ރ. ވާދޫއަށް އެރި މީހަކަށް ސިހުރުހާހޫރައިގެ ތުހުމަތުކޮށް، ރަށުން ބޭރުކުރާ މަންޒަރު ކަމަށް ބުނެ ސޯޝަލްމީޑިއާގައި މިހާރު ދައުރުވަމުންދާ ވީޑިއޯއަކީ މީގެ ދެ އަހަރު ދުވަސް ކުރީގެ ހާދިސާއެއްގެ ވީޑިއޯއެއްކަން މިނޫހަށް ކަށަވަރުވެއްޖެއެވެ.
ވީޑިއޯއިން ފެންނަނީ، މިރަށަށް އެރި ފިރިހެނަކު، ރަށުން ބާލައިގެން ފުލުހުންގެ ހިމާޔަތުގައި ގެންދާ މަންޒަރެވެ. އޭނާ ހައްޔަރުކުރީތޯ ނުވަތަ ބަންދުކުރީތޯ އަދި އޭނާއާ މެދު ފިޔަވަޅެއް އެޅިތޯ ސުވާލުކުރުމުން، ފުލުހުންގެ ޚިދުމަތުން ޖަވާބެއް ނުދެއްވައެވެ.
ނަމަވެސް، އެއީ ދެ އަހަރު ކުރީގެ ވީޑިއޯއެއް ކަމަށް ބުނެ ނިންމާލީއެވެ. މިމައްސަލާގައި، ތުހުމަތު ރައްދުވާ މީހާގެ އަތުން ބާރުލިބޭ އެއްވެސް އެއްޗެއް ފެނިފައިވޭތޯ ނޫންތޯ ވެސް ފުލުހުން ޖަވާބު ނުދެއްވާތީ ސާފެއް ނުވިއެވެ.
ނަމަވެސް، ވީޑިއޯގައި އޭނާ ގެންގުޅުނު ދަބަހެއް ބަލައިފާސްކުރުމަށް އާންމުން ނުރުހުމާއެކު އެދެމުން ދިޔައެވެ. އެކަމަކަށް ފުލުހުންގެ ޚިދުމަތުގެ ޔުނީފޯމްގައި ތިއްބެވި އޮފިސަރުން އެއްވެސް އިޖާބައެއް ނެތި އޭނާއަށް ފުރިހަމަ ހިމާޔަތްދީ ރަށުން ބާލައި ލޯންޗަށް އަރުވައިގެން ފުރާ މަންޒަރު ވީޑިއޯއިން ފެނެއެވެ.
އޭގެ ފަހުން ވީގޮތެއް ސާފުކުރުމަށް މިނޫހުން ފުލުހުންގެ މީޑިއާ ގްރޫޕްގައި ސުވާލުކޮށްގެންވެސް މިހާތަނަށް ވަނީ ޖަވާބެއް ނުލިބިއެވެ.
މިފަދަ މައްސަލަތަކުގައި ތުހުމަތުކުރެވި ހައްޔަރުކުރި ނަމަވެސް އަދަބެއް ނުދީ ދޫކޮށްލާކަމުގެ ޝަކުވާއަކީ އާންމު ކަންބޮޑުވުމެކެވެ.
ފަންޑިތަ ސިހުރު ހާހޫރަ ހެދުމަކީ އިސްލާމީ މުޖުތަމަޢެއްގައި ހުއްދަ ކަމެއް ނޫން!
ޤާނޫނު ނަންބަރު 78/74 (ދިވެހިބޭސްކުރުމާއި ފަންޑިތަ ހެދުމާއި ޚިތާންކުރުމާއި އަދި ފޫޅުމާކަންކުރުމާބެހޭ ޤާނޫ) ގައި ބަޔާންކޮށްފައިވަނީ، ފަންޑިތަ ހެދުން ފަދަ ކަމެއް ކުރަންވާނީ މިނިސްޓްރީ އޮފް ހެލްތަށް ލިޔެ ހުއްދަ ހޯދައިގެން ކަމަށެވެ. ނަމަވެސް، މިހާރަކަށް އައިސް ހުއްދަ ހޯދުމެއްނެތި ފަންޑިތަ ސިހުރު ހާހޫރަ ހަދަމުންދާ ބަޔަކު މުޖުތަޢުގައި އުޅެމުންދެއެވެ.
