ލ. ކައްދޫގައި ކުރިއަށް ގެންދިޔަ އެމްއެންޑީއެފްގެ މޫދު ޓްރެއިނިންއެއްގައި އާދިއްތަ ދުވަހު އުޅެނިކޮށް މިޔަރެއް ހަމަލާ ދީގެން ނިޔާވި ސިފައިންގެ ބޭކަލުގެ މަގާމުގެ ދަރަޖަ މަތިކޮށްފައިވާ ކަމަށް އެމްއެންޑީއެފްއިން ބުނެފިއެވެ.
މި ހާދިސާގައި ނިޔާވީ، ރ. އުނގޫފާރު، ނިއުލައިފް، ލާންސްކޯޕްރަލްގެ މަގާމުގައި ހުރި މުހައްމަދު ޒައިދާން 23، އެވެ. މި ހާދިސާއާ ގުޅިގެން އެމްއެންޑީއެފްއިން ފުރަތަމަ މީޑިއާތަކަށް ފޮނުވި މެސެޖުގައިވެސް ލިޔެފައި ވަނީ ނިޔާވީ ލާންސްކޯޕްރަލް މުހައްމަދު ޒައިދާން ކަމަށެވެ.
އެކަމަކު އޭގެ ފަހުން މުހާތަބުކުރަމުން އައީ ”ކޯޕްރަލް މުހައްމަދު ޒައިދާން“ މިހެންނެވެ. އެމްއެންޑީއެފްއިން ބުނި ގޮތުގައި އޭނާ ނިޔާވީ ރަސްމީ ޑިއުޓީ އަދާކުރުމުގެ ތެރެއިން ކަމަށްވާތީ ދަރަޖަ މަތިކުރީ ކަމަށެވެ.
މަރްޙޫމް ޒައިދާންގެ ޖަނާޒާ ބާއްވާފައިވަނީ އިއްޔެގެ އަޞްރު ނަމާދަށްފަހު، އުފަން ރަށް ރ. އުނގޫފާރުގައެވެ.
މި ޖަނާޒާއަށްފަހު ސަންދޯކުގައި އަޅާފައި އޮތް ދިވެހިރާއްޖޭގެ ޤައުމީ ދިދަ، ޒައިދާންގެ ޢާއިލާއާ ވަނީ ހަވާލުކޮށްދެއްވާފައެވެ. ޒައިދާން ނިޔާވެފައިވަނީ، ސިފައިންގެ ހައި ރިސްކް ތަމްރީނެއް ފުރިހަމަ ކުރަމުން ދަނިކޮށް، މި މަހުގެ ދެ ވަނަ ދުވަހު ލ. މާވަށް ކައިރީ ކަނޑުގެ ސަރަހައްދުގައި މިޔަރެއް ދިން ހަމަލާއަކާ ގުޅިގެން ފަރުވާދެމުން ދަނިކޮށް ލ. ގަން ރީޖަނަލް ހޮޮސްޕިޓަލްގައެވެ.
ޒައިދާން ނިޔާވުމާ ގުޅިގެން އެކަމުގެ ހިތާމައިގައި، އިއްޔެ ފެށިގެން ދެ ދުވަސް ވަންދެން ސިފައިންގެ ދިދަ، ސިފައިންގެ މަރުކަޒުތަކުގައި ވަނީ ބައި ދަނޑިއަށް ތިރިކޮށްފައެވެ.
ޒައިދާންގެ ޖަނާޒާ ބާއްވާފައި ވަނީ ރަސްމީ ޢިއްޒަތުގެ ދެ ވަނަ ދަރަޖައިގައެވެ. މިޖަނާޒާގައި ސިފައިން ހަތް ބަޑީގެ ސަލާމެއް ވަނީ އަރުވާފައި ވެއެވެ.
