ރ. ދުވާފަރުގައި ތިބި މަސްކައްކާ ހިއްކާ ފަރާތްތަކާއި ދަނޑުވެރިންނާ ބައްދަލުކުރަން އެ ރަށު ކައުންސިލުން ނިންމައިފިއެވެ.
މާޅޮސްމަޑުލު އުތުރުބުރީ ދުވާފަރު ކައުންސިލްގެ އިދާރާއިން ބުނީ، ދިރިއުޅުން ނޫން އެހެނިހެން ބޭނުންތަކަށް ބިން ދޫކުރުމާއި، ރަޖިސްޓްރީ ކުރުމުގެ ގަވާއިދު(ގެ 5 ވަނަ މާއްދާގެ (ށ) އިން އެ އިދާރާއަށް ލިބިދޭ ބާރުގެ ދަށުން، އެ ގަވާއިދުގެ 6 ވަނަ މާއްދާގެ (ރ) ގައިވާ ގޮތުގެ މަތިން، އެކިއެކި ބޭނުންތަކަށް ވަގުތީ ބިން ދޫކުރުމުގެ މަސައްކަތް ކުރިއަށް ދާ ކަމަށެވެ.
އެ ޤަވާޢިދުގެ ދަށުން ބިން ދޫކުރުމަށްޓަކައި އުސޫލު އެކުލަވައިލުމުގެ މަރުހަލާގައި، ކަމާގުޅޭ ފަރާތްތަކުގެ ޚިޔާލާއި މަޝްވަރާ ބޭނުންވާ ކަމަށްވެސް އެ ކައުންސިލުން ބުންޏެވެ. ދުވާފަރު ކައުންސިލުން ބުނީ، އެހަންކަމުން މިފަދަ ފަރާތްތަކާއި އެކު ސިލްސިލާ ބައްދަލުވުންތަކެއް ކުރިއަށް ގެންދިއުމަށް ނިންމާފައިވާ ކަމަށެވެ.
މިގޮތުން، އެ ރަށުގައި މަސްކައްކާ ހިއްކުމަށާއި ދަނޑުވެރިކަން ކުރުމަށް ޝައުގުވެރިވާ ފަރާތްތަކަށް ވަގުތީ ބިން ދޫކުރުމަށް ކައުންސިލުން ބޭނުންވާތީވެ، މި ފަރާތްތަކާއެކު ބައްދަލުކުރުން 2024 ޖޫން 28 ވާ ހުކުރު ދުވަހުގެ މެންދުރު ފަހު 02:00 ގައި ކޮމިއުނިޓީ ޕްރީ ސްކޫލްގައި އޮންނާނެ ކަމަށް ދުވާފަރު ކައުންސިލުން ބުނެފައިވެއެވެ.
