ.