އެމެރަލްޑް މޯލްޑިވްސްގައި މަސައްކަތް ކުރަމުންދިޔަ ބިދޭސީންތަކެއް، ގަވާއިދާ ޚިލާފަށް ރ.އަތޮޅު މަޑުއްވަރީއަށް ދިޔަ މައްސަލަ ބަލަމުންދާކަމަށް މޯލްޑިވްސް އިމިގްރޭޝަނުން ބުނެފިއެވެ.

މަޢުލޫމާތު ލިބިފައިވާގޮތުގައި އެމެރަލްޑް މޯލްޑިވްސްގައި މަސައްކަތް ކުރަމުންދިޔަ ބިދޭސީންތަކެއް މަޑުއްވަރީއަށް ގޮސްފައިވަނީ ގަވާއިދާ ޚިލާފަށް އުޅެމުންދާ ބިދޭސީން ހޯދުމަށް ކުރަމުންދާ މަސައްކަތުގެ ތެރެއިން އެރިސޯޓަށް އިމިގްރޭޝަނުން ދާކަމަށް ބުނެ މަޢުލޫމާތު ދިނުމާ ގުޅިގެންނެވެ. އެހެންނަމަވެސް އެރިސޯޓަށް ގޮސްފައި ނުވާކަމަށް އިމިގްރޭޝަނުން ބުނެއެވެ.

ދައުލަތުގެ މީޑިއާގެ ”ޕީއެސްއެމް ނިއުސް“އަށް ދެއްވި އިންތަރވިއުއެއްގައި މަޑުއްވަރީ ކައުންސިލްގެ ރައީސް މުޙައްމަދު ޞާދިޤު ވިދާޅުވެފައި ވަނީ، ގަވާއިދާ ޚިލާފަށް ބިދޭސީންތަކެއް މަޑުއްވަރީއަށް އައުމާ ގުޅިގެން ފުލުހުންނާއި ގުޅިގެން އެމީހުންގެ މަޢުލޫމާތު އެއްކުރުމަށްފަހު އެބިދޭސީން އަނބުރާ ރިސޯޓަށް ފޮނުވާލާފައިވާކަމަށެވެ. އެގޮތުން ރަށަށް އެރިކަމަށް ބެލެވޭ 60 މީހުންގެ ތެރެއިން 40 މީހެއްގެ މަޢުލޫމާތު އެއްކޮށްފައިވާއިރު ދެން ތިބި މީހުން އޭގެކުރިން ރަށުން ގޮސްފައިވާކަމަށް ކައުންސިލްގެ ރައީސް ވިދާޅުވެފައިވެއެވެ.

މޯލްޑިވްސް އިމިގްރޭޝަނުން ބުނީ މިމައްސަލަ އިމިގްރޭޝަންގެ ސަމާލުކަމަށް އައިސްފައިވާކަމަށާއި، އެމައްސަލަ ދިވެހި ފުލުހުންގެ ޚިދުމަތާއި ގުޅިގެން ބަލަމުންދާކަމަށެވެ.

ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ސަރުކާރުން ކުރިއަށްގެންދާ މަޝްރޫޢުގެ ދަށުން މުޅިރާއްޖޭގައި އަންނަނީ އޮޕަރޭޝަން ކުރަނގީގެ ނަމުގައި ޚާއްސަ އޮޕަރޭޝަނެއް ހިންގަމުންނެވެ. މިމަޝްރޫޢުގެ ދަށުން މަޑުއްވަރީގައި ތިބި ހުރިހާ ބިދޭސީންގެ މަޢުލޫމާތު އެއްކޮށްފައިވާކަމަށް ކައުންސިލުން މައުލޫމާތު ދީފައިވެއެވެ. އެގޮތުން އެރަށުގައި ތިބި 130 ބިދޭސީންގެ ބަޔޯމެޓްރިކްސް ނަގާފައިވާކަމަށް ކައުންސިލުން ބުންޏެވެ.