ކަރަންޓު ބިލާ ގުޅިގެން ކޮންމެހެން އެނގެން ޖެހޭ މައުލޫމާތު!

ތިރީގައި އެވަނީ، ކަރަންޓު ބިލާ ގުޅުވައިގެން އެންމެ ގިނައިން ކުރާ ސުވާލުތަކަށް ސްޓެލްކޯއިން ދޭ ޖަވާބެވެ.

ކަރަންޓު ބިލް ތައްޔާރު ކުރާ ގޮތަކީ ކޮބާ؟

ކަރަންޓު ބިލަކީ ބޭނުންކުރާ މިންވަރަށް އަދަދަށް ހަދާ އެއްޗެކެވެ. ކަރަންޓު މީޓަރެއް ހިނގަން ފަށަނީ ގެއަކުން ސާރވިސް ޕްރޮވައިޑާ ފޯރުކޮށްދޭ ވޯލްޓޭޖް ބޭނުން ކުރަން ފެށީމައެވެ. އެއީ އެ ސަރވިސް ޕްރޮވައިޑަރއަށް ކުޅެވޭ އެއްޗެއް ނޫނެވެ. ކަރަންޓު ބިލެއް ތައްޔާރުކުރަނީ ވަކި މުއްދަތެއްގެ ތެރޭގައި ކަރަންޓު ބޭނުންކޮށްފައިވާ އަދަދަށެވެ. އޭގެ މާނައަކީ ބިލެއް ތައްޔާރު ކުރާނީ ކުރީމަހު ރީޑިންގ ނެގި އިރު އޮތް އަދަދާއި އެންމެ ފަހުން ނެގި ރީޑިންއަށް ބިނާކޮށެވެ. މީގެ ތަފްސީލު ބިލުން ފެންނަން ހުންނާނެއެވެ. ސްޓެލްކޯގެ ބިލްތައް ތައްޔާރުކުރަނީ ހިއުމަން އެރަރއަކަށް ޖާގަ ނުދިނުމަށްވެސް ފިޔަވަޅުތަކެއް އަޅައިގެންނެވެ. އެގޮތުން ރީޑިން ނަގާ މުވައްޒަފު އެ ރީޑިންގ ނަގާ ޑިވައިސް އަށް ރީޑިންގ އެންޓާރ ކުރުމަށްފަހު ކުރީ މަސްތަކުގެ ކޮންސަމްޕްޝަނާއި އަޅާބަލާއިރު ފާހަގަކުރެވޭ ވަރުގެ ބޮޑު ތަފާތެއް އުޅޭނަމަ، އެ މީޓަރެއް ފްލެގްކޮށް، އެ މީޓަރުގެ ފޮޓޯ ނަގަން ޖެހެއެވެ. އަދި އޭގެ ސައްހަކަށް އަދި ސުޕަވައިޒަރީ ލެވެލް އަކުންވެސް ބަލާނެއެވެ. މީގެ އިތުރުން ސުޕަވައިޒަރަށްވެސް އެ ކޮންސަމްޕްޝަންގަ އާދަޔާ ހިލާފު ތަފާތެއް އުޅޭ ކަމަށް ފާހަގަވަންޏާ އެ ރީޑިން އެއް ކަށަވަރު ކުރަން އެ ފްލެގްވި މީޓަރުގެ ކަސްޓަމަރާ ހިސާބަށްގޮސް، އޭގެ ސަބަބު އޮޅުންފިލުވުމަށް މަސައްކަތްކޮށް، އަލުން އެ މީޓަރެއްގެ ރީޑިން ނަގަންވެސް ފޮނުވާނެއެވެ. ސްޓެލްކޯގެ ބިލިންގ ސައިކަލް މިވަގުތު އޮންނަ ގޮތުން ބިލް ކުރެވެނީ 20 ވަރަކަށް ދުވަހުގެ ޑިލޭއަކާއެކުއެވެ. އެއީ މުޅި ގްރޭޓާމާލެ ސަރަހައްދުގެ ރީޑިންގ ނެގުމަށް 12 ދުވަސް ހޭދަވާތީއެވެ. އެއީ 48،000 ހާހަށްވުރެ ގިނަ މީޓަރުގެ ރީޑިންގ ނަގާތީއެވެ.

