ރ. އަލިފުށީގައި ހުންނަ އައިސް ޕާލާންޓުން ޚިދުމަތް ނުދޭތާ މަހަކަށްވުރެ ގިނަ ދުވަސްވެފައިވާކަމަށް މައުލޫމާތު ލިބިއްޖެެއެވެ.

އަލިފުށީ އައިސް ޕްލާންޓްގެ މުވައްޒަފަކު ވިދާޅުވީ، އެތަނުގެ ޚީދުމަތް ހުއްޓާލާފައިވާތާ މަހަކަށްވުރެ ގިނަ ދުވަސްވެފައިވާ ކަމަށެވެ. ނަމަވެސް، އެތަން ހިންގަމުން އައި ފެނަކަ ކޯޕަރޭޝަނުން މުވައްޒަފުންނަށް ދޭންޖެހޭ މުސާރަ ދީފައިވާ ކަމަށް ވިދާޅުވިއެވެ.

1 އޯގަސްޓް 2024ގައި ފެނަކައިން ބޭއްވި ނޫސްވެރިންގެ ބައްދަލުވުމެއްގައި އެ ކުންފުނިން ހާމަކޮށްފައިވާ ގޮތުގައި ފެނަކައިން ރަށްރަށުގައި ހިންގަން ފެށި އައިސް ޕްލާންޓްތަކުން ކުންފުންޏަށް ބޮޑު ގެއްލުމެއް ލިބެމުންދާތީ، އެ ހިދުމަތް ވަނީ ހުއްޓާލާފައެވެ.

އެ ކުންފުނިން ބޭއްވި ނޫސްވެރިންގެ ބައްދަލުވުމުގައި މެނޭޖިން ޑިރެކްޓަރު މުއާޒް މުހައްމަދު ރަޝީދު ވިދާޅުވީ، އައިސް ޕްލާންޓްތައް ހިންގައިގެން ފެނަކައަށް އަހަރަކު 12 މިލިއަން ރުފިޔާގެ ބޮޑު ގެއްލުމެއް ލިބޭ ކަމަށެވެ. ކުރީ ސަރުކާރުން އެ ކުންފުނި މެދުވެރިކޮށް ފެށި އައިސް ޕްލާންޓް ހިދުމަތަކީ ފެނަކައިގެ މެންޑޭޓުގައި ހިމެނޭ މަސައްކަތްތަކާ ނުވެސް ގުޅޭ ކަމެއް ކަމަށް މުއާޒް ވިދާޅުވިއެވެ.

”އެހެންވީމަ އަޅުގަނޑުމެން ނިންމީ ގެއްލުންވާ އެއްވެސް ކަމެއް ކުރިއަށް ނުގެންދަން. އޭގެތެރެއިން އައިސް ޕްލާންޓުތައް އޮޕަރޭޓު ކުރުން ވެސް ނިމުމަކަށް މިގެނައީ،“

މުއާޒް ވިދާޅުވީ، ލ. އަތޮޅުގައި އައިސް ޕްލާންޓެއް ހިންގަމުން ދަނިކޮށް ފެނަކައިން އެތަނުގައި އިތުރު އައިސް ޕްލާންޓެއްގެ ހިދުމަތް ފެށިއެވެ. މިއީ އެއްވެސް ހަމަޖެހޭ އުސޫލަކުން ކޮށްފައިވާ ކަމެއް ނޫން ކަަމަށާއި އެކަން ވެސް ބަލަމުން އަންނަ ކަމަށް ވިދާޅުވިއެވެ.

މުއާޒް ވިދާޅުވި ގޮތުގައި އައިސް ޕްލާންޓް އޮޕަރޭޓު ކުރުމުގެ އިތުރުން އޭޓީއެމް ހެދުމުގެ ޕްރޮޖެކްޓެއް ވެސް ކުރީ ސަރުކާރުން އެ ކުންފުނި މެދުވެރިކޮށް ހިންގަމުން ދިޔައެވެ. އެއީ ވެސް އެ ކުންފުނީގެ މައިގަނޑު މަސައްކަތަށް އެއްވެސް ފައިދާއެއް ނުކުރާ މަސައްކަތެއް ކަމަށް އޭނާ ވިދާޅުވިއެވެ.

ފެނަކައިން ނިންމާފައި ވަނީ ކުންފުންޏަށް ގެއްލުންވާ ގޮތަށް ކުރިން ކުރަމުން އައި ހުރިހާ ކަމެއް ހުއްޓާލުމަށެވެ. މިކަންކަން ތަންފީޒުކުރަން ފެށުމުގެ ނަތީޖާއެއްގެ ގޮތުން މި އަހަރުގެ ފުރަތަމަ ދެ ކުއާޓަރުގައި ކުންފުނި ހިންގީ ފައިދާގައި ކަމަށް ވެސް މުއާޒް ވިދާޅުވިއެވެ.

ކުންފުނީގެ ޒިންމާގައި ނުހިމެނޭ މަސައްކަތްތަކާ ހަވާލުވުން ފަދަ އެކި ކަންކަމާ ހެދި، މި ސަރުކާރު ހަވާލުވި އިރު ފެނަކައިގެ ދަރަނި ހަތަރު ބިލިއަނަށް ވުރެ މައްޗެވެ.