ރ. އުނގޫފާރު ކައުންސިލްގެ ނިންމުމަކާ ގުޅިގެން އެ ރަށުގެ ގިނަ ވިޔަފާރީތަކެއް ހުއްޓި ރަށަށް އަރާ މެހެމާނުންނަށާއި އެ ރަށުގެ ރައްޔިތުންނާއި ވިޔަފާރިވެރިންނަށް ތަކުލީފާއި ގެއްލުން ކުރިމަތިވާން ފަށައިފިއެވެ.
ރީޖަނަލް ހޮސްޕިޓަލެއް ހުރުމުގެ ސަބަބުންނާއި ފިޔަފާރީއާ ގުޅިގެން ރ. އަތޮޅު ހިމެނޭހެން ސަރަހައްދީ ހަތަރު އަތޮޅެއްގެ މީހުން ބޭސްފަރުވާގެ ޚިދުމަތް ހޯދުމަށާއި ވިޔަފާރީގެ އެކި ބޭނުންތަކަށްވެސް އުނގޫފާރަށް ޒިޔާރަތްކުރެއެވެ. އެކި ބޭނުންތަކަށް ކޮންމެ ދުވަހަކުވެސް އުނގޫފާރަށް ޒިޔާރަތްކުރާ މީހުންގެ އަދަދު ގިނައެވެ.
އުނގޫފާރު ހޮސްޕިޓަލް ސަރަހައްދުން ވިޔަފާރި ކުރުމަށް ދޫކޮށްފައި ހުރި ބިންތަކުގެ މުއްދަތު މިފަހުން ވަނީ ހަމަވެފައެވެ. ވިޔަފާރިވެރިންގެ ކަންބޮޑުވުންތަކާއި ޝަކުވާތަކަށް ބެލުމެއްނެތި، އާންމުނަށް ވާނޭ ދަތިތަކަށް ރިއާޔަތްކުރެމެއް ނެތި އެތަން ތަނުން ޚިދުމަތް ހޯދާ ފަރާތްތަކަށް ދަތިވާނެހެން ބިންތައް ހުސްކުރަން އުނގޫފާރު ކައުންސިލުން ވަނީ އަންގާފައެވެ.
މި އެންގުމާ ގުޅިގެން އާންމުންނާއި ވިޔަފާރިވެރިންގެ ”ރުޅިގަނޑު“ އަދި ޝަކުވާއާއި ނުރުހުންވަނީ ކައުންސިލަށް އަމާޒުވެފައެވެ.އު
ނގޫފާރަށް ޒިޔާރަތްކުރާ މީހުން ވިޔަފާރިކުރުމާއި ކެއިންބުއިމުގެ ހުރިހާ ޚިދުމަތެއް ހޯދާ މައިގަނޑު ސަރަހައްދަކީ އެ ރަށުގެ ހޮސްޕިޓަލް ސަރަހައްދެވެ. އެތަނުގައި ހުންނަ ކެފޭ/ ރެސްޓޯރެންޓުތަކާއި ފިހާރަތަކުން ކޮންމެ ދުވަހަކުވެސް އެތައް ބަޔަކު ފިޔަފާރިކުރެއެވެ.
ނަމަވެސް، އާންމުންނާ މެދު ވިސްނާނުލައި ކައުންސިލުން ވަނީ ވިޔަފާރި ކުރާ ތަންތަން މި މަހުގެ 30 ކުރިން ހުސްކުރުމަށް އަންގާފަައެވެ.
ރ. ވާދޫ ލައިވްއަށް މައުލޫމާތު ލިބޭ ގޮތުގައި، އެ ރަށު ކައުންސިލުން ފުރަތަމަ މަސައްކަތްކުރީ ވިޔަފާރި ކުރާ ތަންތަނުގެ ޚިދުމަތްތައް ނުހުއްޓޭ ގޮތަށް އެކަން ކުރުން ކަމަށެވެ.
