ރ. އަލިފުށީގައި އެއާޕޯޓެއް ހެދުމަށް، އެ ރަށަށް ގެންގޮސްފައިވާ ބަރު އުޅަނދުތައް ރަށުން ބާލައިފިއެވެ.
އެ ރަށު ކައުންސިލްގެ އޮފިޝަލަކު މައުލޫމާތު ދެއްވި ގޮތުގައި، މިދިޔަ މެއިމަހުގެ ހަވަނަ ދުވަހު، މިމަޝްރޫއުގެ ބޭނުމަށް ގެންދިޔަ ބައެއް ވެހިކަލްތައް އަލިފުށިން ބާލާފައިވާ ކަމަށާއި މިއަދުގެ މެންދުރުކުރިން އިތުރު ވެހިކަލްތަކެއް ގެންގޮސްފައިވާ ކަމަށެވެ.
އެއާޕޯޓް މަޝްރޫއަށް ގެންދިޔަ އުޅަނދުތައް އެމްޓީސީސީން އަލިފުށިން ބާލާފައިވާއިރު އަލިފުށީ އެއާޕޯޓު ހުއްޓައިލާނޭ ކަމަށް ކިޔަނީ ފިނޑިބައެއް ކަމަށާއި، ވެރިކަން ލިބިވަޑައިގެންފިނަމަ މާ ބާރަށް ނިންމައިދޭނެ ކަމަށް ވިދާޅުވެ ރައީސް ޑރ. މުޙައްމަދު މުއިއްޒުވަނީ ރިޔާސީ އިންތިޚާބުގެ ކެމްޕެއިންގައި އެ ރަށު ރައްޔިތުންނަށް ވައުދުވެވަޑައިގެންފައެވެ.
އަލިފުށީގައި ވާހަކަ ދައްކަވަމުން ރައީސް ޑރ. މުއިއްޒު އޭރު ވިދާޅުވީ އެމަނިކުފާނު އުޅުއްވަނީ ތަރައްގީގެ މަޝްރޫއުތައް ހުއްޓައިލައްވަން ކަމަށާއި ވަޒީފާތަކުގައި ތިބި މީހުން ވަކިކުރަން ކަމަށް ބުނެ ވާހަކަ ދައްކަނީ ވަރަށް ފިނޑި ބައެއް ކަމަށެވެ.
”އެ ކަހަލަ ވާޙަކަތައް ދައްކަނީ ވަރަށް ވެސް ފިނޑި ބައެކޭ. ފިނޑި އަމަލެކޭ އެއީ. ނާތަހުޒީބު އަމަލެކޭ. އަޅުގަނޑުމެން ވާންވެއްޖެ މި އަށްވުރެ ޒިންމާދާރު ބަޔަކަށް،“
”މި ރަށުގެ އެއާޕޯޓް މަޝްރޫއަކީ އެ ބޭފުޅުންނަށްވުރެ ބޮޑަށް އަޅުގަނޑުމެން ތިޔަބޭފުޅުނަށްޓަކައި ކޮށްދޭން ބޭނުންވާ ކަމެއް،“
އެމަނިކުފާނު އަލިފުށީ ރައްޔިތުންނަށް ދެއްވި ޔަގީންކަމަކީ މި ސަރުކާރުން ކުރިއަށް ގެންދާވަރަށްވުރެ ބާރު ސްޕީޑުގައި އެއާޕޯޓްގެ މަޝްރޫއު ނިންމަވައިދެއްވާނެކަމުގެ ޔަގީންކަމެވެ.