މީގެ އިތުރުން ޚަބަރުފަތުރާ ބައެއް ވަސީލަތްތަކުންވެސް އިސްލާމްދީނުގައި ޙަރާމްކުރައްވާފައިވާ ބޮޑު ފާފައިގެ ތެރޭގައި ހިމެނޭ ސިހުރު ހެދުމާބެހޭގޮތުން ޕްރޮގާމުތައް ފޮނުވަމުންދެއެވެ.
މިނިސްޓްރީ އޮފް އިސްލާމިކް އެފެއާޒުން ގެޒެޓްކޮށްފައިވާ ލިޔުމެއްގައި ބުނެފައި ވަނީ ފަންޑިތަ ސިހުރު ހާހޫރަ ހެދުމަކީ އިސްލާމީ މުޖުތަމަޢެއްގައި ހުއްދަ ކަމެއްނޫން ކަމަށެވެ. އެހެންނަމަވެސް، އީމާންކަން ބަލިކަށިވުމުގެ ސަބަބުން، ތިމާގެ ކިބައިގައި ނެތް ކުޅަދާނަކަމެއް ހޯދައިގަތުމުގެ މަޤްޞަދުގައި ބައެއް މީހުން ސިހުރު ހާހޫރައިގެ ބޭނުން ކުރެއެވެ. މިކަމުގެ ނުރައްކާތެރިކަމަކީ، މާތް اللهُ އަށް އުރެދި، ސިހުރު ހަދާ މީހާ ޝައިޠާނާގެ އަމުރުތަކަށް ކިޔަމަންވާން ޖެހުމެވެ.
ފަނާކުރަނިވި ބޮޑެތި ފާފަތަކުގެ ތެރޭގައި ސިހުރު ހިމަނުއްވާފައިވުމުން އެކަމުގެ ނުބައިކަމާއި އެކަމުގެ ސުންޕާކަން އެނގެއެވެ. މާތް اللهُ އަޅުގަނޑުމެންނަށް ޙަރާމް ކުރައްވާފައިވާ އެއްވެސް ކަމެއްގައި ޝިފާއެއް ލައްވާފައެއް ނުވާނެއެވެ. އެހެންކަމުން އަޅުގަނޑުމެންގެ މައްޗަށް އޮތީ ކަންކަމަށް އެދިގެން الله ގެ ޙަޟްރަތުގައި ދެންނެވުމެވެ. ހުރިހާ ކަމެއް މިންވަރު ކުރައްވަނީ މާތް اللهُ ކަން ޤަބޫލުކުރުމެވެ.
ވީމާ، މިފަދަ ކަންކަމާމެދު ވިސްނާ ފިކުރުކޮށް، މާތް ﷲގެ ޝަރީޢަތުގައި ސިހުރު ހާހޫރަ ހެދުން މަނާކޮށްފައިވާކަން ގަބޫލުކޮށް، އެކަމަށް ނުކިޔަމަންތެރިވާ ބަޔަކުކަމުގައި ނުވުމަށް، މިފަދަން ކަންކަން ކުރާ އެންމެހައި ފަރާތްތަކަށް އިސްލާމިކް މިނިސްޓްރީން އިލްތިމާސްކުރިއެވެ. އަދި މިފަދަ ފާފަވެރިކަމަކަށް އަރައި ނުގަތުމަށް ދިވެހި ލޮބުވެތި ރައްޔިތުންގެ ކިބައިން އިޙުތިރާމާއެކު އެދިފައިވެއެވެ.
މާތް اللهُ އަޅަމެން އެންމެން ސިހުރުގެ ނުބައިކަމުންނާއި އެކަން ކުރާ މީހުންގެ ކިބައިންނާއި އެންމެހައި ނުބައިކަންކަމުން ސަލާމަތްކުރައްވައި ރައްކާތެރިކުރައްވާށިއެވެ! އާމީން!