އެގޮތުން، އެ ރަށުގައި ވިޔަފާރިތައް ހިންގުމަށް ކައުންސިލުން ދޫކޮށްފައި ހުރި ބިންތަކުގެ މުއްދަތު މިދިޔަ އަހަރު ތެރޭގައި ހަމަވެގެން، އެ މުއްދަތު 18 މަސްދުވަހަށް އިތުރުކޮށްދިނުމަށް ކައުންސިލުން ދައުވަތެއް ދިނެވެ.
ނަމަވެސް އެއްބަސްވުމުގައި ސޮއިކުރުމަށް އެއް ދުވަހަށް ވެފައި ވަނިކޮށް ކައުންސިލުން އެކަން މަޑުޖައްސާލަން ނިންމިކަން ވިޔަފާރިވެރިންނަށް އެންގިއެވެ. ދެން ނިންމީ އެއް އަހަރު ދުވަހަަށް އެއްބަސްވުން އައުކުރާށެވެ.
އެހެން ނަމަވެސް އެއްބަސްވުމުގައި ސޮއިކުރަން ދުވަހަކަށް ވެފައި ވަނިކޮށް ތިން މަސްދުވަހު ނޯޓިސްއެއް ދިނުމަށްފަހު ތަން ހުސްކުރަން އެންގީ ކަމަށް މައުލޫމާތު އެނގޭ މީހަކު ނަންނުޖެހުމަށް ޝަރުތުކޮށް ރ. ވާދޫ ލައިވްއަށް ކިޔައިދީފައިވެއެވެ.
އޭނާ ބުނީ، ވިޔާފާރި ކުރާ ބިންތައް ހުސްކުރުމަށް އުނގޫފާރު ކައުންސިލުން ތިން މަސްދުވަހުގެ ނޯޓިސް އެއް ދިން އިރު ނިންމާފައި އޮތީ އެ ތިން މަސް ދުވަސް ތެރޭ ބިޑިންގެ މަސައްކަތް ނިންމާ ގޮތަށެވެ.
މިހާލަތުގައި ބިންތަކުގެ މުއްދަތު ހަމަވުމުން އަލުން އެ ބިންތަކުގެ ބިޑަށް ހުޅުވާލުމުން ކުރިން އެތަން ހިންގި ފަރާތްތަކަށް ވެސް ބިޑަށް ކުރިމަތިލައިގެން ކާމިޔާބު ކުރުމުގެ ފުރުސަތު އެބަ އޮތެވެ. ނުވަތަ އެހެން ފަރާތެއް ބިޑު ކާމިޔާބު ކުރިޔަސް ވިޔަފާރި ކުރާ ތަންތަނުގެ ޚިދުމަތް ނުހުއްޓި ކުރިއަށް ގެންދިއުމުގެ ފުރުސަތު ތަނަވަހެވެ.
ނަމަވެސް، ފުރަތަމަ ތިން މަސް ދުވަހުގެ ތެރޭގައި ކައުންސިލަށް ބިޑިންގެ މަސައްކަތްތައް ނުނިންމުނެވެ. އެހެންވެ، އުނގޫފާރު ކައުންސިލުން ނިންމީ އެ މަސައްކަތް ނިންމަން އިތުރު ދޮޅު މަސްދުވަސް ހޭދަކުރަންށެވެ.
އެކަމަކު، ކައުންސިލަށް އެ މުއްދަތުގެ ތެރޭގައިވެސް ބިންޑިންގެ މަރުހަލާ ފުރިހަމަ ނުކުރުމެވެ. އެންމެ ފަހުން އެރަށު ކައުންސިލުން ނިންމާފައި ވަނީ އެ ބިންތައް ހުސްކުރުމަށް ފަހު، ބިޑިންގެ މަސައްކަތް ކުރިއަށް ގެންދިޔުމަށެވެ.
އެހެންކަމުން، މިވަގުތު ވިޔަފާރި ކުރަމުންދާ ބައެއް ފަރާތްތަކަށް ބިން އެވޯޑްކޮށްފައިވީ ނަމަވެސް ވެލިޑިޓީ އޮތް އެއްބަސްވުމެއް ނެތުމުގެ ސަބަބުން ވަނީ ބިން ހުސްކުރަން ޖެހިފައެވެ.