ހިޔާލު ތަފާތުވުންތައް ބޮޑުވި، އަލިފުށީ އެއާޕޯޓްގެ މަސައްކަތް މިދިޔަ ސަރުކާރުން ވަނީ ފަށައިފައެވެ. އެމްޓީސީސީއާ ހަވާލުކޮށްގެން ހަދަމުން އަންނަ އެ އެއާޕޯޓަށް ބޭނުންވާ 50 ހެކްޓަރުގެ ބިން، މިހާރު އަންނަނީ ހިއްކަމުންނެވެ. އެއާޕޯޓްގެ މަސައްކަތަށް، ރަށުގެ ދެކުނު ފަރާތުން ބޮޑު ސަރަހައްދެއް ވެސް އޮތީ ބަންދުކޮށްފައެވެ.
އަލިފުށި އެއާޕޯޓް މަޝްރޫއާ އެކީގައި ބިން ހިއްކާ، އެ ރަށުގައި ސިނާއީ ސަރަހައްދެއް ގާއިމުކޮށްދެއްވާނެ ކަމަށްވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ.
ރައީސް ޑރ. މުއިއްޒު މިފަދައިން ވިދާޅުވީ އަތޮޅު ތެރެއަށް އެމަނިކުފާނު ކުރެއްވި ދަތުރުފުޅުގެ ތެރެއިން އަލިފުއްޓަށް ވަޑައިގެން އެރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ. ރައީސް ޑރ. މުއިއްޒު ވަނީ އަލިފުށީގެ ތަރައްގީން މިހާތަނަށް ދޫވެފައިހުރި ހުރިހާ މަސައްކަތްތައް މިސަރުކާރުގައި ހަގީގަތަކަށް ހަދައިދޭނެ ކަމަށް ވިދާޅުވެ، އަލިފުއްޓަށް ސަރުކާރުން ވީ ކޮންމެ ވަޢުދެއް، އަވަސްމިނުގައި ހާސިލްކޮށްދެއްވާނެ ކަމުގެ ޔަގީންކަން އެ ރަށުގެ ރައްޔިތުންނަށް ދެއްވާފައެވެ.
މިގޮތުން އެރަށުގެ އެއާޕޯޓު މަޝްރޫއަށް އިޝާރާތްކުރައްވާ ރައީސް ޑރ. މުއިއްޒު ވިދާޅުވީ އެއާޕޯޓް ގެ މަސައްކަތް އަވަސްކޮށް، ރައްޔިތުން އެދޭ ބާރު ސްޕީޑްގައި މި މަސައްކަތް ކުރިއަށްގެންގޮސް، ރައްޔިތުންގެ އުއްމީދުތައް ހާސިލްވާ މަޝްރޫއު އަކަށް ހައްދަވައިދެއްވާނެ ކަމަށެވެ. އަދި އެއާޕޯޓް މަޝްރޫއުގެ އިތުރުންވެސް އަލިފުށީގެ ބިން އިތުރަށް ހިއްކާ، ރަށުގައި ސިނާއީ މަސައްކަތްތައް އިތުކުރެވޭނެ މަގު ފަހިކޮށްދެއްވާނެކަމަށް ވެސް ރައީސް ޑރ. މުއިއްޒު ވިދާޅުވިއެވެ.
ރައީސް ޑރ. މުއިއްޒު ވިދާޅުވީ އަލިފުށީގައި ތަރައްގީ ކުރެވިގެންދާ ސިނާއީ ސަރަހައްދުގެ ސަބަބުން ރަށުގައި ތިބެގެން އާމްދަނީ ހޯދޭނެ ފުރުސަތު އިތުރުވެގެން ދާނެ ކަމަށެވެ.
އަލިފުށީގެ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައި ރައީސް ޑރ. މުއިއްޒު ވަނީ އެރަށުގެ ބިން އިތުރު ކުރުމުގެ މަޝްރޫއާއި, ރަށުގެ ސިއްހީ މަރުކަޒު ހޮސްޕިޓަލަށް ބަދަލުކޮށްދީ ރަނގަޅު ފެންވަރުގެ ހިދުމަތް ލިބޭ ތަނަކަށް ހަދައިދެއްވާނެ ކަމަށް ވިދާޅުވެފައެވެ.
