މިސްކިތްތަކުގައި ނަމާދުކުރުން ހުއްޓުވައި މިސްކިތްތަކާއިމެދު މިހާރު އަޅާފައިވާ ފިޔަވަޅުތަކާއިމެދު ދެވަނަ ވިސްނުމުކަށް ދިއުމަށް ޑރ. މުޙައްމަދު އިޔާޟް ޢަބްދުއްލަޠީފް އެދިވަޑައިގެންފިއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ޓެގްކުރައްވައި ޑރ. އިޔާޒް ކުރެއްވި ޓްވީޓުގައި ވިދާޅުވެފައިވަނީ ހުއްދަ ނަގައިގެން ބޭރުގައި އުޅޭ މީހުންނަށް މިސްކިތަށް އަރާ ނަމާދު ކުރުމުގެ ފުރުޞަތު ބަންދުކޮށްގެން ނުވާނެ ކަމަށެވެ. އަދި މިސްކިތުގެ ފާޚަނާ އިންނާއި އިސްކުރު ބަރިން ފެންކަނޑާލުމަކީ އޭގެ އުނދަގޫ ވަރަށް ގިނަ ބަޔަކަށް ކުރާނެ ކަމެއް ކަމަށާއި މިކަމުގައި ދެވަނަ ވިސްނެވުމަކަށް ދާންޖެހޭ ކަމަށެވެ.
ޑރ. އިޔާޟް ވިދާޅުވީ މަސައްކަތުގައި ބޭރުގައި އުޅޭ މީހުންނަށް ކޮންމެ ފަހަރަކު ނަމާދުކުރަން ގެއަށް ދިއުމަކީ ކުރެވޭނެ ކަމެއް ނޫން ކަމަށާއި ގޭގައިވެސް ނަމާދުކުރެވެން ނެތް ޙާލަތުގައި ގިނަބައަކު ދިރިއުޅެމުންދާކަމަށެވެ. މިހާރު އަޅާފައިވާ ފިޔަޅުތަކުގެ ސަބަބުން މީހުން ނަމާދުކުރުމާއި ދުރުވުމުގެ ފުރުޞަތުވެސް ބޮޑުކަމަށެވެ.
”މިސްކިތަށް އަރާ ބައަކު އަމިއްލައަށް ޖަމާއަތެއް ހަދައިގެން ނަމާދުކުރުން މަނާކުރުމަކީ ހުއްޓުވައިގެން ބެލެހެއްޓޭވަރުގެ ކަމެއް ނޫން. މިސްކިތަށް އަރާއިރު ޖަމާއަތުގަ ނަމާދުކުރާނަމަ ޖަމާއަތުގަ ބައިވެރިވުމަކީވެސް ހުއްޓުވޭނެ ކަމެއް ނޫން. ނަމާދުކުރާ މީހުންނާއިމެދު މިހައި ހަރުކަށި ފިޔަވަޅު އަޅާނަމަ ދެމީހުންނަށް އެއް ސައިކަލެއްގެ މަތީގައި އެކުގައި ދުއްވިގެންވެސް ނުވާނެ. ގައިދުރުކަން ނެތި ހިނގާ މީހުންނަށްވެސް ފުލުހުން ފިޔަވަޅު އަޅަން ޖެހޭނެ. އެކަންކަން ނުކޮށް ނަމާދުކުރާ މީހުންނަށް މިހައި ހަރުކަށިކޮށް ފިޔަވަޅު އެޅުމަކީ ބަލައިގަނެވޭނެ ކަމެއް ނޫން!“ ކަމަށްވެސް ޑރ. އިޔާޟް ވިދާޅުވިއެވެ.
ޑރ. އިޔާޟް މިފަދަ ބަސްފުޅެއް ވިދާޅުވެފައިވާއިރު ގިނަ ބައަކު ބުނަމުންދަނީ ނަމާދުކުރުމަށްވުރެ ބޮޑު ޟުރޫރީ ބޭނުމެއް ނުއޮންނާނެ ކަމަށާއި އަދާކުރަންޖެހޭ އެއަށްވުރެ ބޮޑު ވާޖބެއްވެސް ނެތް ކަމަށެވެ. ވީމާ ނަމާދު ވަގުތުޖެހުމުން ނަމާދަށް މިސްކިތަށް ދެވޭނެ ހުއްދައެއް ކޮންމެހެން ބޭނުންވާ ކަމަށެވެ.
”ނަމާދަށް ނުކުންނަ މީހަކު އެންމެ ކައިރީ މިސްކިތަކަށްވުރެ ދުރަށް ދާނަމަ ނުވަތަ އެހެންކަމެއް ކުރާނަމަ ފިޔަވަޅު އެޅުމަކީ މައްސަލައެއް ނޫން. ޖުރުމަނާވެސް އެހެން ކަންކަންވެސް ހަމަކުރަންވީ. ގިނައީ ގޭގައި ނަމާދުކުރެވެން ނެތް ޙާލަތުގައި ދިރިއުޅޭ މީހުން. ވީމާ ނަމާދުނުކުރެވޭނެ ގޮތަށް 100 އިންސައްތަ މުސްލިމް ދިވެހިރާއްޖޭގައި އޮތުމަކީ ވަރަށް ބޮޑަށް ކަންބޮޑުވާންޖެހޭ ކަމެއް.“ ކަމަށް ގިނަ ބައަކު ބުނެއެވެ.
ފުލުހުން ބުނެފައިވަނީ މިސްކިތުގައި ނަމާދުކޮށްގެން އެއްވެސް މީހަކަށް ފިޔަވަޅު އަޅާފައި ނުވާނެ ކަމަށެވެ. ނަމަވެސް ހުއްދަނެތި މަގުމަތީގައި އުޅުމުން ފިޔަވަޅު އަޅައިފާނެ ކަމަށެވެ.