މިދިޔަ ދުވަސްތައް އުޅުނީ ވިއްސާރަކޮށް. އެކަމަކުވެސް ބިލްވީ ބޮޑު. އެއީ ކީއްވެ؟

ސްޓެލްކޯގެ އެންމެ ފަހުގެ ބިލްތަކުގައި ހިމަނާފައިވާނީ ވިއްސާރައިގެ މަދު ދުވަސްކޮޅެކެވެ. ބިލިންގ ޕީރިއޭޑް ބިލްތަކުގައި ހިމަނާފައިވާނެއެވެ. މިދިޔަ މަހު ރީޑިންގ ނެގި ތާރީހާއި އެންމެ ފަހުން ރީޑިންގ ނެގި ތާރިހެވެ. މި ޕީރިއޭޑް ބަލާލީމަ އެ ދުވަސްވަރު އެއީ ހޫނު ދުވަސްވަރެއްކަން ސާފުކޮށް އެނގޭނެއެވެ. މިއީ ސްޓެލްކޯއިން ބުނާ ވާހަކައެއް ނޫނެވެ. މެޓް އޮފީހާއި، އަމީނީމަގު ތާރުގަނޑުގައި ލާފަހުރި ދަވާދު ވިރިފަހުރިތަންވެސް އަދި މި ހޫނު އެންމެންވެސް އިހުސާސް ކުރާނެކަން ޔަގީންވެއެވެ. ވާރޭ ވެހުމުގެ ކުރިން އެވާ ދިލަ ހޫނުވެސް އެއީ އެންމެން އިހުސާސްކޮށްފަ ހުންނާނެ އެއްޗެކެވެ.

