ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މ. އަތޮޅުގެ ރަށްތަކަށް ކުރައްވާ ރަސްމީ ދަތުރުފުޅުގެ ތެރެއިން، މ. ރަތްމަންދޫ ރައްޔިތުން އެހެން ރަށަކަށް ބަދަލުވުމާ ގުޅޭ ގޮތުން އެރަށު ރައްޔިތުންނާ ބައްދަލުކުރައްވައި މަޝްވަރާކުރައްވައިފިއެވެ.
މި ބައްދަލުވުން ބޭއްވީ މ. ރަތްމަންދޫގައި ރައްޔިތުންގެ ޚިޔާލާއި ފިކުރު ހޯއްދެވުމުގެ މަޤްޞަދުގައި ކަމަށް މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ބުނެއެވެ.
ރައީސުލްޖުމްހޫރިއްޔާގެ މި ދަތުރުފުޅަކީ، ރައްޔިތުންނާ ބައްދަލުކުރައްވައި ރަށްރަށުގެ އެންމެ ބޮޑެތި މައްސަލަތަކާއި ކުރިމަގަށް ބޭނުންވާ ތަރައްޤީގެ ކަންކަމާ ގުޅޭ ގޮތުން މަޝްވަރާކުރެއްވުމަށް ކުރައްވާ ދަތުރުފުޅެކަމަށް މިނިސްޓަރީން މައުލޫމާތ ދެއެވެ.
ރަތްމަންދޫ ރައްޔިތުން އެހެން ރަށަކަށް ބަދަލުވުމަކީ، އެ ރަށުގެ ރައްޔިތުންނަށް ދިގުދެމިގެންދާ ހައްލެއް ގެނެސްދިނުމަށް އެޅޭނެ މުހިންމު ފިޔަވަޅެއް ކަމަށް ސަރުކާރުން ދެކޭ ކަމަށް ކަމަށް ވެސް މިނިސްޓަރީން ބުނެއެވެ.
މި މަޝްވަރާ ބައްދަލުވުމުގައި ރައީސް ވަނީ، ރަތްމަންދޫ ރައްޔިތުންގެ ކަންބޮޑުވުންތައް އަޑުއައްސަވައި، އެކަމަށް ދެވޭނެ އެންމެ ރަނގަޅު ހައްލެއް ހޯއްދެވުމަށްޓަކައި ސަރުކާރުން މަސައްކަތްކުރައްވާނެ ކަމުގެ ޔަޤީންކަން ދެއްވާފައެވެ. އަދި ރަށު ކައުންސިލާއި، އާންމު ރައްޔިތުން ވަނީ މި ބައްދަލުވުމަށް މަރުޙަބާ ކިޔައި، މިކަމުގައި ސަރުކާރުގެ ފުރިހަމަ އެއްބާރުލުން ލިބިގެންދާނެ ކަމަށް އުންމީދުކުރައްވާކަން ފާޅުކޮށްފައެވެ.
