ޝަރުއީ ދާއިރާގައި މަސައްކަތްކުރާ އަންހެން މުވައްޒަފުންނަށް މޫނުބުރުގާ އަޅައިގެން މަސައްކަތްކުރެވޭނެ ކަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ނިންމައިފިއެވެ.
މިއީ ޝަރުއީ ދާއިރާގެ މުވައްޒަފުންގެ ގަވާއިދު 2011 އަށް ގެނެވުނު އިސްލާހެއްގެ ދަށުން ދެވުނު ހުއްދައެކެވެ.
ކުރިން ޢަމަލުކުރަމުން އައި ގަވާއިދުގައި ބަޔާންކޮށްފައިވަނީ، ޝަރުއީ ދާއިރާގެ ޚިދުމަތްތަކަކީ ޒިންމާދާރުކަމާއެކު ދޭންޖެހޭ އަދި ޖަވާބުދާރީވާންޖެހޭ ޚިދުމަތްތަކަކަށްވާތީ، ޚިދުމަތް ލިބިގަންނަން އަންނަ ފަރާތްތަކަށް މުވައްޒަފަކީ ކާކުކަން އެނގެން ޖެހޭނެ ކަމަށެވެ. ނަމަވެސް މިހާރު ގެނެވުނު އިސްލާހުގައި ވަނީ، ”ލޯ ނުފޮރުވޭ ގޮތަށް މޫނުބުރުގާ އެޅުމަކަށް މި މާއްދާއިން ހުރަހެއް ނާޅާ“ ކަމަށެވެ.
އެހެންނަމަވެސް، މަސައްކަތުގެ މާހައުލުގައި މޫނުބުރުގާ އަޅާ މުވައްޒަފުންނަކީ ކާކުކަން ކަށަވަރުނުވެއްޖެ ހާލަތެއްގައި، އެ މުވައްޒަފެއްގެ މޫނު ކޯޓު ނުވަތަ އިދާރާގެ ކަމާބެހޭ އަންހެން މުވައްޒަފަކަށް ދައްކަންވާނެ ކަމަށް އިސްލާހުގައި ބަޔާންކޮށްފައިވެއެވެ.
މި ބަދަލު ގެނެވުނީ މިދިޔަ އަހަރުގެ އޮގަސްޓް މަހު މިފަދަ މައްސަލައެއް ފެންމަތިވުމާ ގުޅިގެންނެވެ. އޭރު ރައީސް ޑރ. މުހައްމަދު މުޢިއްޒު ވިދާޅުވެފައިވަނީ، ”އިސްލާމްދީނާ ޚިލާފުނުވާ ގޮތަށް ހެދުން އަޅާނަމަ ވަޒީފާ ދިނުމުގައި އެއްވެސް ތަފާތެއް ކޮށްގެން ނުވާނެ“ ކަމަށެވެ. އަދި މޫނުބުރުގާ އަޅާ މީހުންނަށް ވަޒީފާ ނުލިބޭ އުސޫލެއް ނުވަތަ ގަވާއިދެއް އޮތްނަމަ، އެ ބަދަލުކުރަން ޖެހޭނެ ކަމަށްވެސް ވިދާޅުވިއެވެ.
މީގެ ކުރިން ޝަރުއީ ދާއިރާގައި މޫނުބުރުގާ އެޅުމުގެ ސަބަބުން ބައެއް މުވައްޒަފުން ވަޒީފާއިން ވަކިކޮށް އަދި ވަޒީފާ ދިނުން ހުއްޓުވާފައިވާކަން ފާހަގަކުރެވެއެވެ.
