ރ. ވާދޫގައި، މަދިރި އާލާވާ ގޮތަށް ތަންތަނާއި ތަކެތި ހުރުމުން އެކަން އިސްލާހުކުރުމަށް ރައްޔިތުންނަށް އަންގައި ވާދޫ ކައުންސިލުން އިންޒާރެއްދީފިއެވެ.
މާޅޮސްމަޑުލު އުތުރުބުރީ ވާދޫ ކައުންސިލްގެ އިދާރާއިން ކުރި އިއުލާނެއްގައި ބުނި ގޮތުގައި، ހުޅަނގު މޫސުމާ ގުޅިގެން ކުރަމުންދާ ވިއްސާރާގައި ރަށުގެ ބައެއް ސަރަހައްދުތަކުގައި ފެންހަރުލާ ގޮތަށް ބަހައްޓާފައިވާ ތަކެތި ހުރިކަމުގައި ވާދޫ ހެލްތު ސެންޓަރުން އެ ކައުންސިލަށް ވަނީ އަންގާފައެވެ.
އެ އިދާރާއިން ބުނީ، މިދުވަސްވަރަކީ ޑެންގޫ ފެތުރެމުންދާ ދުވަސްވަރެއްކަމުން، ފެން ހަރުލާގޮތަށް ހުރި ތަންތަން ނައްތާލުމަށް އެތަކެތީގެ ވެރި ފަރާތްތަކަށް ތަކުރާރުކޮށް އެންގުމުންވެސް އިޖާބަދީފައިނުވާ ބައެއް ތަންތަން ހުރި ކަމުގައި ވާދޫ ހެލްތު ސެންޓަރުން ކައުންސިލަށް އަންގާފައިވާ ކަމަށެވެ.
ރަށު ކައުންސިލުން ވަނީ، ވާދޫގެ މީހުން ދިރިއުޅޭ ގޯތިތަކާއި، މަގުތަކާއި، ހޭޅިތަކާއި އަދި އޮޑިއެހެލާ ސަރަހައްދުތަކުގައި ފެންހަރުލާ ގޮތައް ހުރި ތަންތަން، މިހިނގާ ޖުލައި މަހުގެ 30 ވާ އަންގާރަ ދުވަހުގެ ކުރިން އިސްލާޙުކުރުމަށް އަންގާފައެވެ. އަދި މިމުއްދަތުގެ ތެރޭގައި މިކަންކަން އިސްލާހު ނުކޮށްފިނަމަ، މަދިރި އުފެދޭ ތަންތަން ނައްތާލުމަށް އެ ކައުންސިލުން ކުރާ މަސައްކަތުގައި އެތަކެއްޗަށް ލިބިދާނެ ގެއްލުމެއްގެ ޒިންމާ، ނުއުފުލާނެ ކަމަށް ވަނީ އިންޒާރުދީފައެވެ.
މަދިރީގެ ޒަރީއާއިން ޖެހޭ ނުރައްކާތެރި ބަައްޔެއް ކަމުގައިވާ ފައިލޭރިއާ ބަލި ފެތުރެން ފެށުމާ ގުޅިގެން އެ ބަލިން ރައްކާތެރިވުމަށް ފިޔަވަޅު އެޅުމުގެ ގޮތުން މިދިޔަ ޑިސެމްބަރުމަހު މަދިރި އުފެދޭ ތަންތަން ނައްތާލުމަށް މަދިރި މަދުކުރުމުގެ ޕްރޮގްރާމެއް މުޅި ރާއްޖޭގައި ފަށާފައިވެއެވެ.
ފައިލޭރިއާއަކީ މަދިރީގެ ޒަރީއާއިން ޖެހޭ ބައްޔެކެވެ. ފައިލޭރިއާ އަކީ ބަލިޖައްސާ ފަންޏެއްގެ ސަބަބުން ހަށިިގަނޑުގެ ގުންވަންތަކަށް ޖެހޭ ނުރައްކާތެރި ބައްޔެކެވެ. މި ބެލި ޖެހުމުން ހަށިގަނޑުގެ ލިމްފެޓިކް ސިސްޓަމަށް އަސަރުކުރެއެވެ. މިއީ މަދިރީގެ ޒަރީޢާއިން ފެތުރޭ ނުރައްކާތެރި ބައްޔެކެވެ. ރާއްޖޭގައި މިހާތަނަށް މި ބަލި ފެނިފައިވަނީ ކުޅުދުއްފުށި ސިޓީ، މާލެ ސިޓީ އަދި ހުޅުމާލެއިންނެވެ.