ދެން ސުވާލަކަށް ވާނީ ހޫނުވީމަ ބިލް ބޮޑުވާންވީ ކީއްވެހޭ؟

ދިވެހިންގެ ދިރިއުޅުމުގެ ފެންވަރު މިއަދު ހުރީކީއެއް ކުރިން ހުރި ވަރަކު ނޫނެވެ. އޭސީއާއި، ފްރިޖް، އަވަނާއި، ދޮންނަމެޝިނާއި، ކޮފީ މެޝިނުން ފަށައިގެން ގޮސް، ފެންވަރަން ފެން ހޫނުކުރަން ހީޓަރާއި، އިސްތަށިގަނޑު ހިއްކަން ހެއާ ޑްއައިއާއި އާއި މުނިފޫހި ފިލުވުމަށް ޓީވީއާއި، އެކި ފާޑުގެ ގޭމް ކުޅޭ އެއްޗެހި ނެތް ގެއެއް މަދުވާނެއެވެ. އާންމުކޮށް ކަރަންޓު ބިލެއްގެ 40 އިންސައްތަ ހިއްސާ ކުރަނީ ފިނި ކުރާ އާލާތްތަކާއި ހޫނު ކުރާ އާލާތްތަކުންނެވެ. އޭގެ މާނައަކީ އެސީއާއި، ފްރިޖާއި، ހީޓަރާއި، އިސްތިރިއާއި، ފެންކައްކާ ޖަގު އަދި އަވަން ފަދަ އެއްޗެހިންނެއެވެ. ރާއްޖޭގެ ރޫމް ޓެމްޕަރޭޗަރ ގާތްގަނޑަކަށް 30 ޑިގްރީގައި ހުންނަ އިރު އެ 34 ޑިގްރީއަށް ހިއްލުމަކީ އެއީ ފިނި ކުރާ އާލާތްތަކުން އިތުރަށް މަސައްކަތް ކުރަން ޖެހޭނެ ކަމެކެވެ. މިސާލަކަށް އޭސީއެއް 16 ޑިގްރީގައި ބަހައްޓަން އެއަށް ކޮމާންޑް ދިނީމާ އެ އޭސީ މަސައްކަތް ކުރާނީ އެކަން އެގޮތަށް ކުރާށެވެ. މި މަސައަކަތް ކުރުމުގައި އާދައިގެ ދުވަހަކު 30 ޑިގްރީއަށް ހުންނަ އިރު 14 ޑިގްރީގެ ތަފާތެއް އެ އޭސީ މެެއިންޓެއިން ކުރަން އެބަޖެހެއެވެ. މި 14 ޑިގްރީ ހިފަހައްޓާލަން އެ އޭސީއެއް އެތަކެއް ކަރަންޓެއް ބޭނުން ކުރާނެއެވެ. އަދި ހޫނު ދުވަސްވަރު މިސާލަކަށް 34 ޑިގްރީގައި ހުންނަ އިރު 16 ގައި މެއިންޓެއިން ކުރާކަމަށްވަންޏާ އެއީ އިތުރު 4 ޑިގްރީ، ޖުމްލަ 18 ޑިގްރީގެ ތަފާތެކެވެ. މިއީ އޭސީއަކަށް ވަރަށް ބުރަ މަސައްކަތަކަށް ވާނެއެވެ. އަދި މި މަސައްކަތް އެ ދީފައިވާ ކޮމާންޑާއި އެއްގޮތަށް ކުރަން އޭސީ ކެނޑިނޭޅި މަސައްކަތް ކުރާނެއެވެ. މިއީ ވަރަށް ގިނަ އަދަދަކަށް ކަރަންޓު ބޭނުން ކުރަންޖެހޭނެ ހާލަތެކެވެ. ހަމަ އެގޮތަށް ފްރިޖްވެސް ރޫމްޓެމްޕަރޭޗަރއަށް އަންނަ ބަދަލަށް އޭގެ ފިނިމިން ހިފަހައްޓާލަން އިތުރަށް މަސައްކަތް ކުރާނެއެވެ. މިއީ ވަރަށް ބޭސިކް ޕްރިންސިޕަލް އެކެވެ. ހުރިހާ އެންމެނަށްވެސް އަމިއްލަ އަށް ރިސާޗް ހަދައިގެން، ގޫގުލް ކައިރީ އަހައިގެންވެސް ބެލޭނެ ކަމެކެވެ. (25 ޑިގްރީއަށް ބެހެއްޓުމަކީ ރެކޮމެންޑް ކުރާ ކަމެއް)

ކަރަންޓުބިލަކީ އެއިރެއްގައި ތިބޭ ވެރިންނަށް އުނި އިތުރު ގެނެވިދާނެ އެއްޗެއްތަ؟

މި ސުވާލުގެ ޖަވާބަށް ދިއުމުގެ ކުރިންވެސް ބުނެލަން ބޭނުންވަނީ ސްޓެލްލޯއަކީ ދިވެހިންގެ ދިރިއުޅުމާއި ސީދާ ގުޅިފައިވާ ސައްތައިން ސައްތަ ދިވެހި މުވައްޒަފުންގެ ޕޫލެއް އޮންނަ 75 އަހަރުގެ ފަހުރުވެރި ތާރީހެއް އޮތް ކުންފުންޏެކޭއެވެ. މިތަނުގައި މަސައްކަތް ކުރަނީ ހުސް ދިވެހިންނެވެ. މި އެންމެންގެ ގެއަށްވެސް ކަރަންޓުބިލް ދާނެއެވެ. އަދި ސްޓެލްކޯއަކީ އެކި ސިޔާސީ ވިސްނުމުގެ ވެރިން މަސައްކަތްކޮށްފައި ހުރި ތަނެކެވެ. މީގެ ކުރިން މަސައްކަތް ކުރި އެއްވެސް އެމްޑީއަކަށްވެސް މިފަދަ ތުހުމަތެއް ސްޓެލްކޯގެ 2000 އާއި ގާތްކުރާ އަދަދަކަށް ތިބި މުވައްޒަފުން އެއްވެސް އިރަކު ކޮށްފައެއް ނެތެވެ. މިއީ އެ ބިލްތަކަށް އެއްވެސް އިރަކު އުނި އިތުރެއް އަދި އެ ފަދަ ފުރުސަތެއްވެސް ނެތްކަން ހާމަވާ ކަމެކެވެ.