މާލެއިން ވާދޫއަށް ޒިޔާރަތްކުރި މީހަކު ގޭގައި އެކަހެރިކޮށްފައި ވަނިކޮށް، ކޯވިޑް-19ށް ފައްސިވެފައިވާ ކަމަށް ވާދޫ ސިއްހީ މަރުކަޒުން ބުނެފިއެވެ.
އެ މަރުކަޒުން ބުނީ އޭނާގެ ސުންކު ނެގީ ބަލީގެ އަލާމަތްތަކެއް ހުރުމުން ކަމަށެވެ. އަދި އެ ސުންކު ތަހުލީލުކުރުމުން ބައްޔަށް ފައްސިކަން އެނގިފައި ވެއެވެ.
މީގެ އިތުރުން، އުނގޫފާރު އިހާއެއް އުފެދުމާ ގުޅިގެން، އެކިއެކި ބޭނުންތަކަށް ރ. ވާދޫން އަތޮޅުގެ ވެރިރަށް އުނގޫފާރަށް ދަތުރުކުރި 85 މީހުން ގޭގައި އެކަހެރި ކުރެވިފައިވާ ކަމަށް ވާދޫ ސިއްހީ މަރުކަޒުން ބުނެއެވެ.
އެ މަރުކަޒުން ބުނި ގޮތުގައި، މާރިޗު މަހުގެ 2 ވަނަ ދުވަހު ފެށިގެން އިއްޔެއާ ހަމައަށް ރ. ވާދޫން އުނގޫފާރަށް ދަތުރުކުރެއްވެވި 85 ފަރާތެއް ވަނީ ގޭގައި އެކަހެރި ކުރެވިފައެވެ.
އެ 85 މީހުންގެ ތެރެއިން 10 ދުވަސް ވެފައިވާ 15 ފަރާތެއްގެ ސުންކު މިހާރު ނެގިފައިވާ ކަމަށް އެ މަރުކަޒުން ބުނެއެވެ.
